ផែថងថាន៖ ថៃ និងកម្ពុជា បានពិភាក្សាគ្នាលើបញ្ហាពន្ធរបស់អាមេរិក

នាយករដ្ឋមន្រ្តីថៃ លោកស្រី ​ផែថងថាន ស៊ីណាវ៉ាត្រ បាន​ថ្លែង​នៅថ្ងៃព្រហស្បតិ៍នេះ ក្រោយ​បញ្ចប់ទស្សនកិច្ចផ្លូវការនៅប្រទេស​កម្ពុជា ថា​ លោកស្រី និងនាយករដ្ឋមន្រ្តីកម្ពុជា សម្តេចមហាបវរធិបតី ហ៊ុន ម៉ាណែត ​បាន​ពិភាក្សាគ្នា​អំពីបញ្ហា​ពន្ធគយបដិការរបស់​សហរដ្ឋអាមេរិក រួមជាមួយ​បញ្ហា​ផ្សេងៗទៀត​។ នេះបើតាម​ការចុះផ្សាយរបស់​កាសែត The Nation។

ក្នុងការពិភាក្សាជាមួយ​ភាគីកម្ពុជា លោកស្រី ​ផែថងថាន បានកត់សម្គាល់ថា ​ថៃបាននិងកំពុងតាមដានយ៉ាងដិតដល់នូវការ​វិវត្តលើ​បញ្ហា​ពន្ធ ដើម្បីរៀបចំយុទ្ធសាស្ត្រ​ប្រកបដោយ​ព័ត៌មានល្អៗ សម្រាប់ការចរចានាពេលខាងមុខ។

លោកស្រី ផែថងថាន ​បាន​និយាយថា៖ «ក្នុងរយៈពេលតិចជាង ៣០ ថ្ងៃ យើងបានឃើញពីការផ្លាស់ប្តូរសំខាន់ៗរួចហើយ។ វាច្បាស់ណាស់ថា សហរដ្ឋអាមេរិកក៏កំពុងសង្កេតមើលប្រតិកម្មជាសកលយ៉ាងដិតដល់ផងដែរ ព្រោះនេះគឺជាបញ្ហាថ្មី និង​កំពុងវិវត្តទៅមុខ»។

លោកស្រីបន្តថា៖ «ប្រទេសថៃបាននិងកំពុងរៀបចំយ៉ាងហ្មត់ចត់នូវព័ត៌មាន និងស្វែងរកសកម្មភាពបន្ថែម។ ក្នុងកិច្ចពិភាក្សាជាមួយលោកនាយករដ្ឋមន្ត្រី ហ៊ុន ម៉ាណែត យើងបាននិយាយអំពីកិច្ចសហប្រតិបត្តិការកម្រិតអាស៊ាន។ អាស៊ានមានធនធានសម្បូរបែប និងចំណុចខ្លាំងពិសេស ហើយយើងជឿជាក់ថា កិច្ចសហប្រតិបត្តិការនឹងពង្រឹងអំណាចចរចារបស់យើង»។

នាយករដ្ឋមន្រ្តីថៃវ័យក្មេងដដែល​បន្ថែមថា ​ទាំងប្រទេសថៃ និងកម្ពុជា បានពិគ្រោះជាមួយមេដឹកនាំអាស៊ានផ្សេងទៀត ហើយបានឯកភាពថា កិច្ចសហប្រតិបត្តិការក្នុងតំបន់នឹងពង្រីកសំឡេង និងការចរចារបស់អាស៊ាន។ ប្រទេសទាំង​ ២ បាន​ប្តេជ្ញាធ្វើការយ៉ាងជិតស្និទ្ធ និងរឹងមាំជាមួយគ្នា ដើម្បីដោះស្រាយបញ្ហាប្រឈមនានា សំដៅទៅរកដំណោះស្រាយ «ឈ្នះ-ឈ្នះ» ខណៈប្រទេស​ថៃ ក៏​កំពុងពិគ្រោះយោបល់ជាមួយគ្រប់វិស័យ រួមទាំងវិស័យឯកជនផងដែរ ដើម្បីតាមដានស្ថានការណ៍យ៉ាងប្រុងប្រយ័ត្ន និងឆ្លើយតបទៅតាមនោះ។

គួរគូសបញ្ជាក់ថា លោកស្រី ផែថងថាន បានធ្វើដំណើរទស្សនកិច្ចផ្លូវការនៅប្រទេសកម្ពុជារយៈពេល ២ ថ្ងៃ ថ្ងៃទី ២៣-២៤ មេសា ដែលជាពេល​គំរប់ខួបលើកទី ៧៥ នៃទំនាក់ទំនងការទូតរវាង​ថៃ និងកម្ពុជា។ ក្រោមទស្សនកិច្ចដដែល ភាគីទាំង២បាន​ប្តេជ្ញាបន្តទំនាក់ទំនងទ្វេភាគីដ៏រឹងមាំ ដោយមាន​ការ​​ចុះហត្ថលេខាលើកិច្ចព្រមព្រៀងរួមចំនួន ៧ ផងដែរ​៕