Padklang លើកមុនថាចង់​ធ្វើ​ត្រឹម​ពលរដ្ឋ​ល្អម្នាក់ តែ​ឥឡូវ​ទទួល​តំណែង​ទីប្រឹក្សាអគ្គមេបញ្ជាការកងទ័ពថៃ

យោង​តាម​ការ​ចុះផ្សាយ​របស់ The Nation ទីបញ្ជាការកងទ័ពភូមិន្ទថៃ បានប្រកាសកាលពីថ្ងៃព្រហស្បតិ៍​ទី​២​ខែ​តុលា​ឆ្នាំ​២០២៥​ថា អតីត​មេ​បញ្ជាការ​ភូមិភាគ​២ លោក Boonsin Padklang ត្រូវបានតែងតាំងជាទីប្រឹក្សាអគ្គមេបញ្ជាការកងទ័ពថៃ ដើម្បីផ្តល់ការណែនាំជាយុទ្ធសាស្ត្រ និងការពារជាតិ។

តួនាទី​ថ្មី​របស់ Padklang មាន​ដូចជា ផ្តល់ការណែនាំ និងអនុសាសន៍ជាយុទ្ធសាស្ត្រ លើការគ្រប់គ្រង សន្តិសុខ ​​ការ​ការពារជាតិ និងបញ្ហាពាក់ព័ន្ធផ្សេងៗទៀត ដល់អគ្គមេបញ្ជាការ ព្រម​ទាំង​អនុវត្តការងារជាក់លាក់ ដើម្បីជួយ ឬគាំទ្រអគ្គមេបញ្ជាការ ក្នុងការប្រតិបត្តិបេសកកម្មដែលបានកំណត់។

យ៉ាង​ណាមិញ ការ​ទទួល​យក​តំណែង​នេះ ត្រូវ​គេ​ដឹង​ថា​​ហាក់​ផ្ទុះស្រឡះ​នឹង​អ្វី​ដែល​លោក​ធ្លាប់​លើក​ឡើង​កាល​ពី​ខែ​សីហា​កន្លង​ទៅ។ ក្នុងពិធីបុណ្យសាសនាមួយនៅវត្ត Suan Thammapiti នៃស្រុក Mueang ខេត្ត Kalasin កាលពីថ្ងៃអាទិត្យទី១៧ខែសីហាឆ្នាំ២០២៥​ លោក Padklang បានប្រកាស​ក្ដែងៗ​ថា ខ្លួននឹងមិនទទួលមុខតំណែងនយោបាយណាមួយឡើយ បន្ទាប់ពីចូលនិវត្តន៍ ដោយសុំធ្វើត្រឹមជាពលរដ្ឋល្អម្នាក់ប៉ុណ្ណោះ។

ការនិយាយ​បាតដៃ​ខ្នង​ដៃ​របស់​ Padklang ទំនង​ជា​មាន​ហេតុផល​សំខាន់ ពាក់ព័ន្ធ​នឹង​ការ​ការពារ​ខ្លួន។ បន្ទាប់ពីតំណែង​ដ៏ខ្ពស់ និងចម្រូងចម្រាស លោក Padklang បានប្រឈមមុខនឹងហានិភ័យនៃការក្លាយជាគោលដៅនយោបាយ។​ បុរស​ដែល​បញ្ឆេះ​ឲ្យ​មាន​សង្គ្រាម និង​ភាព​តានតឹង​ជាមួយ​កម្ពុជា​រូប​នេះ អាច​មាន​ការ​ព្រួយ​បារម្ភ​អំពីការប្រឈមមុខនឹងការវាយប្រហារតាមផ្លូវច្បាប់ ឬនយោបាយពីគូប្រជែង និងក្រុមដែលរងផលប៉ះពាល់ដោយការបង្ក្រាបរបស់គាត់លើឧក្រិដ្ឋកម្មឆ្លងដែន និងការរត់ពន្ធខុសច្បាប់។ ហេតុដូច្នេះហើយ​ ដោយទទួលយកតួនាទីជាទីប្រឹក្សាអគ្គមេបញ្ជាការកងទ័ព លោក Padklang បានរក្សាតំណែង និងឋានៈផ្លូវការនៅក្នុងឋានានុក្រមយោធា។ នេះប្រៀប​ដូចជា​យ័ន្ត​ការពារ​ខ្លួន​របស់ Padklang ពីការប៉ះទង្គិចផ្នែកនយោបាយ ឬបញ្ហាប្រឈមផ្នែកច្បាប់ ដែលអនុញ្ញាត​ឲ្យ​គាត់រក្សានូវឥទ្ធិពល និងភាពស្របច្បាប់មួយចំនួន៕

ដោយ៖ ឈាង