កីឡា

ក្រៅពីឈុតធំសហព័ន្ធតេក្វាន់ដូ ITF កម្ពុជា បញ្ជូនថ្នាលចំនួន ៧នាក់ទៅប្រជែងមេដាយ និងសន្សំបទពិសោធនៅម៉ុងហ្គោលីផងដែរ

បានផុស

១ minute មុន

នៅ

ថ្ងៃចន្ទ ២៧ កក្កដា ២០២៦

ដោយ

ការប្រកួតជ្រើសរើសជើងឯកអាស៊ី លើកទី១១ ចាប់ពីថ្ងៃទី៣ ដល់ ៩ ខែសីហា ឆ្នាំ២០២៦ នេះសហព័ន្ធកីឡាតេក្វាន់ដូ ITF កម្ពុជា មិនត្រឹមតែបញ្ជូនឈុតធំនោះទេ ពោលលើកនេះមានថ្នាលប្រុស-ស្រី ចំនួន ៧ទៀតផងដែរក្នុងការប្រជែងមេដាយ និងសន្សំបទពិសោធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមថ្នាលតេក្វាន់ដូ ITF

លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា បានលើកឡើងថា ការចេញទៅប្រកួតនៅប្រទេសម៉ុងហ្គោលីលើកនេះមានបញ្ជូនយុវជនថ្នាលដែលជាជើងខ្លាំងធ្លាប់ឈ្នះមេដាយការប្រកួតអាស៊ីអាគ្នេយ៍នៅកម្ពុជាចំនួន ៧រូបផងដែរ។ ថ្នាលទាំង ៧នាក់នេះសុទ្ធតែជាអ្នកមានសមត្ថភាពលេចធ្លោ ដូច្នេះនេះជាឱកាសថ្មីមួយទៀតដែលរូបគេអាចដកស្រង់បទពិសោធលើឆាកអន្តរជាតិដែលប្រជុំដោយជើងខ្លាំង។

ក្រុមថ្នាលតេក្វាន់ដូ ITF

ចំណែកលោក ប៉ាល់ ជីវ័ន គ្រូជម្រើសជាតិបានឲ្យដឹងថា សម្រាប់យុវជនថ្នាលកម្ពុជាទាំង ៧នាក់នេះគឺជាលើកទី១ ហើយសម្រាប់សហព័ន្ធដែលបានបញ្ជូនទៅឯក្រៅប្រទេស។ នេះជាការដកបទពិសោធមួយសម្រាប់សហព័ន្ធផងដែរចំពោះថ្នាលតេក្វាន់ដូ ITF ដែលត្រូវបន្តវេនថ្ងៃខាងមុខថាអាចទៅរួច មានចំណុចល្អ និងចំណុចខ្វះខាតយ៉ាងណាដើម្បីកែតម្រូវតទៅមុខទៀត។

ចំពោះអ្នកដែលទទួលបានជ័យជម្នះនៅការប្រកួតលើកនេះដែរពេលវិលត្រឡប់មកវិញក៏មិនត្រូវមានអំនួតលើខ្លួនឯងដែលនាំឲ្យធ្លាក់ចុះលើការហ្វឹកហាត់ ឬធ្លាក់សមត្ថភាពវិញនោះទេ។ ប្រសិនបើការចេញទៅលើកនេះមិនទទួលបានជោគជ័យក្នុងនាមគ្រូក៏នឹងពង្រឹងការហ្វឹកហាត់ទ្វេដង ឬកែតម្រូ វបំពេញចំណុចខ្វះខាតទាំងនោះឲ្យប្រសើរឡើងវិញដើម្បីក្លាយជាអ្នកបន្តវេនប្រកបដោយសមត្ថភាពប្រកួតពេញលេញនៅថ្ងៃមុខជាមួយតេក្វាន់ដូ ITF នេះ។

ក្រុមថ្នាលតេក្វាន់ដូ ITF

បញ្ជាក់ដែរថា សហព័ន្ធកីឡាតេក្វាន់ដូ ITF កម្ពុជា នឹងទៅចូលរួមការប្រកួតជ្រើសរើសជើងឯកយុវជនអាស៊ី លើកទី១១ នៅឯប្រទេសម៉ុងហ្គោលី ចាប់ពីថ្ងៃទី៣ ដល់ ៩ ខែសីហា ឆ្នាំ២០២៦។ សហព័ន្ធនឹងបញ្ជូនកីឡាករ កីឡាការិនី សរុប ៣២នាក់ក្នុងនោះមានថ្នាល ៧នាក់ផងដែរ។ ចំណោមថ្នាលទាំង ៧នាក់នោះមានប្រុស ៥ និងនារី ២នាក់៕

អត្ថបទដោយ៖ នួន ស៊ីណា

Related Topics:កីឡាតេក្វាន់ដូ ITF