ឥណ្ឌាប្រកាសជូនរង្វាន់ ២៣ ៤០០ដុល្លារអាមេរិក ឲ្យអ្នកផ្តល់ព័ត៌មាន ឈានដល់ការចាប់ខ្លួនខ្មាន់កាំភ្លើង នៅកាស្មៀរ

ជុំវិញហេតុការណ៍បាញ់ប្រហារលើក្រុមអ្នកទេសចរនៅតំបន់កាស្មៀរ ពេលនេះប៉ូលិសឥណ្ឌាបានប្រកាសផ្តល់ប្រាក់រង្វាន់ ២លានរូពី ស្មើនឹង ២៣ ៤០០ដុល្លារអាមេរិក ដល់នរណាដែលឲ្យព័ត៌មានឈានដល់ការចាប់ខ្លួនជនសង្ស័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃពុធទី២៣ខែមេសាឆ្នាំ២០២៥ ខ្មាន់កាំភ្លើងបានបើកការវាយឆ្មក់ បាញ់ប្រហារយ៉ាងរន្ធត់ទៅលើទេសចរដែលនាំគ្នាទៅលេងក្រុង Pahalgam នៃតំបន់កាស្មៀរខាងគ្រប់គ្រងដោយប្រទេសឥណ្ឌា បណ្តាលឲ្យស្លាប់ចំនួន២៦នាក់។

ដ្បិតមិនទាន់មានក្រុមណាចេញមុខអះអាងទទួលខុសត្រូវ ប៉ុន្តែប៉ូលិសឥណ្ឌាហ៊ានអះអាថា ខ្មាន់កាំភ្លើងមានគ្នា៣នាក់ ជាសមាជិកនៃក្រុមសកម្មប្រយុទ្ធ Lashkar-e-Taiba (LeT) ដែលមានមូលដ្ឋាននៅប្រទេសប៉ាគីស្ថាន។ 

ប៉ូលិសឥណ្ឌា និយាយថា មានជនសង្ស័យ២នាក់ក្នុងចំណោម៣នាក់នោះ គឺជាជនជាតិប៉ាគីស្ថាន ឯម្នាក់ទៀតគឺជាបុរសរស់នៅក្នុងតំបន់មកពីទីក្រុង Anantnag។

ឥឡូវ ប៉ូលិសបានប្រកាសផ្តល់ប្រាក់រង្វាន់ ២លានរូពី ដល់នរណាដែលឲ្យព័ត៌មានឈានដល់ការចាប់ខ្លួនជនសង្ស័យ ហើយថែមទាំងធានាលាក់ការណ៍និងអត្តសញ្ញាណនៃអ្នកឲ្យដំណឹងផងដែរ។

ទន្ទឹមនោះ ប៉ូលិសបានឃាត់ខ្លួនប្រុសៗនៅក្នុងតំបន់កាស្មៀរប្រមាណ ១ ៥០០នាក់ ដើម្បីធ្វើការសាកសួរ ជុំវិញការវាយប្រហារនេះ។

ការវាយប្រហារដ៏រន្ធត់នេះ ធ្វើឲ្យទំនាក់ទំនងរវាងឥណ្ឌានិងប៉ាគីស្ថាន កាន់តែតានតឹងនិងធ្លាក់ចុះដល់កម្រិតទាបសាជាថ្មី។ ហេតុការណ៍នេះទៀតសោត ធ្វើឲ្យឥណ្ឌាក្តៅស្លឹកត្រចៀក ឈានដល់ការបិទច្រកព្រំដែនសំខាន់របស់ខ្លួនជាមួយប៉ាគីស្ថាន បណ្តេញអ្នកការទូតយោធានិងផ្អាកសន្ធិសញ្ញាចែករំលែកទឹកដ៏សំខាន់ទៀតផង៕

អត្ថបទ៖ សុខ សុវណ្ណ

ចុចអាន៖ លោក Modi ប្តេជ្ញាតាមចាប់ខ្មាន់កាំភ្លើងដែលបាញ់សម្លាប់ទេសចរនៅកាស្មៀរ ដល់ជើងមេឃ