ព័ត៌មានអន្ដរជាតិ

លោក ត្រាំ ប្រកាសបង្កើតបុណ្យជាតិ២ថ្ងៃថែមទៀត តែមិនឲ្យពលរដ្ឋឈប់សម្រាក

បានផុស

៤ សប្តាហ៍ មុន

នៅ

ថ្ងៃអង្គារ ៦ ឧសភា ២០២៥

ដោយ

Chheang

ប្រធានាធិបតីអាមេរិក លោក ដូណាល់ ត្រាំ បានប្រកាសបង្កើតថ្ងៃបុណ្យជាតិថ្មីចំនួនពីរ ដើម្បីរំលឹកដល់ជ័យជម្នះរបស់អាមេរិកក្នុងសង្គ្រាមលោកលើកទី១ និងសង្គ្រាមលោកលើកទី២ តែទោះជាបែបនេះក្ដី ពលរដ្ឋមិនអាចឈប់សម្រាកបានទេ ពោលគឺនៅធ្វើការដូចថ្ងៃធម្មតាអ៊ីចឹង។ នេះបើយោងតាមការប្រកាសនៅលើបណ្ដាញសង្គម Truth Social របស់លោក ដូណាល់ ត្រាំ នាថ្ងៃអង្គារទី៦ខែឧសភាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្ងៃទី៨ខែឧសភា នឹងត្រូវបានទទួលស្គាល់ថាជាទិវាជ័យជម្នះសម្រាប់សង្គ្រាមលោកលើកទី២ ហើយថ្ងៃទី១១ខែវិច្ឆិកា ជាទិវាជ័យជម្នះសម្រាប់សង្គ្រាមលោកលើកទី១។ ទោះបីជាមានការចាត់តាំងទាំងនេះក៏ដោយ លោក ត្រាំ បានបញ្ជាក់ថា អាជីវកម្មនិងប្រតិបត្តិការរបស់រដ្ឋាភិបាលនឹងនៅតែបើកដំណើរការដូចធម្មតានៅថ្ងៃទាំងនោះ ដោយលើកឡើងថា អាមេរិកមានថ្ងៃឈប់សម្រាកច្រើនណាស់រួចទៅហើយ។

មេដឹកនាំអាមេរិក បានសរសេរសារថា៖ «យើងនឹងមិនបិទប្រទេសសម្រាប់ថ្ងៃឈប់សម្រាកដ៏សំខាន់ទាំងពីរនេះទេ – ថ្ងៃទី១១វិច្ឆិកា និង៨ឧសភា សង្គ្រាមលោកលើកទី១ និងសង្រ្គាមលោកលើកទីពីរ ពីព្រោះយើងមានថ្ងៃឈប់សម្រាកច្រើនពេកនៅអាមេរិក មិនមានថ្ងៃគ្រប់គ្រាន់សេសសល់ទេនៅក្នុងមួយឆ្នាំៗ»។

លោក ត្រាំ បានសង្កត់ធ្ងន់លើតម្រូវការ ដើម្បីគោរពការរួមចំណែករបស់អាមេរិកចំពោះជ័យជម្នះរបស់សម្ព័ន្ធមិត្ត ដោយកត់សម្គាល់ថា ខណៈពេលដែលប្រទេសផ្សេងទៀតប្រារព្ធព្រឹត្តិការណ៍ទាំងនេះ សហរដ្ឋអាមេរិកមិនបានធ្វើវាទេ។ លោកបានអះអាងថា អាមេរិកបានដើរតួនាទីយ៉ាងសំខាន់ក្នុងការសម្រេចបាននូវជ័យជម្នះ និងសមនឹងទទួលបានការទទួលស្គាល់ចំពោះកិច្ចខិតខំប្រឹងប្រែងរបស់ខ្លួន។

លោក ត្រាំ បានរៀបរាប់ថា៖ «ជ័យជម្នះអាចសម្រេចបានដោយសារតែយើង។ បើគ្មានសហរដ្ឋអាមេរិកទេ សង្រ្គាមនឹងត្រូវបានឈ្នះដោយប្រទេសផ្សេងទៀត ហើយពិភពលោកនឹងទៅផ្លាស់ប្ដូរទៅជាផ្សេងខុសពីពេលនេះ»៕

ដោយ៖ ឈាង