ព័ត៌មានអន្ដរជាតិ

អង្គការនានាជំរុញឥណ្ឌូណេស៊ីឱ្យផ្អាកកម្មវិធីផ្ដល់អាហារឥតគិតថ្លៃតាមសាលា ក្រោយសិស្សពុលចំណីទ្រង់ទ្រាយធំ

បានផុស

២ ខែ មុន

នៅ

ថ្ងៃអង្គារ ២៣ កញ្ញា ២០២៥

ដោយ

អង្គការក្រៅរដ្ឋាភិបាល ដែលធ្វើការលើបញ្ហាសុខាភិបាល កំពុងជំរុញឱ្យរដ្ឋាភិបាលឥណ្ឌូណេស៊ីផ្អាកកម្មវិធីផ្ដល់អាហារឥតគិតថ្លៃតាមសាលារៀនជាបណ្ដោះអាសន្ន ក្រោយសិស្សសាលាប្រមាណ ៨០០ នាក់ ធ្លាក់ខ្លួនឈឺកាលពីសប្ដាហ៍មុនក្នុងករណីពុលចំណីទ្រង់ទ្រាយធំចំនួន ២ ដាច់ដោយឡែក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីផ្ដល់អាហារតម្លៃ ១០ ប៊ីលានដុល្លារ ក្រោមការផ្ដួចផ្ដើមរបស់ប្រធានាធិបតីឥណ្ឌូណេស៊ី ប្រាបូវ៉ូ ស៊ូប៊ីយ៉ានតូ បានទៅដល់ដៃអ្នកទទួលរួមទាំងសិស្សានុសិស្ស ២០ លាននាក់ រាប់តាំងពីបើកដំណើរការនៅខែមករា ដើមឆ្នាំមក ខណៈរដ្ឋាភិបាលកំពុងបង្កើនការជំរុញកម្មវិធីនេះឱ្យទៅដល់ស្រ្តី និងកុមារ ៨៣ លាននាក់ គិតត្រឹមចុងឆ្នាំ។ យ៉ាងណាមិញ កម្មវិធីនេះកំពុងប្រឈមមុខនឹងកម្សោយជាច្រើន រួមទាំងការផ្គត់ផ្គង់ និងការរៀបចំ។ ត្រឹមតែ ១ ករណីនៃការពុលចំណីកាលពីសប្ដាហ៍មុន សិស្សប្រមាណ ៥០០ នាក់បានធ្លាក់ខ្លួនឈឺ។

ការពុលអាហារពីអាហារឥតគិតថ្លៃ បានប៉ះពាល់ដល់កុមារចំនួន ៦ ៤៥២ នាក់ នៅទូទាំងប្រទេស គិតមកទល់ពេលនេះ ដែលវាជា «ការបរាជ័យជាប្រព័ន្ធ»។ នេះបើតាមការថ្លែងរបស់ប្រធានបណ្តាញសម្រាប់ឃ្លាំមើលការអប់រំឥណ្ឌូណេស៊ី (JPPI) លោក Ubaid Matraji ដែលបានប្រាប់គណៈកម្មាធិការសភាទទួលបន្តុកបញ្ហាសុខាភិបាល។ លោកបានស្នើឱ្យរដ្ឋាភិបាលត្រូវតែបញ្ឈប់កម្មវិធីនេះ ដើម្បីបង្កើនការត្រួតពិនិត្យឱ្យកាន់តែខ្លាំង។

មែនទែនទៅ គណៈកម្មាធិការសភាដដែល បានទទួលព័ត៌មានអំពីការព្រួយបារម្ភពាក់ព័ន្ធនឹងកម្មវិធីផ្ដល់អាហារឥតគិតថ្លៃដដែល ដោយអង្គការក្រៅរដ្ឋាភិបាលចំនួន ៦ រួមមានមជ្ឈមណ្ឌលសម្រាប់គំនិតផ្តួចផ្តើមអភិវឌ្ឍន៍យុទ្ធសាស្រ្តរបស់ប្រទេសឥណ្ឌូណេស៊ី (CISDI) ចលនាដើម្បីសុខភាពមាតា និងទារក និងបណ្តាញសម្រាប់ឃ្លាំមើលការអប់រំ។

CISDI ដែលស្នើឱ្យផ្អាកកម្មវិធីផងដែរនោះ បានសម្ដែងការព្រួយបារម្ភថា រដ្ឋាភិបាលឥណ្ឌូណេស៊ីមិនបានកំណត់យន្តការដើម្បីវាយតម្លៃផ្ទះបាយ ដែលបង្កករណីពុលអាហារ ឬដើម្បីការពារការផ្ទុះករណីឡើងបែបនេះនោះទេ។

អង្គការក្រៅរដ្ឋាភិបាល ក៏បានជំរុញឱ្យទីភ្នាក់ងារជាតិអាហារូបត្ថម្ភ ដែលដំណើរការកម្មវិធីនេះ យកចិត្តទុកដាក់បន្ថែមទៀតលើតម្លៃអាហារូបត្ថម្ភនៃប្រភេទអាហារដែលបានផ្តល់ដល់សិស្ស ឬប្រជាជនផ្សេងទៀតផងដែរ ដោយនិយាយថា មុខម្ហូបភាគច្រើននៅតែប្រើប្រាស់របស់កែច្នៃជ្រុល ដែលចាត់ទុកថាមិនល្អចំពោះសុខភាព។

មកទល់ពេលនេះ ទីភ្នាក់ងារជាតិអាហារូបត្ថម្ភមិនបានលើកឡើងយ៉ាងណាទេ ចំពោះការជំរុញឱ្យផ្អាកជាបណ្ដោះអាសន្ន ប៉ុន្តែបានលើកឡើងថា ខ្លួនមានការសោកស្ដាយចំពោះករណីពុលអាហារ៕