ខេត្តកំពង់ស្ពឺ អត្រាអ្នក​ឆ្លងកូវីដ​ថយ​ចុះមកនៅត្រឹម​ជាង ១០​នាក់ ក្នុង១ថ្ងៃ

ភ្នំពេញ៖ ប្រធានមន្ទីរសុខាភិបាលខេត្តកំពង់ស្ពឺបានឱ្យដឹងនៅព្រឹកថ្ងៃទី៨សីហានេះថា បច្ចុប្បន្ននេះអត្រាឆ្លងជំងឺកូវីដ១៩នៅខេត្តកំពង់ស្ពឺបានធ្លាក់ចុះពីជាង១០០នាក់មកនៅត្រឹម១០នាក់ប៉ុណ្ណោះក្នុង១ថ្ងៃ។

លោក វេជ្ជបណ្ឌិត អោ វ៉ាន់ថេន ប្រធានមន្ទីរសុខាភិបាលខេត្តកំពង់ស្ពឺបានបញ្ជាក់ថា ពីមុនអត្រាឆ្លងនៅក្នុងខេត្តក្នុង១ថ្ងៃមិនក្រោមពី៨០ទៅជាង១០០នាក់ទេក្នុង១ថ្ងៃដោយសារបងប្អូនកម្មករកម្មការិនីឆ្លងជំងឺកូវីដ១៩ ហើយ​បានទៅចម្លងបន្តដល់ក្រុមគ្រួសារសាច់ញាតិនិងក្នុងសហគមន៍។ ប៉ុន្តែពេលនេះអត្រាឆ្លងកូវីដ១៩ក្នុងខេត្តបានធ្លាក់ចុះដោយក្នុង១ថ្ងៃពី១០ទៅ១៥នាក់ប៉ុណ្ណោះ ដោយសារការយល់ដឹងរបស់ប្រជាពលរដ្ឋពីវិធានការការពារខ្លួនពីជំងឺកូវីដ១៩ដូចជាពាក់ម៉ាស់ និងអនាម័យដៃ មាន​អាកុលឬជែល​ជាប់​ជានិច្ច​ពេល​ទៅ​ណា​មក​ណា ព្រោះ​តែ​ភ័យខ្លាចឆ្លង​ជំងឺដ៏កាចសាហាវនេះ។

លើសពីនេះទៀត ដោយសារការចាក់វ៉ាក់សាំងបានគ្របដណ្តប់បានច្រើនបានធ្វើឱ្យសភាពការឆ្លងបានកាត់បន្ថយបើឆ្លងក៏មានភាពស្រាលដែរ។

របាយការណ៍របស់​មន្ទីរ​សុខាភិបាល​ខេត្តកំពង់ស្ពឺ មានអ្នកឆ្លងជំងឺកូវីដ១៩សរុបជាង៤ពាន់នាក់ក្នុងនោះជាសះស្បើយជិត៤ពាន់នាក់កំពុងសម្រាកព្យាបាលនៅមន្ទីរពេទ្យជាង២០០នាក់ និងស្លាប់ចំនួន៩៨នាក់។

បើ​តាម​លោក វេជ្ជបណ្ឌិត អោ វ៉ាន់ថេន ករណីស្លាប់ដោយសារជំងឺកូវីដ១៩នៅខេត្តគឺមួយចំនួនបានស្លាប់នៅតាមផ្ទះពេលគ្រូពេទ្យចុះទៅយកសំណាក និងខ្លះទៀតបានស្លាប់ពេលបញ្ជួនមកដល់មន្ទីរពេទ្យដោយសារសភាពអ្នកជំងឺមានភាពធ្ងន់ធ្ងរគ្រូពេទ្យមិនអាចជួយសង្គ្រោះបាន និងមានតិចតួចណាស់ប៉ុណ្ណោះដែលស្លាប់នៅមន្ទីរពេទ្យ៕

អត្ថបទ៖ សំអឿន