ព័ត៌មានអន្ដរជាតិ

បង់ក្លាដែស ស្នើឲ្យឥណ្ឌាបញ្ឈប់លោកស្រី Hasina បង្ហោះព័ត៌មានមិនពិត

បានផុស

២ ខែ មុន

នៅ

ថ្ងៃសុក្រ ៧ កុម្ភៈ ២០២៥

ដោយ

Chheang

ប្រទេសបង់ក្លាដែស បានស្នើឲ្យរដ្ឋាភិបាលឥណ្ឌា បញ្ឈប់អតីតនាយករដ្ឋមន្ត្រីបង់ក្លាដែស លោកស្រី Sheikh Hasina ធ្វើការផ្សព្វផ្សាយនូវព័ត៌មានមិនពិត និងប្រឌិត ខណៈពេលដែលលោកស្រីកំពុងស្ថិតនៅទីនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសបង់ក្លាដែស បានប្រគល់លិខិតតវ៉ាទៅស្នងការជាន់ខ្ពស់ស្តីទីរបស់ឥណ្ឌា នៅរដ្ឋធានីដាក្កា ដោយបង្ហាញពីការព្រួយបារម្ភយ៉ាងខ្លាំង ការខកចិត្ត និងការដាក់លក្ខខណ្ឌយ៉ាងធ្ងន់ធ្ងរ លើការអត្ថាធិប្បាយរបស់លោកស្រី Hasina។

យោងតាមទីភ្នាក់ងារព័ត៌មាន Reuters នៅថ្ងៃសុក្រទី៧ខែកុម្ភៈនេះ នៅក្នុងលិខិតនោះ បានរៀបរាប់ថា៖ «ក្រសួងបានស្នើសុំឥណ្ឌា ឲ្យចាត់វិធានការសមស្របភ្លាមៗ ក្នុងស្មារតីនៃការគោរពនិងការយល់ដឹងគ្នាទៅវិញទៅមក ដើម្បីបញ្ឈប់គាត់ពីការនិយាយមិនពិត ប្រឌិត និងបំផ្លិចបំផ្លាញ ខណៈពេលដែលគាត់ស្ថិតនៅក្នុងប្រទេសឥណ្ឌា»។

ថ្មីៗនេះ ក្រុមបាតុកររាប់ពាន់នាក់ បានប្រមូលផ្តុំគ្នានៅទីក្រុងដាក្កា នៅមុខផ្ទះរបស់លោកស្រី Hasina ដើម្បីបំផ្លាញ និងដុតផ្ទះរបស់លោក Mujibur Rahman ដែលជាឪពុករបស់លោកស្រី Hasina និងជាអតីតមេដឹកនាំស្ថាបនិករបស់ប្រទេសបង់ក្លាដែស។

លោកស្រី Hasina បានភៀសខ្លួនទៅកាន់ប្រទេសឥណ្ឌា កាលពីឆ្នាំមុន បន្ទាប់ពីការតវ៉ាដោយហិង្សាដែលបានសម្លាប់មនុស្សជាង ១ ០០០នាក់។

នៅក្នុងសុន្ទរកថាតាមអ៊ីនធឺណិតកាលពីថ្ងៃពុធ លោកស្រី Hasina បានអំពាវនាវដល់អ្នកគាំទ្ររបស់គាត់ឲ្យក្រោកឈរប្រឆាំងនឹងរដ្ឋាភិបាលបណ្តោះអាសន្ននៅក្នុងប្រទេសបង់ក្លាដែស ដោយចោទប្រកាន់ថាបានដណ្តើមអំណាចផ្ទុយពីច្បាប់រដ្ឋធម្មនុញ្ញ។

ការិយាល័យសារព័ត៌មានរបស់ប្រធានទីប្រឹក្សារដ្ឋាភិបាលបណ្តោះអាសន្នរបស់បង់ក្លាដែស លោក Muhammad Yunus បាននិយាយកាលពីថ្ងៃព្រហស្បតិ៍ថា ការវាយប្រហារលើលំនៅដ្ឋានរបស់លោក Rahman គឺជាការឆ្លើយតបទៅនឹង«អាកប្បកិរិយាហឹង្សា» របស់លោកស្រី Hasina ដោយបន្ថែមថា «រដ្ឋាភិបាលសង្ឃឹមថា ឥណ្ឌានឹងមិនអនុញ្ញាតឲ្យទឹកដីរបស់ខ្លួនត្រូវបានប្រើ ក្នុងគោលបំណងបង្កអស្ថិរភាពក្នុងប្រទេសបង់ក្លាដែស ហើយនឹងមិនអនុញ្ញាតឲ្យលោកស្រី Sheikh Hasina និយាយឡើយ»។

បង់ក្លាដែស បានកំពុងប្រឈមមុខនឹងជម្លោះនយោបាយ ចាប់តាំងពីលោកស្រី Hasina បានភៀសខ្លួនទៅឥណ្ឌា ក្នុងខែសីហា ដោយរដ្ឋាភិបាលបណ្តោះអាសន្នកំពុងតស៊ូ ដើម្បីរក្សាច្បាប់ និងសណ្តាប់ធ្នាប់ ចំពេលមានការតវ៉ា និងចលាចលបន្ត។

ឥណ្ឌា និងបង់ក្លាដែស ដែលមានព្រំដែនដី និងសមុទ្រប្រវែង ៤ ០០០គីឡូម៉ែត្រ នៅឈូងសមុទ្រ Bengal មានទំនាក់ទំនងវប្បធម៌ និងពាណិជ្ជកម្មជាមួយគ្នាដ៏យូរអង្វែង។

ឥណ្ឌា ក៏បានដើរតួនាទីយ៉ាងសំខាន់នៅក្នុងសង្គ្រាមឆ្នាំ១៩៧១ ជាមួយប៉ាគីស្ថាន ដែលនាំទៅដល់ការបង្កើតប្រទេសបង់ក្លាដែសផងដែរ៕

ដោយ៖ ឈាង