ព័ត៌មានអន្ដរជាតិ

WSJ៖ អាមេរិកត្រៀមគាំទ្រផ្នែកចារកម្មសម្រាប់ការវាយប្រហារចម្ងាយឆ្ងាយរបស់អ៊ុយក្រែន

បានផុស

៨ ខែ មុន

នៅ

ថ្ងៃព្រហស្បតិ៍ ២ តុលា ២០២៥

ដោយ

Chheang

កាសែត Wall Street Journal (WSJ) ដោយដកស្រង់ប្រភពពីមន្ត្រីអាមេរិក បានរាយការណ៍កាលពីថ្ងៃពុធទី១ខែតុលាថា សហរដ្ឋអាមេរិកគ្រោងនឹងផ្តល់ការស៊ើបការណ៍សម្ងាត់ដល់អ៊ុយក្រែន សម្រាប់ការវាយប្រហារមីស៊ីលរយៈចម្ងាយឆ្ងាយលើទ្រព្យសម្បត្តិថាមពលរបស់រុស្ស៊ី។

លោក វ៉ូឡូឌីមៀរ ហ្សេលេនស្គី និងលោក ដូណាល់ ត្រាំ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់ WSJ ប្រធានាធិបតី ដូណាល់ ត្រាំ ថ្មីៗបានយល់ព្រមគាំទ្រផ្នែកស៊ើបការណ៍សម្ងាត់របស់សហរដ្ឋអាមេរិក និងមន្ទីរបញ្ចកោណសម្រាប់ប្រតិបត្តិការបែបនេះ ហើយបានស្នើសុំឲ្យសម្ព័ន្ធមិត្តណាតូសម្រាប់ជំនួយស្រដៀងគ្នានេះ។ ប្រសិនបើអនុវត្តមែននោះ វានឹងក្លាយជាលើកដំបូងហើយដែលក្រុងវ៉ាស៊ីនតោនជួយអ៊ុយក្រែនដោយផ្ទាល់ក្នុងការវាយប្រហាររយៈចម្ងាយឆ្ងាយ។

ក្រុមមន្ត្រីអាមេរិកបាននិយាយថា រដ្ឋបាលលោក ត្រាំ ក៏កំពុងថ្លឹងថ្លែងថាតើត្រូវផ្គត់ផ្គង់មីស៊ីលឆ្លងទ្វីប Tomahawk និងសព្វាវុធផលិតដោយសហរដ្ឋអាមេរិកផ្សេងទៀតដែលមានរយៈចម្ងាយប្រហែល ៥០០ម៉ាយ ទោះបីជាមិនមានការសម្រេចចិត្តចុងក្រោយត្រូវបានធ្វើឡើងក៏ដោយ។

អ្នកនាំពាក្យវិមានក្រឹមឡាំង លោក Dmitry Peskov បានច្រានចោលលទ្ធភាពនៃការផ្លាស់ប្តូរយុទ្ធសាស្ត្ររបស់អាមេរិក ខណៈដែលរដ្ឋមន្ត្រីការបរទេសរុស្ស៊ីលោក Sergey Lavrov វិញបានប្រាប់ថា លោកសង្ស័យថាទីក្រុងវ៉ាស៊ីនតោននឹងផ្តល់ Tomahawks ដល់ទីក្រុងកៀវនៅទីបំផុត។

សូមជម្រាបថា នាពេលថ្មីៗនេះ ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានអំពាវនាវសុំប្រើប្រាស់អាវុធរយៈចម្ងាយឆ្ងាយ ដើម្បីវាយប្រហារមជ្ឈមណ្ឌលអំណាចរបស់រុស្ស៊ី រួមទាំងវិមានក្រឹមឡាំងផងដែរ៕