វាយអ៊ីរ៉ង់រួច អ៊ីស្រាអែលប្រកាសដាក់ប្រទេសក្នុងគ្រាអាសន្ន ខណៈតម្លៃប្រេងសកល ហក់ឡើង

រដ្ឋមន្ត្រីការពារជាតិអ៊ីស្រាអែល លោក Israel Katz បានប្រកាសដាក់ប្រទេសក្នុងគ្រាអាសន្ន បន្ទាប់ពីវាយអ៊ីរ៉ង់ ព្រោះថា ច្បាស់ណាស់នឹងមានការសឹងសឹកវិញក្នុងរយៈពេលដ៏ខ្លីខាងមុខ ខណៈសកម្មភាពនេះ បានរុញតម្លៃប្រេងសកលឲ្យហក់ឡើងខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានសេចក្តីរាយការណ៍អំពីការផ្ទុះនៅទូទាំងទីក្រុងតេហេរ៉ង់ ហើយប្រភពពីអ៊ីស្រាអែលលើកឡើងថា អ្នកជំនាញនុយក្លេអ៊ែរជាន់ខ្ពស់អ៊ីរ៉ង់ ទំនងត្រូវសម្លាប់ក្នុងការវាយប្រហារនេះ។

តាមការបញ្ជាក់ពីអ្នកនាំពាក្យកងកម្លាំងការពារអ៊ីស្រាអែល (IDF) នៅថ្ងៃសុក្រទី១៣ខែមិថុនាឆ្នាំ២០២៥, ការវាយប្រហារនេះគឺដើម្បីប្រឆាំងកម្មវិធីនុយក្លេអ៊ែររបស់អ៊ីរ៉ង់ និងជាការឆ្លើយតបទៅនឹងភាពគឃ្លើនរបស់រដ្ឋាភិបាលទីក្រុងតេហេរ៉ង់ ដែលបន្តគំរាមកំហែងអ៊ីស្រាអែល។

អ៊ីស្រាអែលបានចេញសេចក្តីថ្លែងការណ៍ថា យន្តហោះចម្បាំងរបស់ខ្លួនរាប់សិបគ្រឿង បានចូលរួមនៅក្នុងការវាយប្រហារដំណាក់កាលដំបូងលើគោលដៅនុយក្លេអ៊ែរនៅតាមតំបន់ផ្សេងក្នុងប្រទេសអ៊ីរ៉ង់។

មន្ត្រីយោធាជាន់ខ្ពស់អ៊ីស្រាអែលម្នាក់ បានប្រាប់ BBC ថា អ៊ីរ៉ង់ មានសម្ភារៈនុយក្លេអ៊ែរគ្រប់គ្រាន់ដើម្បីផលិតគ្រាប់បែកនុយក្លេអ៊ែរ ក្នុងរយៈពេលត្រឹមប៉ុន្មានថ្ងៃទៀតប៉ុណ្ណោះ។

ក្រោយការវាយប្រហារនេះភ្លាមៗ តម្លៃ​ប្រេង​សកល​បាន​ហក់​ឡើង ហើយ​ភាគហ៊ុន​បាន​ធ្លាក់​ចុះ។ ប្រេងឆៅ Brent និង NYMEX បានឡើងថ្លៃ ៨% ពោលគឺឡើងដល់៧៣.៤២ដុល្លារក្នុងមួយបារ៉ែល ខណៈពាណិជ្ជករព្រួយបារម្ភថា ជម្លោះនៅក្នុងតំបន់សម្បូរថាមពលនេះ នឹងរំខានដល់ការផ្គត់ផ្គង់៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល វាយប្រហារអ៊ីរ៉ង់ហើយ! សង្គ្រាមធំអាចផ្ទុះឡើង