មន្ត្រីសុខាភិបាល ១០ អង្គភាព ទទួលវគ្គបណ្តុះបណ្តាលវិជ្ជាជីវៈគិលានុបដ្ឋាក នៅជប៉ុន

អ្នកស្រីសាស្រ្តាចារ្យជំនួយ ទូច សុខនាង ប្រធាននាយកដ្ឋានអភិវឌ្ឍន៍ធនធានមនុស្ស នៃក្រសួងសុខាភិបាល បានដឹកនាំក្រុមការងារអនុវត្តគម្រោងពង្រឹងប្រព័ន្ធបណ្តុះបណ្តាលក្នុងពេលបម្រើការងារ សម្រាប់មន្ត្រីសុខាភិបាលចំនួន ១០ រូបមកពីអង្គភាពផ្សេងៗ។

អង្គភាពទាំងនោះរួមមាន នាយកដ្ឋានអភិវឌ្ឍន៍ធនធានមនុស្ស នាយកដ្ឋានមន្ទីរពេទ្យ សាកលវិទ្យាល័យវិទ្យាសាស្រ្តសុខាភិបាល មជ្ឈមណ្ឌលជាតិលើកកម្ពស់សុខភាព មន្ទីរពេទ្យកាល់ម៉ែត មន្ទីរពេទ្យព្រះអង្គឌួង មន្ទីរពេទ្យបង្អែកខេត្តកំពង់ចាម មន្ទីរពេទ្យបង្អែកខេត្តបាត់ដំបង សាលាមធ្យមសិក្សាសុខាភិបាលភូមិភាគកំពង់ចាម និងសាលាមធ្យមសិក្សាសុខាភិបាលភូមិភាគបាត់ដំបង ចូលរួមកម្មវិធីបណ្តុះបណ្តាលស្តីពី ការគ្រប់គ្រងការបណ្តុះបណ្តាលវិជ្ជាជីវៈបន្តសម្រាប់គិលានុបដ្ឋាក នៅប្រទេសជប៉ុន ដោយមានការឧបត្ថម្ភ និងគាំទ្រដោយភ្នាក់ងារសហប្រតិបត្តិការអន្តរជាតិជប៉ុន (JICA)។

វគ្គបណ្តុះបណ្តាលនេះ មានគោលបំណងផ្តល់ចំណេះដឹងសំខាន់ៗដើម្បីពង្រឹងប្រព័ន្ធគ្រប់គ្រងការបណ្តុះបណ្តាលក្នុងពេលបម្រើការងារ និងការអភិវឌ្ឍវិជ្ជាជីវៈបន្ត សម្រាប់វិជ្ជាជីវៈគិលានុបដ្ឋាក។ វគ្គបណ្តុះបណ្តាលនេះ ធ្វើឡើងក្នុងរយៈពេល ៨ថ្ងៃ ដែលផ្ដោតលើ ប្រធានបទដូចជា៖ គិលានុបដ្ឋាក និងសីលធម៌ គោលនយោបាយថែទាំសុខភាព និងគិលានុបដ្ឋាក នៅប្រទេសជប៉ុន ការអប់រំបន្ត និងការគ្រប់គ្រងគិលានុបដ្ឋាក របស់មហាវិទ្យាល័យគិលានុបដ្ឋាកនៅប្រទេសជប៉ុន ការអប់រំបន្ត របស់សមាគមគិលានុបដ្ឋាកនៅប្រទេសជប៉ុន សិក្សាអំពីការអនុវត្តការងារជាក់ស្តែង របស់គិលានុបដ្ឋាក បម្រើការងារនៅមន្ទីរពេទ្យព្យាបាលមនុស្សចាស់ ប្រទេសជប៉ុន ការអប់រំបន្តរបស់គិលានុបដ្ឋាក ថែទាំតាមផ្ទះ។

ជាលទ្ធផល បន្ទាប់ពីបានចូលរួមវគ្គបណ្ដុះបណ្ដាល អ្នកចូលរួមទទួលបាននូវចំណេះដឹងដូចជា៖ ១. យល់ដឹងកាន់តែទូលំទំលាយអំពីការអភិវឌ្ឍន៍វិជ្ជាជីវៈបន្ត (CPD) សម្រាប់គិលានុបដ្ឋាកនៅប្រទេសជប៉ុន ២. ឈ្វេងយល់អំពីការថែទាំ និងរបៀបនៃការអនុវត្តការងាររបស់គិលានុបដ្ឋាកនៅប្រទេសជប៉ុន ៣. យល់ដឹងកាន់តែទូលំទូលាយអំពីតួនាទី និងសកម្មភាពរបស់ស្ថាប័នរដ្ឋាភិបាលសមាគមគិលានុបដ្ឋាក និងមន្ទីរពេទ្យទាក់ទងនឹង CPD នៅក្នុងប្រទេសជប៉ុន ៤. ឈ្វេងយល់ពីប្រព័ន្ធគ្រប់គ្រងការបណ្តុះបណ្តាល ក្នុងសេវាកម្មនៅប្រទេសជប៉ុន ៥. ចែករំលែកគំនិតផ្តួចផ្តើមដែលអាចធ្វើទៅបានដើម្បីពង្រឹងប្រព័ន្ធបណ្តុះបណ្តាលក្នុងសេវាកម្ម។

គួរបញ្ជាក់ថា វគ្គបណ្តុះបណ្តាលស្តីពី ការគ្រប់គ្រងការបណ្តុះបណ្តាលវិជ្ជាជីវៈបន្តរបស់វិជ្ជាជីវៈគិលានុបដ្ឋាក លើកទី២ នេះ ដំណើរការចាប់ពីថ្ងៃទី១៤ ដល់ថ្ងៃទី២៤ ខែកក្កដា ឆ្នាំ២០២៤ គឺសិក្ខាកាមដែលបានចូលរួម នឹងពាំនាំចំណេះដឹងដែលបានរៀនយកមកចែករំលែក ឬអភិវឌ្ឍន៍កម្មវិធីបណ្តុះបណ្តាលវិជ្ជាជីវៈបន្តរបស់គិលានុបដ្ឋាកក្នុងពេលបម្រើការងារ នៅប្រទេសកម្ពុជាផងដែរ៕