Medvedev ចោទ​អឺរ៉ុប​ពី​ការ​បំផ្លាញ​កិច្ចប្រឹងប្រែង​សន្តិភាព​អ៊ុយក្រែន​ មុន​ជំនួប​កំពូល​ពូទីន-ត្រាំ

អតីត​ប្រធានាធិបតី​ និង​បច្ចុប្បន្ន​ជា​អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev កាលពីថ្ងៃទី១០​ខែសីហា បានចោទប្រកាន់មេដឹកនាំអឺរ៉ុបថាធ្វើ​ឲ្យ​ខូចដល់កិច្ចខិតខំប្រឹងប្រែង ដើម្បីបញ្ចប់ជម្លោះអ៊ុយក្រែន ខណៈដែលភាពតានតឹងបានផ្ទុះឡើងនៅមុនកិច្ចប្រជុំកំពូលដែលបានគ្រោងទុករវាងប្រធានាធិបតីរុស្ស៊ី លោក វ៉្លឌីមៀរ ពូទីន និង​សមភាគី​អាមេរិក លោក ដូណាល់ ត្រាំ នៅរដ្ឋ​អាឡាស្កា នា​ថ្ងៃ​សុក្រ​សប្ដាហ៍​នេះ។

លោក Medvedev បាន​​រិះគន់​សម្ពាធ​ពី​​សហភាព​អឺរ៉ុប​ ដែល​ទាមទារ​ឲ្យ​ដាក់បញ្ចូល​ប្រធានាធិបតី​អ៊ុយក្រែន លោក វ៉ូឡូឌីមៀរ ហ្សេលេនស្គី ​ទៅ​ក្នុង​កិច្ចពិភាក្សា​​កំពូល​នៅ​អាឡាស្កា។ លោក Medvedev បាន​រៀបរាប់​ថា​៖ «​ភាព​អសីលធម៌​របស់​អឺរ៉ុប ​កំពុង​ព្យាយាម​រារាំង​កិច្ចប្រឹងប្រែង​របស់​សហរដ្ឋអាមេរិក​ ដើម្បី​ដោះស្រាយ​ជម្លោះ​អ៊ុយក្រែន»។

ចំណែក​ឯ​អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បាន​សម្ដែង​ការ​មិន​​ពេញ​ចិត្ត​ចំពោះ​សហភាពអឺរ៉ុប​ផង​ដែរ ហើយ​ចាត់​ទុក​ទំនាក់ទំនង​រវាង​សហភាព​អឺរ៉ុប​-អ៊ុយក្រែនថា​ជា​ «ការ​បំពុល»។ ទន្ទឹម​គ្នា​នោះ លោក Kirill Dmitriev ប្រធានមូលនិធិទ្រព្យសម្បត្តិអធិបតេយ្យរបស់រុស្ស៊ី និងជាបេសកជនលោកពូទីន បានព្រមានថា «ប្រទេសខ្លះចង់​ឲ្យជម្លោះបន្ត» ហើយផ្សព្វផ្សាយ «ការបង្កហេតុ និងព័ត៌មានមិនពិត» ដើម្បីរំខានកិច្ចប្រជុំកំពូល។

វិមានក្រឹមឡាំង និងសេតវិមាន បានអះអាងថា កិច្ចប្រជុំអាឡាស្កានឹងផ្តោតលើ «សន្តិភាពសម្រាប់អ៊ុយក្រែន» ដោយលោក ត្រាំ បានស្នើ​ថា​នឹង​មាន​«ការកាត់​ទឹកដី» ខណៈ​សំណើ​នេះ​ត្រូវ​លោក ហ្សេលេនស្គី ច្រានចោល​យ៉ាង​ដាច់​អហង្ការ។ មេ​ដឹក​នាំ​អ៊ុយក្រែន បានប្រកាស​ថា «សង្រ្គាមត្រូវតែបញ្ចប់ដោយយុត្តិធម៌ ហើយប្រជាជនអ៊ុយក្រែននឹងមិនបោះបង់​ទឹកដី​ឡើយ»។

សូម​រឭក​ថា សេចក្តីថ្លែងការណ៍រួមរបស់មេដឹកនាំសហភាពអឺរ៉ុប បានគាំទ្រការទូតរបស់លោក ត្រាំ ប៉ុន្តែបានសង្កត់ធ្ងន់ថា «សន្តិភាពមិនអាចត្រូវបានគេសម្រេចចិត្តរំលង​ក្បាល​អ៊ុយក្រែនទេ»។ សេចក្តីថ្លែងការណ៍បានបញ្ជាក់​ថា «ព្រំដែនអន្តរជាតិមិនត្រូវផ្លាស់ប្តូរដោយ​កង​កម្លាំងជា​ដាច់​ខាត» ដែលជាការបដិសេធដោយផ្ទាល់ចំពោះការកាត់​បញ្ចូល​តំបន់​​ចំនួន​៥​របស់​អ៊ុយក្រែន​ជា​ឧបសម្ព័ន្ធ​​ដោយ​ខុសច្បាប់​របស់​រុស្ស៊ី៕

ដោយ៖ ឈាង

ចុចអាន៖ អឺរ៉ុប​​គាំទ្រ​​ឲ្យអ៊ុយក្រែន​​​មាន​មុខ​ក្នុង​កិច្ច​ចរចា​សន្តិភាព​នៅ​រដ្ឋ​អាឡាស្កា