៤ខែដើមឆ្នាំថ្មីមន្ទីរពេទ្យគន្ធបុប្ផា ពិនិត្យ និងព្យាបាលសរុបជាង៤២ម៉ឺនករណី ចាយថវិកាជាង១៣លានដុល្លារ

ក្នុងរយៈពេល ៤ ខែ ដើមឆ្នាំ២០២៦ នេះ, មន្ទីរពេទ្យគន្ធបុប្ផាទាំងនៅរាជធានីភ្នំពេញ និងនៅខេត្តសៀមរាប បានពិនិត្យ និងព្យាបាលសរុបចំនួន៤២៦ ៩៣២ ករណី ចំណាយថិវកាជាង១៣លានដុល្លារសហរដ្ឋអាម៉េរិក។ នេះបើតាមរបាយការណ៍ផ្សព្វផ្សាយលើបណ្ដាញសង្គមររ​បស់មូលនិធិគន្ធបុប្ផាកម្ពុជា នាថ្ងៃទី៨ ខែឧសភា នេះ។

បើតាមរបាយការណ៍លម្អិត មន្ទីរពេទ្យគន្ធបុប្ផា បានផ្ដល់សេវាផ្នែកពិគ្រោះជំងឺក្រៅ៖ ៣១៦ ២២៧ ករណី ,ដាក់ឱ្យសម្រាកព្យាបាលក្នុងមន្ទីរពេទ្យ ៖ ៦៧ ២២៨ ករណី, ព្យាបាលជំងឺគ្រុនឈាម៖ ៣ ១០៤ នាក់, សេវាពិនិត្យស្ត្រីមានផ្ទៃពោះ៖ ៣៣ ៤៩៧ ករណី ,ផ្ដល់សេវាសម្រាលកូន៖ ៦ ៤២៦ នាក់ និងការវះកាត់បេះដូង៖ ៤៥០ នាក់។

មូលនិធិគន្ធបុប្ផាកម្ពុជា គូសបញ្ជាក់ថាជាមួយនឹងការពិនិត្យ និងព្យាបាលករណីទាំងអស់ខាងលើនេះ, មន្ទីរពេទ្យគន្ធបុប្ផាបានចំណាយថវិកាប្រតិបត្តិការសរុបចំនួន ១៣ ៣៩៧ ៤៧៩ ដុល្លារអាម៉េរិក។

រយៈពេលពេញ១ឆ្នាំ២០២៥ មន្ទីរពេទ្យគន្ធបុប្ផាទាំងនៅរាជធានីភ្នំពេញ និងនៅខេត្តសៀមរាប បានពិនិត្យ ពិគ្រោះ ព្យាបាលជំងឺកុមារចំនួន ១ ០៧១ ៦៣៧ករណី កើនឡើង១៤% បើធៀបនឹងរយៈពេលដូចគ្នាក្នុងឆ្នាំ២០២៤កន្លងទៅ។  តាមរយៈនេះ មន្ទីរពេទ្យគន្ធបុប្ផាបានចំណាយថវិកា៤៦ ១៨១ ៥២៣ដុល្លារអាម៉េរិក ដើម្បីបន្តបេសកកម្មសង្គ្រោះជីវិតទារក កុមារ និងស្រ្តីមានផ្ទៃពោះដោយឥតគិតថ្លៃ និងគ្មានការរើសអើង។

លោកជំទាវបណ្ឌិតពេជ ចន្ទមុន្នី ប្រធានកិត្តិយស នៃមូលនិធិគន្ធបុប្ផា ធ្លាប់បាន ថ្លែងថា មន្ទីរពេទ្យគន្ធបុប្ផាបានព្យាបាល ដណ្ដើមជីវិតកុមារកម្ពុជាជាច្រើនពីមាត់មច្ចុរាជ ក្រោយមកកុមារដែលធ្លាប់ទទួលបានការព្យាបាលទាំងនោះ ក្លាយជាគ្រូពេទ្យហើយបានជួយព្យាបាលអ្នកជំងឺដទៃទៀត និងខ្លះទៀតបានក្លាយជាធនធានមនុស្សដ៏មានតម្លៃសម្រាប់សង្គមកម្ពុជា។

ជានិច្ចកាល លោកជំទាវស្ត្រីទី១ តែងតែអំពាវានាវឱ្យសប្បុរសជនបរិច្ចាគថវិកាចូលក្នុងមូលនិធិគន្ធបុប្ផាកម្ពុជា សម្រាប់ទ្រទ្រង់ដំណើរការរបស់មន្ទីរពេទ្យ ឱ្យបានបំពេញបេសកកម្មដ៏ថ្លៃថ្លាសង្គ្រោះជីវិតកុមារកម្ពុជា។ លោកជំទាវបណ្ឌិត បានចាត់ទុកការបរិច្ចាគរបស់សប្បុរសជននានាជូនមន្ទីរពេទ្យ ដើម្បីទុកព្យាបាលជំងឺកុមារ ថាគឺជាការធ្វើទានមួយដ៏ត្រឹមត្រូវ ពីព្រោះបានជួយស្រោចស្រង់អាយុជីវិតកុមារផង និងជួយឱ្យកុមារទាំងនោះទទួលបានឱកាស និងអនាគតល្អ ក៏ដូចបានជួយសង្គមជាតិ៕

មន្ទីរពេទ្យគន្ធបុប្ផាត្រូវការការបរិច្ចាគពីសប្បុរសជន ដើម្បីបន្តបេសកកម្មសង្គ្រាះជីវិតស្ត្រី និងកុមារកម្ពុជា ដែលសាធារណជនអាចចូលរួមបរិច្ចាគតាមរយៈតំណនេះ ៖ https://epayment.acledabank.com.kh/wRx1Z4Gzqzi8zMDq/pay
លេខទំនាក់ទំនង ៖
📞 061 701 111
📞 010 543 666