UN នឹងបោះឆ្នោតលើបទឈប់បាញ់នៅហ្គាហ្សា ដោះលែងចំណាប់ខ្មាំង និងជំនួយមនុស្សធម៌

មហាសន្និបាតអង្គការសហប្រជាជាតិ គ្រោងនឹងបោះឆ្នោតនៅថ្ងៃព្រហស្បតិ៍នេះ លើដំណោះស្រាយដែលទាមទារឱ្យមានបទឈប់បាញ់ជាបន្ទាន់នៅក្នុងតំបន់ហ្គាហ្សា ការដោះលែងចំណាប់ខ្មាំងទាំងអស់ដែលឃុំខ្លួនដោយក្រុមហាម៉ាស និងការទទួលបានជំនួយមនុស្សធម៌ដែលមិនមានការរឹតបន្តឹងតាមរយៈច្រកព្រំដែន​ឆ្លង​កាត់​អ៊ីស្រាអែល។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១២ខែមិថុនានេះ។

មិនដូចក្រុមប្រឹក្សាសន្តិសុខអង្គការសហប្រជាជាតិ ដែលថ្មីៗនេះ សហរដ្ឋអាមេរិកបានរារាំងដំណោះស្រាយបទឈប់បាញ់នៅតំបន់ហ្គាហ្សា មហាសន្និបាតអង្គការសហប្រជាជាតិមិនមានសិទ្ធិវេតូ​ពី​ប្រទេសណា​នោះទេ។ ដំណោះស្រាយថ្មីនេះ​ត្រូវបានគេរំពឹងថា នឹងទទួលបានការគាំទ្រខ្លាំង ប៉ុន្តែវានឹងមិនចាប់​បង្ខំ​ឲ្យ​​អនុវត្ត​​ពី​ប្រទេសដែលពាក់​ព័ន្ធ​នោះទេ​​​។

ដំណោះស្រាយនេះក៏សំដៅលើសេចក្តីសម្រេចក្នុងខែមីនាពីតុលាការយុត្តិធម៌អន្តរជាតិដែលបានប្រាប់អ៊ីស្រាអែលឱ្យបើកច្រកព្រំដែនបន្ថែមទៀតដើម្បីផ្តល់ជំនួយ។ ដំណោះស្រាយនេះរំលឹកអ៊ីស្រាអែលថា នៅក្រោមច្បាប់អន្តរជាតិ ត្រូវតែអនុញ្ញាត​ឱ្យអាហារ និងជំនួយផ្សេងទៀតទៅដល់ប្រជាជននៅតំបន់ហ្គាហ្សា។

ដំណោះស្រាយនេះគាំទ្រដំណោះស្រាយរដ្ឋពីរ និងការចរចាសន្តិភាពដែលកំពុងបន្តដឹកនាំដោយអេហ្ស៊ីប កាតា និងសហរដ្ឋអាមេរិក ទោះជាយ៉ាងណាក៏ដោយ អ្នករិះគន់ខ្លះនិយាយថា ដំណោះស្រាយនេះមិនបាននិយាយអំពីការវាយប្រហាររបស់ពួកហាម៉ាសលើអ៊ីស្រាអែលនៅថ្ងៃទី ៧ ខែតុលា ឬទាមទារឱ្យក្រុមហាម៉ាស់​​បញ្ជប់​ការ​ប្រើប្រាស់​អាវុធ ដែលជាចំណុចសំខាន់ពីរដែលសហរដ្ឋអាមេរិកជឿថាមានសារៈសំខាន់។

ការវាយប្រហារ​​របស់​ក្រុមហាម៉ាស​នាពេលនោះបានសម្លាប់មនុស្ស ១២០០នាក់ ខណៈដែលជនជាតិប៉ាឡេស្ទីនជាង ៥៥០០០ នាក់ត្រូវ​បានស្លាប់នៅក្នុងការវាយប្រហារសងសឹក​របស់​យោធារបស់អ៊ីស្រាអែល។ នេះបើយោងតាមក្រសួងសុខាភិបាលរបស់ហ្គាហ្សា៕

អត្ថបទ៖ ប៊ុន សុភាព