ក្មេងស្រីអាយុ៤ឆ្នាំលក់ផ្កា៖ សម្ដេចតេជោ ស្នើកុំវែកញែករឿងកេងប្រវ័ញ្ចពលកម្មកុមារ មុនរឿងក្រពះ និងបញ្ហាគ្រួសារ

ជំនួយការរបស់សម្ដេចតេជោ ហ៊ុន សែន រកឃើញកុមារីម្នាក់ដែលលក់កម្រងផ្កាទទួលបានក្ដីស្រឡាញ់ និងការកោតសរសើរនៅលើបណ្ដាញសង្គម។ តាមសម្ដេចតេជោ ហ៊ុន សែន កុមារីលក់កម្រងផ្ការូបនេះ មានឈ្មោះថា ស៊ុន ស្រីតី អាយុ៤ឆ្នាំ។ ទន្ទឹមនឹងការរកឃើញកុមារីដែលសម្ដេចតេជោ អាណិតស្រឡាញ់រូបនេះ សម្ដេច ស្នើឱ្យអ្នកប្រើប្រាស់បណ្ដាញសង្គម កុំទាន់វែកញែកថា ក្រុមគ្រួសាររបស់កុមារី កេងប្រវ័ញ្ចពលកម្មកុមារមុនបញ្ហាក្រពះ ដើម្បីរស់រានមានជីវិតដែលជាសិទ្ធដ៏ចម្បងបង្អស់ ជាពិសេសរឿងវិបត្តិគ្រួសារ។

សម្ដេចតេជោ ហ៊ុន សែន អះអាងតាមរយៈទំព័រហ្វេសប៊ុកផ្លូវការនៅល្ងាចថ្ងៃទី២៣ ខែមេសា ថា សម្ដេច នឹងឱ្យឪពុកម្តាយរបស់កុមារីលក់កម្រងផ្កា និងកូនៗទាំងអស់ចូលជួបសម្ដេច នៅគេហដ្ឋានរបស់សម្ដេច ក្នុងក្រុងតាខ្មៅ នៅព្រឹកថ្ងៃអាទិត្យ ទី២៧មេសាឆ្នាំ២០២៥ ដោយពេលនោះ សម្ដេចនឹងពិភាក្សាអំពីការរៀបចំគ្រួសាររបស់កុមារីលក់កម្រងផ្កាមួយនេះ ដែលមានទាំងចៅស៊ុនស្រីតីគួរឲ្យអាណិតស្រឡាញ់ផងដែរ។​

ចំពោះការវែកញែកអំពីរឿងកេងប្រវ័ញ្ចពលកម្មកុមារ សម្ដេចតេជោ ហ៊ុន សែន ស្នើកុំឱ្យវែកញែកមុនរឿងសិទ្ធិរស់រានមានជីវិត និង​បញ្ហាក្នុងគ្រួសារដូច្នេះ ៖«ខ្ញុំសូមអរគុណចំពោះបងប្អូនដែលចូលមកខមិន(comment)លើកពីសិទ្ធិកុមារតែខ្ញុំសូមអង្វរករសូមកុំទៅលឿនហួសពីសិទ្ធិរស់រានមានជីវិតដែលវាផ្តើមចេញពីក្រពះ និងសូមកុំប្រញាប់វិនិច្ឆ័យមុនពេលយើងដឹងរឿងពិតដែលវាជាការវាយប្រហារលើឪពុកម្តាយចៅស្រីដ៏កំសត់នេះថែមទៀត»។

ចំពោះមុខការជជែកអំពីបញ្ហាកេងប្រវ័ញ្ចពលកម្មកុមារ សម្ដេចតេជោ ហ៊ុន សែន ដែលជាកូនអ្នកខេត្តកំពង់ចាម រម្លឹកថា កាលពីសម្ដេចនៅវ័យកុមារ អាយុ៥ឬ៦ឆ្នាំ សម្ដេចក៏ធ្លាប់ចុះទឹករកខ្យង ចាប់ត្រីចាប់ក្តាមឲ្យម៉ែស្លទទួលទានដែរ ដែលសកម្មភាពបែបនេះ វាលំបាកជាង ការដែលកុមារី ស៊ុន ស្រីតី ដើរលក់ផ្កាទៅទៀត។

ចំពោះរឿងបែបនេះ សម្ដេចតេជោ ហ៊ុន សែន អះអាងថា មិនអាចនិយាយថាពលកម្មកុមារ សិទ្ធិកុមារ ដោយបំភ្លេចចោលសិទ្ធិមានចំណីអាហារបានទេ ព្រោះដោយសារគ្មានជម្រើស ព្រោះឳពុក និងបងៗរបស់សម្ដេចមិននៅផ្ទះ ចំណែកម្ដាយរបស់សម្ដេចខ្លាចសត្វឈ្លើងមិនហ៊ានចុះទឹក ចំណែកប្អូនស្រីៗរបស់សម្ដេចនៅតូចៗមិនចេះហែលទឹកតម្រូវឲ្យសម្ដេចត្រូវរាវខ្យង រកត្រី ក្នុងទឹក ដើម្បីក្រពះ។

សម្ដេចតេជោ ហ៊ុន សែន នៅតែអះអាងម្ដងហើយម្ដងទៀតថា៖«សិទ្ធិរស់រានមានជីវិតត្រូវតែមានមុនគេ បើស្លាប់ទៅហើយ សូមកុំនិយាយពីសិទ្ធិផ្សេងទៀតធ្វើអ្វី»៕