ធនាគារនៅតែដំណើរការល្អប្រសើរ ទោះប្រឈមកូវីដ១៩

លោក អ៊ិន ចាន់នី ប្រធានសមាគមធនាគារនៅកម្ពុជា មានប្រសាសន៍ថា មានស្ថាប័នធនាគារច្រើន បានផ្លាស់ប្ដូរឥរិយាបថ ងាកទៅរៀបចំហេដ្ឋារចនាសម្ព័ន្ធ ឌីជីថល ក្នុងបរិបទកូវីដ១៩ ដូច្នេះស្ថាប័នធនាគារ នៅតែអាចបម្រើអតិ​ថិជន​របស់ខ្លួនបាន តាមរយៈ ឌីជីថល ទាំងការផ្ដល់ឥណទាន សេវាសន្សំ និងមធ្យោបាយទូទាត់។

លោក បណ្ឌិត អ៊ិនចាន់នី ថ្លែងថា “ឥឡូវនេះ ឧបមាចង់ដាក់ពាក្យសុំខ្ចីលុយ មិនចាំបាច់មកធនាគារទេ គឺអាចបំពេញទម្រង់បែបបទតាម Mobile App ហ្នឹង ហើយផ្ញើប្រាក់ក៏ដូចគ្នាដែរ”។

លោក អ៊ិន ចាន់នី អះអាងថា វិស័យធនាគារនៅតែដំណើរការល្អប្រសើរ ហើយទទួលបានប្រាក់ចំណេញ ដោយសារតែស្ថាប័នធនាគារមួយៗ បានកែសម្រួល វិធីក្នុងការបម្រើអតិថិជន ការរៀបចំឥណទានឡើងវិញ ធ្វើឱ្យធនាគារអាចរក្សាបាននូវគុណភាពឥណទាន និងការកែាររីកចម្រើនរបស់អតិថិជនមួយចំនួន ដែលពួកគាត់បានកែសម្រួលអាជីវកម្មរបស់ខ្លួនផងដែរ។

របាយការណ៍របស់ធនាគារ អេស៊ីលីដាបង្ហាញថា រយៈពេល៦ខែឆ្នាំ២០២១នេះ ធនាគារ អេស៊ីលីដា ទទួលបានប្រាក់ចំណេញជាង ៨១ លានដុល្លារ កើនឡើងប្រមាណ ១១ ភាគរយ បើប្រៀបនឹងរយៈពេលដូចគ្នា កាលពីឆ្នាំ ២០២០៕ ដោយ៖​ ឡេង ដេត