២សប្តាហ៍ទៀតនឹងដឹងច្បាស់ថាតើ អាមេរិក វាយអ៊ីរ៉ង់ឬអត់?

តាមការឲ្យដឹងពីសេតវិមាន ២សប្តាហ៍ទៀត គឺជាពេលដែលប្រធានាធិបតិអាមេរិក ដូណាល់ ត្រាំ ត្រូវសម្រេចថាតើ នឹងវាយអ៊ីរ៉ង់ដែរឬក៏អត់?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យសេតវិមានលោកស្រី Karoline Leavitt បានប្រាប់ទៅអ្នកសារព័ត៌មាននៅថ្ងៃសុក្រទី២០ខែមិថុនាឆ្នាំ២០២៥ថា លោកត្រាំនៅតែបើកចំហចំពោះដំណោះស្រាយតាមផ្នែកការទូត ប៉ុន្តែប្រកាន់ជំហរថា អ៊ីរ៉ង់ មិនអាចផលិតអាវុធនុយក្លេអ៊ែរបានឡើយ។

យ៉ាងណាក្តី លោកស្រីបានដកស្រង់សម្តីប្រធានាធិបតីអាមេរិក ដែលនិយាយថា «ផ្អែកលើការពិតដែលថា នាពេលអនាគតដ៏ខ្លីខាងមុខមានឱកាសច្រើននៃការចរចាជាមួយអ៊ីរ៉ង់ឬក៏គ្មាននោះ ខ្ញុំនឹងធ្វើការសម្រេចចិត្តថាតើត្រូវវាយឬមិនវាយក្នុងរយៈពេលពីរសប្តាហ៍ខាងមុខ»។

ទន្ទឹមនោះដែរ សហរដ្ឋអាមេរិក នៅតែប្រកាន់ខ្ជាប់នៃការប្តេជ្ញាចិត្តរបស់ខ្លួនក្នុងចរចាជាមួយអ៊ីរ៉ង់ ដើម្បីឲ្យប្រទេសមួយនេះ បញ្ចប់កម្មវិធីនុយក្លេអ៊ែររបស់ខ្លួន។

ព័ត៌មានចុងក្រោយនេះ កើតឡើងមួយថ្ងៃបន្ទាប់ពីមន្ត្រីក្នុងរង្វង់រដ្ឋាភិបាលទីក្រុងវ៉ាស៊ីនតោនអះអាងថា លោកត្រាំ បានអនុម័តផែនការវាយអ៊ីរ៉ង់រួចហើយ រង់ចាំតែការសម្រេចចុងក្រោយប៉ុណ្ណោះ។

បន្ទាប់ពីកិច្ចប្រជុំពីសេសនៅក្នុងបន្ទប់ស្ថានការណ៍ លោកត្រាំ បានប្រាប់ទីប្រឹក្សាកំពូលថា លោកយល់ព្រមលើផែនការវាយអ៊ីរ៉ង់ ប៉ុន្តែមិនទាន់អនុវត្តទេ ដោយរង់ចាំមើលសិនថាតើ អ៊ីរ៉ង់មានឆន្ទៈមកពិភាក្សាអំពីការបញ្ចប់កម្មវិធីនុយក្លេអ៊ែររបស់ពួកគេឬក៏អត់៕

អត្ថបទ៖ សុខ សុវណ្ណ

ចុចអាន៖ ត្រាំ អនុម័តផែនការវាយអ៊ីរ៉ង់រួចហើយ រង់ចាំតែការសម្រេចចុងក្រោយប៉ុណ្ណោះ