មន្ត្រី​សុខាភិបាល​លើកទឹកចិត្តឱ្យមន្ទីរពេទ្យកម្រិក ២ រៀបចំក្រុមការងារសល្យសាស្រ្ត សម្ភព និងសណ្តំ ដើម្បីធានាបាននូវប្រសិទ្ធភាពខ្ពស់

មន្ត្រីជាន់ខ្ពស់នៃក្រសួងសុខាភិបាលបានលើកទឹកចិត្តឱ្យមន្ទីរពេទ្យកម្រិក២ CPA2 រៀបចំក្រុមការងារសល្យសាស្រ្ត សម្ភព និងសណ្តំដើម្បីធានាអនុវត្តការងារប្រកបដោយប្រសិទ្ធភាពស្របតាមគោលនយោបាយ និងផែនការយុទ្ធសាស្រ្តជាតិស្តីពីសល្យសាស្រ្ត សម្ភព និងសណ្តំ ២០២៦-២០៣៥។

នៅក្នុងកិច្ចប្រជុំបច្ចេកទេសរបស់គណៈកម្មការសល្យសាស្ត្រ សម្ភព និងសណ្តំថ្នាក់ជាតិនៃក្រសួងសុខាភិបាលតាមប្រព័ន្ធសប្បនិម្មិត Zoom ដើម្បីរៀបចំចាប់ផ្តើមអនុវត្តគោលនយោបាយ និងផែនការយុទ្ធសាស្រ្តជាតិស្តីពីសល្យសាស្រ្ត សម្ភព និង​សណ្តំ ២០២៦-២០៣៥ (NSOAP) លោកសាស្ត្រាចារ្យ ឡឹម តារា រដ្ឋលេខាធិការ និងជាប្រធានគណៈកម្មការសល្យសាស្ត្រ សម្ពព និងសណ្តំថ្នាក់ជាតិ បាន រំលឹកឡើងវិញពីសកម្មភាពអាទិភាព និងសូចនាការសំខាន់ដែលមាន​ចែង​នៅក្នុងយុទ្ធសាស្រ្តជាតិ NSOAP និងអំពីការងារសំខាន់ៗ ដែលមន្ទីរពេទ្យទាំងអស់ មន្ទីរពេទ្យជាតិ មន្ទីរពេទ្យបង្អែករាជធានីខេត្តCPA3 និងមន្ទីរពេទ្យបង្អែកកម្រិតពីរCPA2 ត្រូវយកចិត្តទុកដាកជាពិសេស សម្រាប់ការបម្រើសេវាសល្យសាស្រ្ត សម្ភពនិងសណ្តំ ជូនដល់អ្នកជំងឺដើម្បីធានាបានការបំពេញការងារជាប្រក្រតី ក្រោយទទួលការព្យាបាលថែទាំពីសេវាសល្យសាស្រ្តសម្ភពនិងសណ្តំ។

លោកសាស្ត្រាចារ្យ បានលើកទឹកចិត្តឱ្យមន្ទីរពេទ្យកម្រិក២ CPA2 រៀបចំក្រុមការងារសល្យសាស្រ្ត សម្ភព និងសណ្តំដើម្បីធានាអនុវត្តការងារប្រកបដោយប្រសិទ្ធភាពស្របតាមគោលនយោបាយ និងផែនការយុទ្ធសាស្រ្តជាតិស្តីពីសល្យសាស្រ្ត សម្ភព និងសណ្តំ ២០២៦-២០៣៥(NSOAP) ។ លើសពីនេះទៀតគ្រប់មន្ទីរពេទ្យត្រូវរៀបចំកត់ត្រា ប្រមូលទិន្នន័យសម្រាប់ឆ្លើយតបសូចនាការសំខាន់ៗ ដែលមានចែងក្នុង NSOAP ការប្រើប្រាស់ទិន្នន័យសម្រាប់ការសម្រេចចិត្ត និងរៀបចំគោលនយោបាយនានា ដែលមានកម្មវិធី Data-Centered Leadership (DCL) គាំទ្រដោយអង្គការ Vital Strategies៕

អត្ថបទ ៖ សំអឿន