ព័ត៌មានអន្ដរជាតិ

អ៊ីស្រាអែល និងស៊ីរី ឈានដល់បទឈប់បាញ់ ខណៈអំពើហិង្សាបានធូរស្រាលនៅ Sweida

បានផុស

៤១ វិនាទី មុន

នៅ

ថ្ងៃសៅរ៍ ១៩ កក្កដា ២០២៥

ដោយ

Chheang

អ៊ីស្រាអែល និងស៊ីរី បានឈានដល់កិច្ចព្រមព្រៀងឈប់បាញ់បណ្ដោះអាសន្នរយៈពេល៤៨ម៉ោង មួយសប្តាហ៍បន្ទាប់ពីការប្រយុទ្ធគ្នាយ៉ាងសាហាវនៅក្នុងខេត្ត Sweida ភាគខាងត្បូងនៃប្រទេសស៊ីរី ដែលជាកន្លែងរស់នៅរបស់ក្រុមជនជាតិភាគតិច Druze។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចព្រមព្រៀងដែលបានសម្របសម្រួលដោយសហរដ្ឋអាមេរិក តួកគី និងហ្សកដានី បានទប់ស្កាត់ការចល័តទាហានស៊ីរីចូលទៅកាន់ខេត្ត Sweida ដើម្បីរក្សាស្ថិរភាពស្ថានការណ៍ និងដោះស្រាយវិបត្តិមនុស្សធម៌។

ក្នុងរយៈពេលមួយសប្តាហ៍កន្លងមក ការប៉ះទង្គិចគ្នាយ៉ាងខ្លាំងក្លារវាងកងកម្លាំងការពារក្នុងស្រុក Druze និងកងជីវពល Bedouin ដែលគាំទ្រដោយរដ្ឋាភិបាលស៊ីរី បានបណ្តាលឲ្យមនុស្សជាង ៣០០នាក់ស្លាប់ និងបង្ខំមនុស្សរាប់ម៉ឺននាក់ឲ្យភៀសខ្លួនចេញពីផ្ទះរបស់ពួកគេ។ ទន្ទឹមនឹងការប្រយុទ្ធគ្នានោះ ប្រទេសអ៊ីស្រាអែលបានបើកការវាយប្រហារតាមអាកាសដ៏គួរឲ្យភ្ញាក់ផ្អើលមួយលើគោលដៅយោធាស៊ីរី នៅក្នុងនិងជុំវិញរដ្ឋធានីដាម៉ាស ដោយអះអាងថា ខ្លួនធ្វើដើម្បីការពារប្រជាជន Druze ដែលរស់នៅលើព្រំដែនរវាងប្រទេសទាំងពីរ។

ទោះបីជាមានបទឈប់បាញ់ក៏ដោយ ស្ថានការណ៍នៅខេត្ត Sweida នៅតែមិនមានស្ថិរភាព។ យោងតាមរបាយការណ៍ក្នុងស្រុក យុទ្ធជន Bedouin កាន់តែច្រើន កំពុងប្រមូលផ្ដុំគ្នា ដោយបង្កើនការភ័យខ្លាចនៃអំពើហិង្សាជាថ្មីនៅពេលដែលបទឈប់បាញ់ ៤៨ម៉ោងត្រូវបានបញ្ចប់។

អ្នកស្រុកនៅ Sweida បានរៀបរាប់ពីការខ្វះខាតអគ្គិសនី ទឹក អាហារ និងការទំនាក់ទំនង។ ភូមិមួយចំនួន ត្រូវបានគេរាយការណ៍ថាពុំទទួលបានសេវាមូលដ្ឋានអស់រយៈពេលជាច្រើនថ្ងៃមកហើយ។

ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយថា ខ្លួនបានទទួលរបាយការណ៍នៃការប្រហារជីវិត ការចាប់ពង្រត់ និងការរំលោភបំពានផ្សេងទៀត ក្នុងអំឡុងពេលប្រយុទ្ធគ្នានៅ Sweida។ អង្គការមនុស្សធម៌កំពុងអំពាវនាវឲ្យមានការចូលរួមជាបន្ទាន់ ដើម្បីផ្តល់ជំនួយដល់ជនស៊ីវិលដែលត្រូវផ្លាស់ទីលំនៅរហូតដល់ ៨០ ០០០នាក់៕

ដោយ៖ ឈាង

ចុចអាន៖ ប្រធានាធិបតីស៊ីរី ចោទអ៊ីស្រាអែលថាព្យាយាមអូសទាញខ្លួនឲ្យចូលក្នុងសង្គ្រាម