អារ៉ាប៊ីសាអូឌីត និងប៉ាគីស្ថានដែលមានអាវុធនុយ ក្លេអ៊ែរ ចុះកិច្ចព្រមព្រៀងការពារគ្នា

យោងតាមការចេញផ្សាយរបស់សារព័ត៌មាន CNA អារ៉ាប៊ីសាអូឌីត និងប៉ាគីស្ថានបានចុះហត្ថលេខាលើកិច្ចព្រមព្រៀងការពារទៅវិញទៅមកមួយកាលពីថ្ងៃទី ១៧ ខែកញ្ញា ដោយកាន់តែពង្រឹងទំនាក់ទំនងការពារជាតិរវាងប្រទេសទាំងពីរដែលមានរយៈពេលជាច្រើនទសវត្សរ៍មកហើយ។

កិច្ចព្រមព្រៀងនេះចែងថា «ការវាយប្រហារលើប្រទេសណាមួយក្នុងចំណោមប្រទេសទាំងពីរនឹងត្រូវបានចាត់ទុកជាការវាយប្រហារលើប្រទេសទាំងពីរ»។

ពិធីចុះហត្ថលេខានេះធ្វើឡើងនៅក្នុង ទីក្រុងរីយ៉ាដ និងបានបង្ហាញទំនាក់ទំនងជាសាធារណៈរវាងរាជទាយាទអារ៉ាប៊ីសាអូឌីត Mohammed bin Salman និងនាយករដ្ឋមន្ត្រីប៉ាគីស្ថាន Shehbaz Sharif ។ មេទ័ព​ប៉ាគីស្ថាន លោក Field Marshal Asim Munir ក៏​បាន​ចូល​រួម​ដែរ ដោយ​គូសបញ្ជាក់​អំពី​ទម្ងន់​យោធា​នៅ​ពី​ក្រោយកិច្ចព្រមព្រៀងនេះ។ រដ្ឋាភិបាលទាំងពីរបានសាទរចំពោះកិច្ចព្រមព្រៀងនេះថាជាការប្តេជ្ញាចិត្តចំពោះកិច្ចសហប្រតិបត្តិការការពារជាតិកាន់តែរឹងមាំ និងស្ថិរភាពក្នុងតំបន់។

គួរបញ្ជាក់ថាកិច្ច​ព្រម​ព្រៀង​នេះ​ត្រូវ​បាន​ចុះ​ហត្ថលេខា​ក្នុង​អំឡុង​ពេល​ដ៏​តាន​តឹង​នៅ​មជ្ឈិមបូព៌ា។ ថ្មីៗនេះ អ៊ីស្រាអែលបានទម្លាក់គ្រាប់បែកលើទីក្រុងដូហា ខណៈពេលដែលមេដឹកនាំក្រុមហាម៉ាសនៅទីនោះសម្រាប់កិច្ចចរចាបទឈប់បាញ់ ដែលធ្វើឲ្យប្រទេសអារ៉ាប់ជាច្រើនខកចិត្ត។ វាក៏បង្ហាញផងដែរថា បណ្តាប្រទេសឈូងសមុទ្រ មិនពឹងផ្អែកលើសហរដ្ឋអាមេរិកសម្រាប់ការការពារ៕

អត្ថបទ៖ ប៊ុន សុភាព