ឥណ្ឌូណេស៊ី នឹងបើកដំណើរការតាក់ស៊ី​លើ​ទឹកនៅបាលី ដើម្បីសម្រួលការកកស្ទះចរាចរណ៍

ដើម្បីដោះស្រាយការកកស្ទះចរាចរណ៍កាន់តែអាក្រក់ ប្រទេសឥណ្ឌូណេស៊ីគ្រោងនឹងណែនាំសេវាកម្មតាក់ស៊ី​លើ​ទឹកនៅកោះបាលី ដែលជាគោលដៅទេសចរណ៍កំពូលមួយរបស់អាស៊ីអាគ្នេយ៍។

លោក Lollan Andy Sutomo Panjaitan អគ្គលេខាធិការនៃអគ្គនាយកដ្ឋានដឹកជញ្ជូនផ្លូវសមុទ្រ បាននិយាយ​កាល​ពី​ថ្ងៃ​អង្គារ​ទី​៥​ខែ​សីហា​ឆ្នាំ​២០២៥​ថា សេវាកម្ម​នេះមានគោលបំណងផ្តល់ជម្រើសដឹកជញ្ជូនថ្មី សម្រាប់ភ្ញៀវទេសចរ និងប្រជាជនក្នុងតំបន់ ជាពិសេសលើផ្លូវដែលមមាញឹកដូចជាផ្លូវតភ្ជាប់អាកាសយានដ្ឋានអន្តរជាតិ Ngurah Rai ទៅកាន់តំបន់ពេញនិយមដូចជា Canggu ជាដើម។

លោក Panjaitan បានរៀបរាប់​ថា «តាក់ស៊ី​លើ​ទឹក នឹងជួយកាត់បន្ថយការកកស្ទះចរាចរណ៍ ដោយអនុញ្ញាត​ឲ្យ​អ្នកដំណើរធ្វើដំណើរដោយផ្ទាល់ពីអាកាសយានដ្ឋានទៅកាន់គោលដៅសំខាន់ៗដោយមិនជាប់គាំងនៅលើផ្លូវ»។

បច្ចុប្បន្នអាជ្ញាធរកំពុងធ្វើការសិក្សាអំពីលទ្ធភាព រួមទាំងការវាយតម្លៃបច្ចេកទេស និងការត្រួតពិនិត្យបរិស្ថាន ដើម្បីធានាថា គម្រោងនេះស្របទៅនឹងតម្រូវការហេដ្ឋារចនាសម្ព័ន្ធ និងតម្លៃវប្បធម៌របស់កោះបាលី។ ផែនការនេះ គឺជាផ្នែកមួយនៃកិច្ចខិតខំប្រឹងប្រែងយ៉ាងទូលំទូលាយ ក្នុងការធ្វើ​ឲ្យ​ប្រសើរឡើងនូវប្រព័ន្ធដឹកជញ្ជូនរបស់កោះបាលី ដែលអាចរួមបញ្ចូលការអភិវឌ្ឍន៍ MRT និង LRT នាពេលអនាគតផងដែរ។

កោះបាលី ដែលជាគោលដៅទេសចរណ៍លំដាប់ពិភពលោក បានកើត​មាន​បញ្ហា​​កកស្ទះចរាចរណ៍ជាយូរណាស់មកហើយ ជាពិសេសនៅក្នុងតំបន់ដូចជា Kuta, Seminyak និង Canggu។ គំនិតផ្តួចផ្តើមតាក់ស៊ី​លើ​ទឹក ប្រសិនបើត្រូវបានអនុវត្ត អាចផ្តល់នូវជម្រើសធ្វើដំណើរលឿន និងស្រស់ស្អាតជាងមុន។

ព័ត៌មានលម្អិតបន្ថែម រួមទាំងពេលវេលាចាប់ផ្តើម និងតម្លៃ នឹងត្រូវបានប្រកាសនៅពេលដែលការសិក្សាត្រូវបានបញ្ចប់​នៅ​ចុង​ឆ្នាំ។

សូម​បញ្ជាក់​ថា ក្នុង​ឆមាស​ដំបូង​នៃ​ឆ្នាំ​២០២៥ កោះ​បាលី បាន​ទាក់ទាញ​ទេសចរ​បរទេស​ជាង ៦,២​លាន​នាក់ ដែល​ធ្វើ​ឲ្យ​​ការ​កក​ស្ទះ​ចរាចរណ៍​ក្លាយ​ជា​បញ្ហា​ចម្បង​មួយ​សម្រាប់​តំបន់​ទេសចរណ៍​ដ៏​ពេញ​និយម​​មួយ​នេះ៕

ដោយ៖ ឈាង