ព័ត៌មានអន្ដរជាតិ

ទឹកជំនន់ធ្ងន់ធ្ងរកំពុងវាយប្រហារខេត្តភាគខាងជើងប្រទេសថៃ

បានផុស

១២ ខែ មុន

នៅ

ថ្ងៃសៅរ៍ ១២ កក្កដា ២០២៥

ដោយ

យោងតាមការចេញផ្សាយរបស់កាសែត Bangkok Post នៅថ្ងៃទី១២ ខែ កក្កដានេះ ភ្លៀងធ្លាក់ខ្លាំងពេញមួយយប់បានបង្កឲ្យមានទឹកជំនន់ធ្ងន់ធ្ងររាលដាលពាសពេញភាគខាងជើងប្រទេសថៃ ដោយខេត្ត Phrae រងការខូចខាតច្រើនជាងគេ។

ទឹកជំនន់ក្នុងខេត្ត Chiang Rai (រូបភាព៖ Bangkok Post)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីមិនទាន់មានរបាយការណ៍អំពីអ្នកស្លាប់និងរបួស ទឹកជំនន់បានហូរកាត់ព្រៃ លិចផ្ទះ និងដីស្រែចម្ការនៅខេត្តជាច្រើន បង្កភាពវឹកវរដល់អ្នកស្រុក ខណៈអ្នកស្រុកខ្លះត្រូវជម្លៀសចេញ។

នៅក្នុងខេត្ត Phrae ទឹកជំនន់បានជន់លិចខ្លាំងក្នុងស្រុក Rong Kwang ខណៈដែលខេត្ត Chiang Rai ទឹកបានជន់លិចភូមិចំនួនប្រាំបីនៅ Doi Lan ។ ទឹកជំនន់យ៉ាងគំហុកក៏បានវាយប្រហារទៅលើផ្ទះជាង១២០ ខ្នងនៅក្នុងស្រុក Wiang Sa ខេត្ត Nan ដែលអ្នកស្រុកថាជាគ្រោះមហន្តរាយខ្លាំងបំផុតក្នុងរយៈពេលជាច្រើនឆ្នាំមិនធ្លាប់មាន។ លើសពីនេះឧទ្យានជាតិ Mae Charim ក្នុងខេត្ត Nan ត្រូវបានបិទជាបណ្តោះអាសន្ន ដោយផ្លូវថ្នល់ខូច និងមានបំណាក់ដី។

ក្រុមសង្គ្រោះសម្អាតកម្ទេចកម្ទីចេញពីទឹកជំនន់។ (រូបភាព៖ The Nation)

ខេត្តដែលរងផលប៉ះពាល់ផ្សេងទៀតរួមមានខេត្ត Uttaradit នាំឲ្យមានការជម្លៀសនៅស្រុក Ban Khok និង Fak Tha។ ចំណែកនៅខេត្ត Mae Hong Son ក៏មានខ្យល់បក់ខ្លាំងបាក់ដើមឈើ រលំបង្គោលភ្លើង និងដាច់ចរន្តអគ្គិសនីផងដែរ។

នាយកដ្ឋានឧតុនិយមថៃបានព្រមានថានឹងមានភ្លៀងធ្លាក់ខ្លាំងរហូតដល់ថ្ងៃអាទិត្យ នៅក្នុងខេត្តភាគខាងជើង និងភាគឦសានជាច្រើន ដោយបានជំរុញឱ្យប្រជាពលរដ្ឋមានការប្រុងប្រយ័ត្ន ខណៈដែលមន្ត្រីនៅតែបន្តប្រតិបត្តិការជួយសង្គ្រោះ ៕