វេលា​ទៀបភ្លឺ ឆេះឃ្លាំង​មួយ​កន្លែង​នៅខណ្ឌសែនសុខ សម្ភារៈ​ខូចខាតអស់ទាំងស្រុង​

ភ្នំពញ​៖​ ឃ្លាំងស្តុកគ្រឿងអគ្គិសនីមួយកន្លែងនៅខណ្ឌសែនសុខ  ត្រូវភ្លើងឆាបឆេះអស់ទាំងស្រុង បង្កការភ្ញាក់ផ្អើល កាលពីវេលាម៉ោង​ ៣និង៣០នាទីទៀបភ្លឺ​ ថ្ងៃទី១២​ ខែកក្កដា ឆ្នាំ២០២១នេះ ស្ថិតនៅចំណុចឃ្លាំងលេខ២២៩ ផ្លូវបេតុង ក្រុមទី៣ ភូមិអូរបែកក្អម សង្កាត់អូរបែកក្អម ខណ្ឌសែនសុខ​ រាជធានីភ្នំពេញ​។

លោកវរសេនីយ៍ឯក​ ព្រហ្ម​ យ៉ន​ នាយការិយាល័យបង្ការពន្លត់អគ្គិភ័យ​ និងសង្គ្រោះ​ នៃស្នងការដ្ឋាននគរបាលរាជធានីភ្នំពេញ បានប្រាប់ឲ្យដឹងថា ម្ចាស់ឃ្លាំងស្តុបគ្រឿងអគ្គិសនីមានឈ្មោះ​ លី​ ប៉ាវ ភេទប្រុស អាយុ​ ៤៥ឆ្នាំ​។ មូលហេតុដែលបណ្ដាលឲ្យមានអគ្គិភ័យនេះ ដោយសារឆ្លងចរន្តអគ្គិសនី។

ហេតុការណ៍គ្រោះអគ្គិភ័យមួយនេះ បានបំផ្លាញ​សំណង់ប្រភេទថ្មបេតុងប្រក់សង័្កសី ដែលមានទំហំ​ ១០ម៉ែត្រ គុណ​ ១២ម៉ែត្រ​ ឆេះគ្រឿងអគ្គិសនីក្នុងឃ្លាំងអស់ទាំងស្រុង​ ។ តែសំណាងល្អពុំបណ្តាលឲ្យរាលដាល់ដល់ផ្ទះអ្នកជិតខាង និង  មិនមានមនុស្សរងរបួសឡេីយ។

នៅក្នុងប្រតិបត្តិការសង្គ្រោះនោះដែរ សមត្ថកិច្ចប្រើប្រាស់រថយន្ដការិយាល័យបង្ការ និងពន្លត់អគ្គិភ័យ ចំនួន​ ១៥រឿង ដោយប្រើប្រាស់ទឹកអស់​ ៣០ឡាន ស្មើ ១២០ម៉ែត្រគូប​ និងរថយន្តក្រុមហ៊ុនស្រាបៀរកម្ពុជា ចំនួន ១គ្រឿង ប្រើប្រាស់ទឹកអស់ ២ឡាន ស្មើ  ១២ម៉ែត្រគូប ទើបរលត់ទាំងស្រុង នៅវេលាម៉ោង​ ៤និង៣០នាទីទៀបភ្លឺ​ ថ្ងៃទី១២​ ខែកក្កដា ឆ្នាំ២០២១៕

អត្ថបទ៖ រ៉ាវុទ្ធ