នាយករដ្ឋមន្ត្រីប្រាប់ក្រុមប្រឆាំងឱ្យមានគុណធម៌ជាមនុស្សសិនមុនធ្វើនយោបាយ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បាន​ប្រាប់ទៅក្រុមប្រឆាំងថាបើចង់ធ្វើនយោបាយឱ្យគេគោរពសូមធ្វើខ្លួនជាមនុស្សឱ្យគេគោរពជាមុនសិន។ សម្ដេចថាកត្តាបីសម្រាប់អ្នកនយោបាយគឺ គុណធម៌ សច្ចៈធម៌ និងជំហរនឹងនរច្បាស់លាស់។

ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការកំពង់ផែទេសចរណ៍អន្តរជាតិកំពត ក្នុងស្រុកទឹកឈូរ ខេត្តកំពត ព្រឹកថ្ងៃទី២១ ខែមេសា ឆ្នាំ២០២៥នេះ សម្ដេចធិបតី ហ៊ុន ម៉ាណែត បាន​ប្រតិកម្មខ្លាំងៗទៅ​ហ្នឹងសេចក្ដីថ្លែងការណ៍របស់ចលនាប្រឆាំងដែលបានលើកឡើងថា កម្ពុជា​បានប្រគល់ឱ្យចិន​នូវសិទ្ធិគ្រប់គ្រងទាំងស្រុងលើប្រទេសចាប់ពីសន្ដិសុខ និងពាណិជ្ជកម្ម គឺជាការបំភ្លៃ និងស្មើនឹងការបំផ្លាញខ្លួនឯងរបស់ក្រុមប្រឆាំង។ សម្ដេចបានផ្ដាំទៅឱ្យអ្នកនយោបាយប្រឆាំងទាំងនោះឱ្យស្គាល់ពីមូលធននយោបាយ ដែលត្រូវមានគុណធម៌សីលធម៌ សច្ចៈធម៌ និងជំហរនឹងនរច្បាស់លាស់។

សម្ដេចថា៖ «គុណធម៌ សីលធម៌ ជាអ្នកនយោបាយគឺស្អី? គឺគុណធម៌ជាមនុស្ស! បើចង់ធ្វើអ្នកយោបាយឱ្យគេគោរពត្រូវធ្វើមនុស្សឱ្យគេគោរពសិន» ។

សម្ដេចធិបតីបានពន្យល់ថា សីលធម៌អ្នកនយោបាយមិនត្រូវយកគំនុំផ្ទាល់ខ្លួនវាយប្រហារទៅដល់គ្រួសារដៃគូបដិបក្ខនោះទេ ត្រូវទទួលស្គាល់ពីភាពខុសគ្នានៃទស្សនៈនយោបាយមិនត្រូវមើលងាយការងាររបស់របស់ដៃគូរ និងមិនត្រូវកេងចំណេញនយោបាយពេលគេមានទុក្ខ ឬប្រជាជនមានទុក្ខទេ។

សម្ដេចធិបតីបញ្ជាក់ថា គ្មានអ្វីកើតឡើងដូចការលើកឡើងរបស់ក្រុមប្រឆាំងនោះទេ ផ្ទុយទៅវិញកម្ពុជា-ចិនបានឯកភាពក្នុងទៅលើការគោរពអធិបតេយ្យភាព និងឯកភាពរបស់គ្នាទៅវិញទៅមក ហើយកម្ពុជាធានានូវភាពជាម្ចាស់ការក្នុងការកំណត់ទិសដៅទាំងក្នុងប្រទេស និងអន្តរជាតិដោយខ្លួនឯង។

អ្នកស្រាវជ្រាវការអភិវឌ្ឍសង្គម-សេដ្ឋកិច្ច លោកបណ្ឌិត ជ័យ តិច មានប្រសាសន៍ថាការនិយាយបំផ្លើសរបស់ក្រុមប្រឆាំងមានគោលបំណងតែមួយគឺបន្ទុចបង្អាក់ដល់ដំណើរការអភិវឌ្ឍប្រទេសជាតិ បង្កការមិនទុកចិត្តរបស់អ្នកវិនិយោគ ពាណិជ្ជកម្ម ទេសចរណ៍ និងធ្វើឱ្យប៉ះពាល់ដល់សេដ្ឋកិច្ចរបស់ពលរដ្ឋ​។ លោកយល់​ថាការពិតនៅតែជាការពិត ហើយអ្នកនិយាយបំភ្លៃនឹងធ្វើឱ្យបាត់បង់នូវទំនុកចិត្តពីពលរដ្ឋមិនខាន។

លោកថា៖ «ការឆ្លើយតបរបស់សម្ដេចធិបតីនាយករដ្ឋមន្ត្រីលើការបំផ្លើសនេះគឺជារឿងមួយល្អដើម្បីឱ្យប្រជាពលរដ្ឋអាចទទួលបានព័ត៌មានពិត ទទួលយុត្តិធម៌ និងសច្ចភាពនៃកិច្ចប្រឹងប្រែងរបស់រាជរដ្ឋាភិបាល»។

លោកបណ្ឌិត ជ័យ តិច ជំរុញដល់រដ្ឋាភិបាលបន្តកិច្ចការរបស់ខ្លួនជូនពលរដ្ឋឱ្យចេញជាលទ្ធផលជាក់ស្ដែងបន្តទៀតដោយថាពលរដ្ឋពិតជាអាចវាយតម្លៃបានរវាងការពិត និងការ​បំភ្លៃ។

គួរឱ្យដឹងផងដែរថា កម្ពុជា-ចិនបានចេញសេចក្ដីថ្លែងការណ៍រួមមួយកាលពីថ្ងៃទី១៨ ខែមេសា បានសម្រេចនូវការឯកភាពគ្នាជាច្រើនទាក់ទងនឹងការកសាងសហគមន៍វាសនារួមកម្ពុជា-ចិន ការអនុវត្តគំនិតផ្ដួចផ្ដើមអភិវឌ្ឍន៍សកល សន្ដិសុខសកល និងអរិយធម៌សកល។ ក្នុងនោះចំណុចទី៣ ក្នុងការកសាងសហគមន៍​វាសនារួមកម្ពុជា-ចិន បានសរសេរថា «ភាគីទាំងពីរបញ្ជាក់ជាថ្មីនូវការគាំទ្រផលប្រយោជន៍ស្នូល អធិបតេយ្យភាពជាតិ និងបូរណភាពទឹកដីរបស់គ្នា​ទៅវិញទៅមក ព្រមទាំងប្រឆាំងដាច់ខាតចំពោះការជ្រៀតជ្រែករបស់បរទេស​ក្នុងកិច្ចការផ្ទៃក្នុងប្រទេសនីមួយៗ»៕

អត្ថបទដោយ ហ៊ុន សិរីវឌ្ឍន៍