រដ្ឋមន្ត្រី​ការពារ​ជាតិ​អ៊ីស្រាអែល ដាក់​កំហិត​ថា​ត្រូវតែ​កម្ចាត់​លោក Khamenei

រដ្ឋមន្ត្រីការពារជាតិអ៊ីស្រាអែល លោក Israel Katz បានចេញសេចក្តីប្រកាសជាសាធារណៈយ៉ាងម៉ឺងម៉ាត់ និងមិនធ្លាប់មានពីមុនមក ដោយបញ្ជាក់ថា មេដឹកនាំកំពូលរបស់អ៊ីរ៉ង់ Ayatollah Ali Khamenei «មិនគួរ​ត្រូវបានអនុញ្ញាត​ឲ្យ​មានវត្តមាន​ត​ទៅ​​​ទៀតទេ»។

ថ្លែងពី​ទីក្រុង Holon កាលពីថ្ងៃព្រហស្បតិ៍​ទី​១៩​មិថុនា លោក Katz បានសង្កត់ធ្ងន់ថា ការបន្តដឹកនាំរបស់លោក Khamenei បង្កការគំរាមកំហែង​ខ្លាំង​ណាស់​ដល់រដ្ឋអ៊ីស្រាអែល។ ប្រមុខ​ការពារ​ជាតិ​​រូប​នេះ បាននិយាយថា «យោធាត្រូវបានណែនាំ និងដឹងថា ដើម្បីសម្រេចបាននូវគោលដៅទាំងអស់របស់ខ្លួន បុរសម្នាក់នេះពិតជាមិនគួរបន្ត​​​មាន​វត្តមាន​​ទៀត​ឡើយ»។ លោក Katz បានចោទប្រកាន់មេដឹកនាំ​កំពូល​អ៊ីរ៉ង់ថា​បាន​បញ្ជាផ្ទាល់​ឲ្យ​វាយប្រហារដោយមីស៊ីលលើគោលដៅជនស៊ីវិល រួមទាំងមន្ទីរពេទ្យ ដោយពណ៌នាទង្វើនេះថាមិនអាចអត់ឱនបាន។

សុន្ទរកថារបស់​លោក Katz ធ្វើ​ឡើង​បន្ទាប់ពីការវាយប្រហារដោយ​មីស៊ីល​របស់​អ៊ីរ៉ង់​លើមន្ទីរពេទ្យ Soroka ក្នុងទីក្រុង Beersheba ដែល​បណ្ដាល​ឲ្យ​មនុស្ស​រងរបួសរាប់សិបនាក់។ លោក Katz បាន​ប្រដូច​លោក Khamenei ទៅ​នឹង​ «Adolf Hitler សម័យថ្មី» ហើយ​​លើក​ឡើង​ថា អ៊ីស្រាអែល​នឹង​មិនស្ទាក់ស្ទើរក្នុងការ​កម្ចាត់​មេដឹកនាំ ដែលបង្កការគំរាមកំហែងដល់​អាយុ​ជីវិត​ប្រជាជន​ខ្លួន​នោះ​ទេ។

សូម​ជម្រាប​ថា Ayatollah Ali Khamenei ដែលជាមេដឹកនាំកំពូលរបស់អ៊ីរ៉ង់ ចាប់តាំងពីឆ្នាំ១៩៨៩ បានដើរតួនាទី​យ៉ាង​សំខាន់​​បំផុត​ ក្នុងការកំណត់​គោល​ជំហរ​នុយក្លេអ៊ែររបស់សាធារណរដ្ឋអ៊ីស្លាម ទាំងមនោគមវិជ្ជា និងប្រតិបត្តិការ។ ទោះ​ប្រធានាធិបតី​​បច្ចុប្បន្ន ឬ​ពីមុនៗ ដូចជា Masoud Pazeshkian, Ebrahim Raisi ឬ Hassan Rouhani បាន​ដឹក​មុខ​ដំណើរការ​​ការ​ទូត​​​ជា​សាធារណៈ​​លើ​កម្មវិធី​នុយក្លេអ៊ែរ​ក៏ពិត​មែន ក៏​​អ្នក​កាន់​ការ​និង​​អំណាច​ធំ​​ចុង​ក្រោយ​គឺ​ជា លោក Khamenei ដដែល។

រាល់​ការ​សម្រេច​ចិត្ត​នុយក្លេអ៊ែរ​​ទាំង​អម្បាលម៉ាន​របស់​អ៊ីរ៉ង់ ​​ត្រូវ​បាន​ធ្វើ​ឡើង​​ក្រោម​ការ​បង្គាប់​បញ្ជា​ពី​​មេដឹកនាំ​កំពូល​តែ​​ម្នាក់​គត់ មិន​ថា​ការ​ចាប់ផ្តើមកិច្ចពិភាក្សា ការកំណត់កិច្ចសហប្រតិបត្តិការជាមួយទីភ្នាក់ងារអន្តរជាតិ ឬការជំរុញការចម្រាញ់សារធាតុអ៊ុយរ៉ាញ៉ូម​នោះ​ទេ៕

ដោយ៖ ឈាង

ចុចអាន៖ ២សប្តាហ៍ទៀតនឹងដឹងច្បាស់ថាតើ អាមេរិក វាយអ៊ីរ៉ង់ឬអត់?