ត្រឹម៤ខែ ឆ្នាំ២០២៦ មន្ត្រី អ.ដ.ក. បានចុះដោះស្រាយវិវាទដល់មូលដ្ឋានចំនួន៥៨០ដង

គិតត្រឹម ៤ខែ ឆ្នាំ២០២៦នេះ មន្ត្រីអាជ្ញាធរជាតិដោះស្រាយវិវាទក្រៅប្រព័ន្ធតុលាការ ហៅកាត់ថា អ.ដ.ក. បានចុះដោះស្រាយវិវាទដល់មូលដ្ឋានចំនួន ៥៨០ដង ខណៈក្នុងឆ្នាំ២០២៥ទាំងមូល បានជិត ២ ០០០ដង។ នេះបើតាមការឱ្យដឹងរបស់លោក យ៉ម ផារ៉ូត ប្រតិភូរាជរដ្ឋាភិបាល និងជាអគ្គលេខាធិការនៃអគ្គលេខាធិការដ្ឋាននៃ អ.ដ.ក. ក្នុងកិច្ចពិភាក្សាស្ដីពីការធ្វើឱ្យប្រសើរឡើងនូវយន្តការដោះស្រាយវិវាទក្រៅប្រព័ន្ធតុលាការនៅកម្ពុជា កាលពីពេលថ្មីៗនេះ។

បើតាមលោក យ៉ម ផារ៉ូត គិតចាប់តាំងពីការបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) ក្នុងរយៈពេលជាង ២ឆ្នាំមកនេះ គឺមិនទាន់មានព័ត៌មាន ឬបណ្ដឹងណាមួយបង្ហាញថា កំណត់ហេតុព្រមព្រៀងបញ្ចប់វិវាទរបស់អ.ដ.ក. មិនអាចយកទៅអនុវត្តបាននោះឡើយ។ លោកបញ្ជាក់ទៀតថា ជាង ២ឆ្នាំមកនេះ កំណត់ហេតុព្រមព្រៀងបញ្ចប់វិវាទដែលចេញដោយអ.ដ.ក. គឺមានមិនក្រោម ៨០០សំណុំរឿងនោះទេ។

ក្នុងឱកាសនោះដែរ លោកក៏បានកោតសរសើរចំពោះការលះបង់ពេលវេលារបស់មន្ត្រីសម្រុះសម្រួលដោះស្រាយវិវាទនៃ អ.ដ.ក. ដោយពេលខ្លះពួកគាត់បានប្រើប្រាស់មធ្យោបាយធ្វើដំណើរផ្ទាល់ខ្លួន ដើម្បីចុះបំពេញបេសកកម្មដោះស្រាយវិវាទដល់មូលដ្ឋានរបស់ប្រជាពលរដ្ឋ ដោយមិនគិតថ្ងៃឈប់សម្រាក។ 

អាជ្ញាធរជាតិដោះស្រាយវិវាទក្រៅប្រព័ន្ធតុលាការ ត្រូវបានបង្កើតឡើងក្នុងគោលបំណងបង្កើតឱ្យមានយន្តការថ្នាក់ជាតិមួយក្នុងការដោះស្រាយវិវាទក្រៅប្រព័ន្ធតុលាការ បន្ថែមលើយន្តការដែលមានស្រាប់ សំដៅលើកកម្ពស់គុណភាព ប្រសិទ្ធភាព និងនិរន្តភាពនៃការដោះស្រាយវិវាទក្រៅប្រព័ន្ធតុលាការ ក្នុងគោលបំណងបង្ខិតសេវាដោះស្រាយវិវាទឱ្យកាន់តែខិតជិតប្រជាពលរដ្ឋនៅមូលដ្ឋាន។ សម្រុះសម្រួលដោះស្រាយវិវាទមួយដែលអាចធានាបាននូវបរិយាកាលសន្តិភាពនិយម និងភាពសុខដុមរមនាក្នុងសង្គមជាតិ និងជួយកាត់បន្ថយការកកស្ទះសំណុំរឿងនៅតាមតុលាការ៕