ភ្នំភ្លើង​ផ្ទុះ​នៅឥណ្ឌូណេស៊ី ព្រួសពពក​ផេះ​កម្ពស់ ៨ គីឡូម៉ែត្រ រំខាន​ដល់​ជើង​ហោះហើរ​

ភ្នំភ្លើង Lewotobi Laki-Laki នៅភាគអាគ្នេយ៍នៃកោះ Flores ប្រទេសឥណ្ឌូណេស៊ី បាន​ផ្ទុះ ដោយ​បញ្ចេញ​ពពកផេះ​កម្ពស់​ជាង ៨គីឡូម៉ែត្រទៅលើអាកាសរំខានដល់ជើងហោះហើរ និងបង្កើនការព្រមានអំពីគ្រោះថ្នាក់ដល់កម្រិតខ្ពស់បំផុតសម្រាប់អ្នករស់នៅក្បែរ និងភ្ញៀវទេសចរ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២១ខែមីនានេះ។

មជ្ឈមណ្ឌលសម្រាប់ការកាត់បន្ថយគ្រោះមហន្តរាយភ្នំភ្លើង និងភូគព្ភសាស្ត្ររបស់ប្រទេសឥណ្ឌូណេស៊ី បានព្រមានអ្នកស្រុក និងភ្ញៀវទេសចរនៅថ្ងៃសុក្រនេះ កុំឲ្យធ្វើសកម្មភាពក្នុងរង្វង់​​ចម្ងាយ ៧​ទៅ​៨គីឡូម៉េត្រ នៅក្នុងផ្នែកភាគនិរតី និងភាគឦសាននៃភ្នំភ្លើង Lewotobi Laki-Laki។

ភ្នំភ្លើងនេះបានចាប់ផ្តើមផ្ទុះនៅម៉ោង ១០:៥៦នាទីយប់ថ្ងៃព្រហស្បតិ៍(ម៉ោងក្នុងស្រុក) និង​ព្រួស​ពពកផេះយ៉ាងក្រាស់ទៅលើមេឃ។ មិនមានរបាយការណ៍ភ្លាមៗអំពីការខូចខាតដល់ភូមិនៅក្បែរនោះទេ ប៉ុន្តែអាជ្ញាធរបានព្រមានអ្នកស្រុកអំពីលំហូរភក់ភ្នំភ្លើង ប្រសិនបើមានភ្លៀងធ្លាក់ខ្លាំង។ ការផ្ទុះដ៏យូរនេះក៏បានជំរុញឱ្យទីភ្នាក់ងារ​ភូគព្ភសាស្ត្ររបស់ប្រទេសនេះ បង្កើនកម្រិតប្រកាសអាសន្នរបស់ភ្នំភ្លើងដល់កម្រិតខ្ពស់បំផុតផងដែរ។

ដោយសារផេះភ្នំភ្លើងដ៏ច្រើននេះ Jetstar ដែលជាក្រុមហ៊ុនបុត្រសម្ព័ន្ធរបស់ Qantas Airways របស់អូស្ត្រាលី បានលុបចោលជើងហោះហើរពីអូស្ត្រាលីទៅកាន់កោះបាលីរបស់ឥណ្ឌូណេស៊ី សរុបមាន​ជើងហោះហើរអន្តរជាតិចំនួនប្រាំពីរត្រូវបានលុបចោល និងពន្យារពេលនៅ​ព្រឹកថ្ងៃសុក្រនេះ។

គួរបញ្ជាក់ថា Lewotobi គឺជាភ្នំភ្លើងភ្លោះដែលមានទីតាំងនៅភាគអាគ្នេយ៍នៃកោះ Flores ប្រទេសឥណ្ឌូណេស៊ី។ វាមានកំពូលពីរគឺ Lewotobi Laki-laki (ឈ្មោល) និង Lewotobi Perempuan (ញី)។ ភ្នំភ្លើងLewotobi Laki-laki សកម្មជាង Lewotobi Perempuan ដោយ Lewotobi Laki-laki ​ធ្លាប់​បាន​ផ្ទុះ​កាលពី​ខែវិច្ឆិកា​ឆ្នាំមុន ​សម្លាប់​មនុស្ស​យ៉ាងតិច​១០​នាក់ និង​រាប់ពាន់​នាក់​ត្រូវជម្លៀសចេញ៕

អត្ថបទ៖ ប៊ុន សុភាព