ហ្សេលេនស្គី នឹងដឹកនាំគណៈប្រតិភូអ៊ុយក្រែន ចូលរួមសន្និសីទសន្តិសុខ នៅអាល្លឺម៉ង់ សប្តាហ៍ក្រោយ

សារព័ត៌មាន AP បានចុះផ្សាយនៅថ្ងៃសុក្រទី៧ខែកុម្ភៈឆ្នាំ២០២៥ថា ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី នឹងដឹកនាំគណៈប្រតិភូទៅចូលរួមសន្និសីទសន្តិសុខទីក្រុងមូនិក នៅប្រទេសអាល្លឺម៉ង់ នាសប្តាហ៍ក្រោយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីអគ្គសេនាធិការអ៊ុយក្រែនលោក Andriy Yermak, គណៈប្រតិភូនៃទីក្រុងកៀវ នឹងយកឱកាសនោះដើម្បីបង្ហាញពីការប្តេជ្ញាចិត្តនិងគោលជំហរលើការបញ្ចប់សង្គ្រាមជាមួយរុស្ស៊ី និងបង្ហាញចក្ខុវិស័យអំពីវិធីនាំមកនូវសន្តិភាពដ៏យូរអង្វែង។

សន្និសីទនេះក៏មានការចូលរួមពីសំណាក់អនុប្រធានាធិបតីអាមេរិកលោក J.D. Vance និងប្រេសិតពិសេសរបស់លោក ដូណាល់ ត្រាំ ទទួលបន្ទុកដោះស្រាយជម្លោះរុស្ស៊ី-អ៊ុយក្រែនលោក Keith Kellogg ផងដែរ ហើយដំបូងឡើយ មានសេចក្តីរាយការណ៍ថា អាមេរិក នឹងបង្ហាញផែនការបញ្ចប់សង្គ្រាមនៅក្នុងសន្និសីទនោះតែម្តង។

យ៉ាងណា លោក Kellogg បានចេញមុខបដិសេធចំពោះសេចក្តីរាយការណ៍នេះរួចហើយ ដោយនិយាយថា លោកចូលរួមមែន ហើយក៏គ្រោងពិភាក្សាជាមួយសម្ព័ន្ធមិត្តរបស់អាមេរិក អំពីការបញ្ចប់សង្គ្រាមបង្ហូរឈាមនៅអ៊ុយក្រែនដែរ ប៉ុន្តែនឹងមិនបង្ហាញផែនការរបស់លោក ត្រាំ អ្វីទេ។ 

សូមជម្រាបថា សន្និសីទនៅទីក្រុងមូនិក គឺជាវេទិកាប្រចាំឆ្នាំរៀបចំឡើងរាល់ខែកុម្ភៈ ដើម្បីពិភាក្សាអំពីសន្តិសុខអន្តរជាតិ ចំពេលសង្រ្គាមរុស្ស៊ី-អ៊ុយក្រែនកំពុងបន្តឆាបឆេះ ខណៈពិភពលោកប្រឈមបញ្ហាផ្សេងទៀតជាច្រើន។

ឆ្នាំនេះ សន្និសីទទីក្រុងមូនិក នឹងដំណើរការចាប់ពី១៤ដល់ថ្ងៃទី១៦ខែកុម្ភៈ ដោយមានការចូលរួមពីសំណាក់ប្រមុខរដ្ឋ រដ្ឋមន្ត្រី អ្នកការទូត មន្ត្រីយោធា នាយកប្រតិបត្តិ អង្គការក្រៅរដ្ឋាភិបាល និងបញ្ញវន្តមកពីជុំវិញពិភពលោក៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី ពិបាកចិត្ត ថា បើអាមេរិកផ្តាច់ជំនួយមែន អ៊ុយក្រែន មិនដឹងរស់បានឬអត់