ព័ត៌មានអន្ដរជាតិ

មេដឹកនាំហេសបូឡា ព្រមានសងសឹកអ៊ីស្រាអែល បើសិនបន្តធ្វើសង្គ្រាមលើលីបង់

បានផុស

១០ ខែ មុន

នៅ

ថ្ងៃពុធ ៦ សីហា ២០២៥

ដោយ

យោងតាមការចេញផ្សាយរបស់ទីភ្នាក់ងារព័ត៌មាន Reuters មេដឹកនាំថ្មីរបស់ក្រុមហេសបូឡា លោក Naim Qassem បានចេញការព្រមានដោយផ្ទាល់ទៅកាន់ប្រទេសអ៊ីស្រាអែលកាលពីថ្ងៃអង្គារថា មីស៊ីលនឹងវាយប្រហារប្រទេសនេះ ប្រសិនបើអ៊ីស្រាអែលចាប់ផ្តើមសង្រ្គាមទ្រង់ទ្រាយធំប្រឆាំងនឹងប្រទេសលីបង់។

មេដឹកនាំថ្មីរបស់ក្រុមហេសបូឡា លោក Naim Qassem។ (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកត់សម្គាល់របស់លោក Qassem កើតឡើងនៅពេលដែលគណៈរដ្ឋមន្ត្រីរបស់ប្រទេសលីបង់បានជួបប្រជុំគ្នាដើម្បីពិភាក្សាអំពីអាវុធរបស់ក្រុមហេសបូឡា ក្រោមសម្ពាធរបស់សហរដ្ឋអាមេរិកក្នុងការដកហូតអាវុធរបស់ក្រុមនេះ។

លោក Qassem បានប្រកាសថា ក្រុមហេសបូឡា កងទ័ពលីបង់ និងប្រជាជននឹងទប់ទល់នឹងការឈ្លានពានរបស់អ៊ីស្រាអែលណាមួយ ហើយបានសន្យាថាសន្តិសុខរបស់អ៊ីស្រាអែលនឹង «ដួលរលំក្នុងរយៈពេលមួយម៉ោង» ប្រសិនបើសង្គ្រាមចាប់ផ្តើមឡើងវិញ។ ជាមួយគ្នានេះលោកបានលាតត្រដាងជាលើកដំបូងថា សង្រ្គាមនាពេលថ្មីៗនេះបានសម្លាប់អ្នកប្រយុទ្ធ ហេសបូឡា ៥,០០០ នាក់ និងរបួស ១៣,០០០ នាក់ រួមទាំងអតីតមេដឹកនាំលោក Hassan Nasrallah ផងដែរ។

សូមបញ្ជាក់ថាបទឈប់បាញ់ដែលសម្របសម្រួលដោយសហរដ្ឋអាមេរិកក្នុងខែវិច្ឆិកាបានបញ្ចប់ការប្រយុទ្ធគ្នាចុងក្រោយ ប៉ុន្តែភាពតានតឹងនៅតែមានកម្រិតខ្ពស់។ សហរដ្ឋអាមេរិកបានស្នើកិច្ចព្រមព្រៀងមួយដើម្បីរំសាយអាវុធក្រុមហេសបូឡាយ៉ាងពេញលេញ ជាថ្នូរនឹងការបញ្ចប់ការវាយប្រហាររបស់អ៊ីស្រាអែល និងការគាំទ្រផ្នែកហិរញ្ញវត្ថុសម្រាប់ការកសាងប្រទេសលីបង់។

ទោះជាយ៉ាងណាក៏ដោយលោក Qassem បានច្រានចោលសម្ពាធពីខាងក្រៅ ហើយបាននិយាយថា អ៊ីស្រាអែលត្រូវតែបញ្ឈប់ការវាយប្រហាររបស់ខ្លួន មុនពេលការរំសាយអាវុធអាចត្រូវបានពិភាក្សា។ លោកបានជំរុញមេដឹកនាំលីបង់កុំឲ្យចុះចាញ់នឹង«ការផ្តាច់ការពីខាងក្រៅ» ដោយទទូចថា អធិបតេយ្យភាពរបស់ប្រទេសត្រូវតែជម្រើសទីមួយ៕