បិទខ្ទប់ផ្សារក្រុងព្រៃវែងបណ្ដោះអាសន្ន បន្ទាប់ពីមានអាជីវករវិជ្ជមានកូវីដ

រដ្ឋបាលខេត្តព្រៃវែងសម្រេចបិទខ្ទប់ផ្សារក្រុងព្រៃវែងជាបណ្ដោះអាសន្នរយៈពេល១៤ថ្ងៃ​ បន្ទាប់ពីរកឃើញ​អាជីវករវិជ្ជមានជំងឺកូវីដ-១៩ ។

ក្នុងសេចក្ដីជូនដំណឹងបានបញ្ជាក់ថា ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ពីសហគមន៍មួយ​ទៅ​សហគមន៍មួយ និងដើម្បីការពារអាយុជីវិតបងប្អូនប្រជាពលរដ្ឋ សុខភាពសាធរណៈ និងសណ្ដាប់ធ្នាប់​សង្គម រដ្ឋបាលខេត្តព្រៃវែងសូមធ្វើការផ្អាកជាបណ្ដោះអាសន្នផ្សារក្រុងព្រៃវែង ទាំងក្នុងនិងក្រៅបរិវេណផ្សារ ស្ថិតនៅភូមិលេខ៣ សង្កាត់កំពង់លាវ ក្រុងព្រៃវែង រយៈពេល១៤ថ្ងៃ ចាប់ពីថ្ងៃទី២៩ ខែកញ្ញា រហូតដល់​ថ្ងៃ​ទី១២ ខែតុលា ឆ្នាំ២០២១ ។

ទន្ទឹមគ្នានេះ អាជ្ញាធរកំពុងបន្តស្រាវជ្រាវ និងស្វែងរកអ្នកប៉ះពាល់ដោយផ្ទាល់និងប្រយោល​ដើម្បីយកសំ​ណាកធ្វើតេស្ដរកមេរោគកូវីដ-១៩ បន្ថែមទៀត៕

អត្ថបទ៖ សុខុម