ផ្លែមៀន៣០តោន ដែលលោក ឃួង ស្រេង ទិញពីប្រជាកសិករនោះ បានដឹកមកដល់សាលា រាជធានីភ្នំពេញហើយ

ផ្លែមៀនចំនួន៣០តោន ដែលលោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកស្រី ជា ស៊ីណា ឃួង ស្រេង បានកម្មង់ទិញ តាមការប្រកាសរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីចែករំលែកការលំបាករបស់ប្រជាកសិករ ដែលគ្មានទីផ្សារ ដោយសារការរាតត្បាតជំងឺកូវីដ- ១៩នោះ នៅព្រឹកថ្ងៃទី២១ ខែសីហានេះ ផ្លែមៀនទាំងនេះ បានដឹកមកដល់សាលារាជធានីភ្នំពេញហើយ។

ខណៈនេះ ក្រុមការងាររបស់រដ្ឋបាលរាជធានីភ្នំពេញ បាននឹងកំពុងធ្វើការបែងចែកបន្ត ទៅឲ្យអាជ្ញាធរខណ្ឌ មន្ទីរ កងកម្លាំងប្រដាប់អាវុធ មណ្ឌលកែប្រែ និងប្រគេនព្រះសង្ឃ នៅតាមវត្តទូទាំង រាជធានីភ្នំពេញផងដែរ។ មន្ត្រីរដ្ឋបាលរាជធានីភ្នំពេញ បានឲ្យដឹងថា ផ្លែមៀនទាំង៣០តោននេះ ត្រូវបានបែងចែកទៅឲ្យសាលាខណ្ឌទាំង១៤ មន្ទីរទាំង២៦ វត្តចំនួន១៥១វត្ត មជ្ឈមណ្ឌលកែប្រែឱកាសខ្ញុំ មណ្ឌលកែប្រែព្រៃស្ពឺ និងបែងចែក ទៅឲ្យកម្លាំងនគរបាល និងកងរាជអាវុធហត្ថ រាជធានីភ្នំពេញផងដែរ។

សូមជម្រាបថា កាលពីថ្ងៃទី២០ ខែសីហា ឆ្នាំ២០២១ម្សិលមិញ លោក ឃួង ស្រេង អភិបាល នៃគណៈអភិ​បាលរាជធានីភ្នំពេញនិងលោកស្រី ជា ស៊ីណា ឃួង ស្រេង បានកម្មង់ទិញ ផ្លែមៀនចំនួន៣០តោន ពីប្រជាកសិករ ទៅតាមការប្រកាស របស់សម្ដេចតេជោ ហ៊ុន សែន ដើម្បីចែករំលែកការលំបាក របស់ប្រជាកសិករ ខណៈដែលពួកគាត់កំពុងជួបបញ្ហាទីផ្សារ។

ក្នុងនោះ លោកនាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរងខេមរភូមិន្ទ និងជានាយក​រងខុទ្ទ​កាល័យ សម្តេចតេជោ ហ៊ុន សែន ជាអ្នកចាត់ចែងក្រុមការងារ ដើម្បីរៀបចំដឹកផ្លែមៀន មកជូនសាលារាជធានីភ្នំពេញ។

សម្ដេចតេជោ ហ៊ុន សែន បានបញ្ជាឲ្យលោកនាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង ប្រមូលទិញផ្លែ​មៀន និងតាង៉ែន របស់កសិករនៅតាមបណ្ដាខេត្តជាប់ព្រំដែន កម្ពុជា-ថៃ ដែលជួបប្រទះនូវបញ្ហា ក្នុងការនាំចេញទៅលក់នៅក្រៅប្រទេស ដោយសារការឆ្លងរីករាលដាលជំងឺកូវី-១៩។

សម្តេចតេជោ បានហៅការប្រមូលទិញមៀនថា ជាវិធីដោះទាល់ក្នុងកាលៈទេសៈដ៏លំបាក កុំឲ្យកសិករក្រីក្រខាតបង់ធ្ងន់ធ្ងរពេក ហើយការទិញនេះ ក៏មិនបានប្រើថវិកាជាតិនោះដែរ។

សម្តេចតេជោ ក៏បានរំលឹកដល់លោកនាយឧត្តមសេនីយ៍ ហ៊ីង ប៊ុនហៀង, អភិបាលខេត្តបាត់ដំបង និងអភិ​បាលខេត្តប៉ៃលិន ត្រូវទិញពីកសិករ គឺសំដៅដល់កសិករ ក្រីក្រ ដែលដាំមៀនដោយផ្ទាល់។ សម្រាប់ចំការ​មៀនរបស់មន្ត្រី ទាំងស៊ីវិល ទាំងកងកម្លាំងប្រដាប់អាវុធ ឬរបស់ឧកញ៉ា អ្នកឧកញ៉ា ឬអ្នកជំនួញត្រូវរកទីផ្សារ ដោយខ្លួនឯង៕ (ដោយ)៖ ស្រីរ័ត្ន