ព័ត៌មានអន្ដរជាតិ

បង់ក្លាដែស ស្នើជាលើកទី៣ ឲ្យ ឥណ្ឌា បញ្ចូនអតីតនាយករដ្ឋមន្ត្រី មកទទួលទោសប្រហារជីវិត

បានផុស

៨ ខែ មុន

នៅ

ថ្ងៃចន្ទ ២៤ វិច្ឆិកា ២០២៥

ដោយ

រដ្ឋាភិបាលបង់ក្លាដែសបាននិយាយកាលពីថ្ងៃអាទិត្យទី២៣ វិច្ឆិកាថា ខ្លួនបានស្នើសុំឲ្យឥណ្ឌាធ្វើបត្យាប័ន (បញ្ចូន) ជាលើកទី៣ ចំពោះអតីតនាយករដ្ឋមន្ត្រី Sheikh Hasina ដែលភៀសខ្លួនទៅក្រុងញូវដេលី ឲ្យមកទទួលទោសប្រហារជីវិត ជុំវិញការបង្ក្រាបដ៏សាហាវកាលពីឆ្នាំមុន ប្រឆាំងនឹងការបះបោរដឹកនាំដោយនិស្សិត។

អតីតនាយករដ្ឋមន្ត្រី Sheikh Hasina ដែលតុលាការកាត់ទោសប្រហារជីវិត កាលពីដើមសប្តាហ៍។ (រូបភាព៖Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ពី Aljazeera លោក Touhid Hossain ដែលកាន់តំណែងក្រសួងការបរទេសនៅក្នុងរដ្ឋបាលបណ្ដោះអាសន្នក្នុងប្រទេសបង់ក្លាដែស បានប្រាប់អ្នកយកព័ត៌មានថា «កាលពីថ្ងៃសុក្រ ពួកយើងបានផ្ញើលិខិតស្នើសុំធ្វើបត្យាប័នលោកស្រី Sheikh Hasina រួចហើយ»។

យ៉ាងណា លោកមិនបានពន្យល់លម្អិតអំពីខ្លឹមសារនៃលិខិតនោះទេ ដោយយោងទៅតាមកាសែតកាសែតបង់ក្លាដែស Prothom Alo នេះគឺជាសំណើធ្វើបត្យាប័នជាផ្លូវការលើកទីបីហើយ ចាប់តាំងពីគាតបាន់រត់គេចទៅប្រទេសឥណ្ឌា ក្រោយការគ្រប់គ្រងផ្តាច់ការរបស់លោកស្រី បានផ្តួលរំលំកាលពីខែសីហា ឆ្នាំ ២០២៤។

បន្ទាប់ពីសេចក្តីសម្រេចរបស់តុលាការនៅថ្ងៃចន្ទ ដោយកាត់ទោសលោកស្រី Hasina ពីបទឧក្រិដ្ឋកម្មប្រឆាំងនឹងមនុស្សជាតិ និងការកាត់ទោសប្រហារជីវិត ក្រសួងការបរទេសនៅទីក្រុងដាកាបាននិយាយនៅក្នុងសេចក្តីថ្លែងការណ៍មួយថា ទីក្រុងដេលីត្រូវមានការទទួលខុសត្រូវជាកាតព្វកិច្ច ក្រោមសន្ធិសញ្ញាទ្វេភាគី ដើម្បីសម្រួលដល់ការវិលត្រឡប់របស់អតីតមេដឹកនាំរូបនេះ។

ជាការឆ្លើយតបទៅវិញ ក្រសួងការបរទេសឥណ្ឌាបានបញ្ចាក់ថា ខ្លួនបានកត់សម្គាល់សាលក្រមមួយនេះ។ ប៉ុន្តែរហូតមកដល់ពេលនេះ ឥណ្ឌាមិនបានធ្វើអត្ថាធិប្បាយដោយផ្ទាល់លើសំណើសុំធ្វើបត្យាប័នចុងក្រោយ ទីក្រុងដាកានោះទេ។

សូមបញ្ចាក់ថា ប្រទេសបង់ក្លាដែសបានស្ថិតក្នុងភាពចលាចលនយោបាយ ចាប់តាំងពីចុងបញ្ចប់នៃការគ្រប់គ្រងរបស់អតីតនាយករដ្ឋមន្ត្រីវ័យ៧៨ឆ្នាំ ហើយអំពើហិង្សាបានធ្វើឲ្យប៉ះពាល់ដល់យុទ្ធនាការឃោសនាបោះឆ្នោតដែលរំពឹងទុកនៅក្នុងខែកុម្ភៈ ឆ្នាំ ២០២៦។

មិនតែប៉ុណ្ណោះ ផ្អែកតាមរបាយការណ៍ពីអង្គការសហប្រជាជាតិនិយាយថា មនុស្សរហូតដល់ ១,៤០០នាក់ត្រូវបានសម្លាប់នៅក្នុងការបង្ក្រាប ខណៈដែលលោកស្រីបានព្យាយាមកាន់អំណាចមិនព្រមលែង។ ជាងនេះទៀត ការគាំទ្រពីឥណ្ឌាចំពោះអតីតនាយករដ្ឋមន្ត្រី Hasina បានធ្វើឲ្យខូចទំនាក់ទំនងរវាងប្រទេសជិតខាងទាំងពីរ ចាប់តាំងពីការផ្តួលរំលំរបស់គាត់ក្នុងឆ្នាំ២០២៤៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖