អាជ្ញាធរជាតិដោះស្រាយវិវាទក្រៅប្រព័ន្ធតុលាការ ប្រកាសរើសមន្ត្រីសម្របសម្រួលដោះស្រាយវិវាទចំនួន ៤០នាក់

អាជ្ញាធរជាតិដោះស្រាយវិវាទក្រៅប្រព័ន្ធតុលាការ ប្រកាសនៅថ្ងៃទី២៨ ខែមេសា ពីការប្រឡងជ្រើសរើសមន្ត្រីសម្របសម្រួលដោះស្រាយវិវាទ ជំនាន់ទី៣ ចំនួន៤០នាក់ ឱ្យចូលបម្រើការពេញម៉ោង។

បើតាមសេចក្តីប្រកាស និស្សិត និងសាធារណៈអាចដាក់ពាក្យប្រឡងបាន ដោយផ្អែកលើលក្ខខណ្ឌចំនួន៤។ បេក្ខជនត្រូវមានសញ្ញាតិខ្មែរ, អាយុយ៉ាងតិច ២៥ឆ្នាំ (គិតត្រឹមថ្ងៃដាក់ពាក្យ), បេក្ខជនត្រូវមានសញ្ញាបត្រចាប់ពីបរិញ្ញាបត្រច្បាប់ឡើងទៅ ហើយបេក្ខជន ត្រូវតែជាជនមិនធ្លាប់ត្រូវបានផ្តន្ទាទោសពីបទឧក្រិដ្ឋ ឬបទមជ្ឈិមដោយចេតនា ដោយគ្មានការព្យួរទោស។ សម្រាប់បេក្ខជនជាស្ត្រី និងជាជនជាតិដើមភាគតិចត្រូវបានលើកទឹកចិត្តឱ្យចូលរួមប្រឡង។

ចំពោះការប្រឡងនេះ នឹងរៀបចំជា២ដំណាក់កាល គឺដំណាក់កាលទី១ ជាវិញ្ញាសាសរសេរលើមុខវិជ្ជាផ្នែកច្បាប់ និងវិញ្ញាសាទី២ ជាវិញ្ញាសាសួរសំណួរផ្ទាល់មាត់លើមុខវិជ្ជាផ្នែកច្បាប់ និងវប្បធម៌ទូទៅ សម្រាប់បេក្ខជនដែលប្រឡងជាប់ដំណាក់កាលទី១។

អ្នកដែលមានចំណាប់អារម្មណ៍ប្រឡង អាចទៅសុំពាក្យប្រឡងនៅអាជ្ញាធរជាតិដោះស្រាយវិវាទក្រៅប្រព័ន្ធតុលាការ ឬ ទាញយក QR Code Scan ក្នុងសេចក្តីជូនដំណឹង។ បន្ទាប់មក យកពាក្យមកដាក់ផ្ទាល់នៅ អាជ្ញាធរជាតិដោះស្រាយវិវាទក្រៅប្រព័ន្ធតុលាការ ដែលមានទីតាំងនៅអគាររដ្ឋបាលពហុបំណងនៃវិស័យយុត្តិធម៌ ក្នុងបរិវេណបណ្ឌិត្យសភាភូមិន្ទយុត្តិធម៌កម្ពុជា ចាប់ពីថ្ងៃជូនដំណឹង ដល់ថ្ងៃទី១៩ ខែឧសភា ឆ្នាំ២០២៥ វេលាម៉ោង ១៧៖០០នាទី៕