អំពើ​បាញ់ប្រហារ​​កើតឡើង​ជាថ្មី​នៅ​ស៊ុយអែត បណ្តាល​ឲ្យ​មនុស្ស​៣នាក់ស្លាប់​

យ៉ាងហោចណាស់មនុស្ស៣នាក់ បានស្លាប់នៅក្នុងការបាញ់ប្រហារដោយជនមិនស្គាល់អត្តសញ្ញាណនៅក្នុងទីក្រុង Uppsala ប្រទេសស៊ុយអែត​​​ភាគ​ខាងជើង​​នៃ​​ទ្វីប​អឺរ៉ុប​​។ នេះបើយោងតាមការចេញផ្សាយរបស់សារព័ត៌មាន​ BBC នៅថ្ងៃទី៣០ខែមេសានេះ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា ការបាញ់ប្រហារនេះបានកើតឡើងនៅក្នុងហាងកាត់សក់មួយនៅជិតទីលាន Vaksala​ ដ៏​ពេញ​និយម​ នៅកណ្តាលទីក្រុង Uppsala ដែលកំពុងមានមនុស្សអ៊ូអរច្រើននៅទីនោះព្រោះជិតដល់ថ្ងៃពិធីបុណ្យនិទាឃរដូវ Walpurgis។

បើតាមសេចក្តីរាយការណ៍ ខ្មាន់កាំភ្លើងបានរត់គេចខ្លួនដោយ​​ប្រើម៉ូតូ ធ្វើឲ្យប៉ូលិសបិទតំបន់ដ៏ធំមួយនិងប្រើ​ឧទ្ធម្ភាគចក្រចូលរួមក្នុងការស្វែងរកអ្នកបាញ់ប្រហារ។ ចំពោះមូលហេតុនៃការបាញ់ប្រហារមិនត្រូវ​បាន​ដឹងនៅឡើយ ហើយការស៊ើបអង្កេតឃាតកម្មកំពុងដំណើរការ។

ទោះអត្តសញ្ញាណជនរងគ្រោះ និងអ្នកបាញ់ប្រហារ នៅមិនទាន់ដឹងច្បាស់នៅឡើយ ប៉ុន្តែមានការព្រួយបារម្ភកាន់តែខ្លាំងឡើងចំពោះចំនួននៃការបាញ់ប្រហារ និងការវាយប្រហាររបស់ក្រុមអ្នកលេងដោយកាំភ្លើង ដែលជំរុញឲ្យរដ្ឋាភិបាលប្រទេសស៊ុយអែតក្នុងប៉ុន្មានឆ្នាំថ្មីៗចង់រឹតបន្តឹងច្បាប់កាំភ្លើងរបស់ប្រទេស។

កាល​ពី​ខែ​កុម្ភៈឆ្នាំនេះ មនុស្ស​១០​នាក់​ត្រូវ​ក៏បាន​សម្លាប់​ក្នុង​ការ​បាញ់​ប្រហារ​នៅ​មជ្ឈមណ្ឌល​អប់រំ​មនុស្ស​ពេញ​វ័យមួយ​ក្នុង​ក្រុង Orebro ប្រទេស​ស៊ុយអែត៕

អត្ថបទ៖ ប៊ុន សុភាព