WHO ជំរុញប្រទេសអ្នកមានបរិច្ចាគវ៉ាក់សាំង ១០ លានដូសជាបន្ទាន់ដល់ប្រទេសក្រីក្រ

អង្គការសុខភាពពិភពលោក (WHO) កាលពីថ្ងៃសុក្របានជំរុញឲ្យមានការបរិច្ចាគភ្លាមៗនូវវ៉ាក់សាំងការពារជំងឺកូវីដ ១៩ ចំនួន ១០ លានដល់ប្រទេសក្រីក្រចំនួន ២០ នៅលើពិភពលោកដើម្បីធានាបាននូវការចែកចាយវ៉ាក់សាំងដោយស្មើភាពគ្នានៅទូទាំងពិភពលោក ។

លោក Tedros Adhanom Ghebreyesus អគ្គនាយកអង្គការសុខភាពពិភពលោកបានថ្លែងក្នុងសន្និសីទសារព័ត៌មានតាមអ៊ីនធឺណិតក្នុងទីក្រុងហ្សឺណែវថា ការកើនឡើងនៃតម្រូវការវ៉ាក់សាំងការពារជំងឺកូវីដ ១៩ បានបណ្តាលឲ្យមានការពន្យារពេល ។

លោក Tedros បានសង្កត់ធ្ងន់ថា ជិតមួយភាគបួននៃឆ្នាំនេះ ប្រទេសចំនួន ៣៦ នៅតែរង់ចាំទទួលដូសនៃវ៉ាក់សាំងដើម្បីចាប់ផ្តើមចាក់ដល់ប្រជាជនរបស់ពួកគេ ។

ក្នុងចំណោមនោះប្រទេសចំនួន ១៦ ត្រូវបានគ្រោងនឹងទទួលដូសដំបូងរបស់ពួកគេពីគម្រោង COVAX ក្នុងរយៈពេល ១៥ ថ្ងៃទៀត ខណៈដែលប្រទេសចំនួន ២០ ទៀតនៅតែរង់ចាំការចាក់វ៉ាក់សាំងដដែរ ។

លោក Tedros បាននិយាយថា “ប៉ុន្តែការធ្វើឲ្យប្រទេសទាំងអស់ទទួលបានវ៉ាក់សាំងដែលចាប់ផ្តើមនៅរយៈពេល ១០០ ថ្ងៃគឺជាបញ្ហាមួយដែលអាចដោះស្រាយបាន ។ គម្រោង COVAX ត្រូវការវ៉ាក់សាំង ១០ លានដូសភ្លាមៗជាវិធានការណ៍បញ្ឈប់បន្ទាន់ ដូច្នេះប្រទេសទាំង ២០ នេះអាចចាប់ផ្តើមចាក់វ៉ាក់សាំងដល់បុគ្គលិកសុខាភិបាល និងមនុស្សវ័យចំណាស់របស់ពួកគេក្នុងរយៈពេលពីរសប្តាហ៍ខាងមុខនេះ” ។

លោកអគ្គនាយកបានបន្ថែមថា “ដូច្នេះខ្ញុំស្នើប្រទេសដែលមានវ៉ាក់សាំងការពារជំងឺកូវីដ ១៩ ដែលមានក្នុងបញ្ជីប្រើប្រាស់បន្ទាន់របស់អង្គការសុខភាពពិភពលោកដើម្បីបរិច្ចាគដូសឲ្យច្រើនតាមដែលអាចធ្វើបានដើម្បីជួយយើងឲ្យសម្រេចគោលដៅនោះ”  ។

ទន្ទឹមនោះលោក Tedros ក៏បានស្នើសុំឲ្យក្រុមហ៊ុនផលិតបង្កើនផលិតកម្មរបស់ពួកគេដូច្នេះវ៉ាក់សាំងបន្ថែមអាចត្រូវបានបរិច្ចាគទៅប្រទេសក្រីក្រ ហើយលោកបានរិះគន់ដល់កិច្ចព្រមព្រៀងឯកជនជាច្រើន ដែលធ្វើឲ្យក្រុមហ៊ុនផលិតឱសថផ្ដល់វ៉ាក់សាំងតិចតួចប៉ុណ្ណោះសម្រាប់ប្រទេសកំពុងអភិវឌ្ឍន៍ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ WHO ថា ជំងឺកូវីដ ១៩ បំប្លែងខ្លួនថ្មីកំពុងជំនួសវីរុសប្រភេទដើម

ចុចអាន ៖ WHO ជំរុញប្រទេសនានាត្រូវរាយការណ៍ពីជំងឺកូវីដ ១៩ បំប្លែងខ្លួនថ្មីជាដាច់ខាត