មន្ត្រីកំពូលអាមេរិក២រូប ដកខ្លួនពីកិច្ចប្រជុំអ៊ុយក្រែន នៅទីក្រុងឡុងដ៍

យោងតាមប្រភពពីសារព័ត៌មាន Financial Times បានឲ្យដឹងកាលពីថ្ងៃអង្គារទី២២ខែមេសាឆ្នាំ២០២៥ថា មន្ត្រីកំពូលអាមេរិក២រូបគឺ រដ្ឋមន្ត្រីការបរទេស Marco Rubio និងប្រេសិតលោក ដូណាល់ ត្រាំ គឺលោក Steve Witkoff នឹងដកខ្លួន ដោយមិនធ្វើដំណើរទៅទីក្រុងឡុងដ៍នៃចក្រភពអង់គ្លេស ដើម្បីចូលរួមក្នុងកិច្ចប្រជុំមេដឹកនាំអឺរ៉ុប ដើម្បីរកវិធីបញ្ចប់សង្គ្រាមរវាងទីក្រុងកៀវនិងមូស្គូឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ហេតុផលនៃអវត្តមានរបស់លោក Rubio ត្រូវបានអ្នកនាំពាក្យក្រសួងការបរទេសអាមេរិក Tammy Bruce បញ្ជាក់ថា គឺដោយសារលោក Rubio មានកាលវិភាគដ៏មមាញឹកទើបមិនអាចមានពេលគ្រប់គ្រាន់ដើម្បីចូលរួមក្នុងជំនួបកំពូលនោះបាន ប៉ុន្តែយ៉ាងណា សហរដ្ឋអាមេរិកនៅតែប្តេជ្ញាចិត្តចំពោះដំណោះស្រាយសន្តិភាពនៃសង្គ្រាមរុស្ស៊ី-អ៊ុយក្រែន ដោយឥតងាករេ។

ចំណែកលោក Witkoff វិញ, បើតាមប្រភពពីរដ្ឋាភិបាលអាមេរិក ប្រេសិតរូបនេះ ក៏មិនអាចចូលរួមកិច្ចប្រជុំនៅទីក្រុងឡុងដ៍បានដែរ ហើយទំនងជាធ្វើទស្សនកិច្ចកិច្ចនៅទីក្រុងមូស្គូ ជំនួសវិញ។

ទោះបែបនេះ សហរដ្ឋអាមេរិក បានចាត់តាំងលោក Keith Kellogg ដែលជាប្រេសិតម្នាក់ទៀតរបស់លោកត្រាំ មានតួនាទីចរចាដោយផ្ទាល់ជាមួយទីក្រុងកៀវ ឲ្យទៅចូលរួមក្នុងកិច្ចប្រជុំនោះជំនួស។

សូមជម្រាបជាថ្មីថា ជំនួបកំពូលនៅចក្រភពអង់គ្លេសថ្ងៃពុធនេះ គឺជាកិច្ចប្រជុំបន្តពីសប្តាហ៍មុនដែលធ្វើឡើងក្នុងទីក្រុងប៉ារីសនៃប្រទេសបារាំង ដែលមានគោលបំណងរិះរកមធ្យោបាយដើម្បីនាំសន្តិភាពជូនរុស្ស៊ីនិងអ៊ុយក្រែន ប៉ុន្តែត្រូវជាប់គាំង ដោយមិនទទួលបានផ្លែផ្កាអ្វីទេ។

ជំនួបលើកនេះ នឹងមានការចូលរួមពីសំណាក់មន្ត្រីកំពូលៗមកពីប្រទេសអឺរ៉ុបជាច្រើនរួមទាំងចក្រភពអង់គ្លេស បារាំង និងអាល្លឺម៉ង់ផងដែរ។

ប្រទេសទាំងនេះ ត្រូវបានគេដឹងថា សុទ្ធសឹងជាខ្នងបង្អែកដែលមិនអាចខ្វះបានរបស់អ៊ុយក្រែន នៅក្នុងសង្គ្រាមជាមួយរុស្ស៊ី ហើយតែងជួយទីក្រុងកៀវ ផ្នែកយោធាកាន់តែខ្លាំងឡើងៗ ចាប់តាំងពីលោក ដូណាល់ ត្រាំ ចូលកាន់តំណែងជាប្រធានាធិបតីអាមេរិកអាណត្តិទី២ ដែលដាក់សម្ពាធខ្លាំងនិងដកជំនួយពីលោក វ្ល៉ាឌីមៀរ ហ្សេលេនស្គី៕ 

អត្ថបទ៖ សុខ សុវណ្ណ

ចុចអាន៖ ហ្សេលេនស្គី៖ អ៊ុយក្រែន នឹងធ្វើ​កិច្ចពិភាក្សា​សន្តិភាព​ជាមួយ​ប្រទេស​ចំនួន​បី