ទឹកទន្លេទាំង ៣ ក្នុងខេត្តស្ទឹងត្រែង បានស្រកចុះវិញ បន្ទាប់ពីហក់ឡើងជាង ៣ ម៉ែត្រ

លោក ប៉ាង ប៉េង ប្រធានមន្ទីរធនធានទឹក និងឧតុនិយមខេត្តស្ទឹងត្រែង បានឱ្យដឹងថា ទឹកទន្លេទាំង៣ ក្នុងខេត្តស្ទឹងត្រែង មានទន្លេមេគង្គ ទន្លេសេកុង និងទន្លេសេសាន ទឹកបានស្រកចុះវិញបន្ទាប់ពីហក់ឡើងប្រមាណ ៣ ម៉ែត្រនៅប៉ុន្មានថ្ងៃមុន។

ទឹកទន្លេមេគង្គ ថ្ងៃនេះបានស្រកចុះមកនៅ ៧.៦៨ ម៉ែត្រ ខណៈម្សិលមិញ ៨.២៤ ម៉ែត្រ ទន្លេសេសាន ទឹកស្រកនៅកម្ពស់ ៧.៤៧ ម៉ែត្រ ខណៈថ្ងៃម្សិលមិញ កម្ពស់ទឹក ៨.៥២ ម៉ែត្រ ចំណែកឯទឹកទន្លេសេកុង កម្ពស់ទឹក ៧.៦០ ខណៈម្សិលមិញ ៨.៥២ ម៉ែត្រ។

លោកប្រធានមន្ទីរធនធានទឹកខេត្តស្ទឹងត្រែងបានឱ្យដឹងថា ទឹកទន្លេទាំងបីក្នុងខេត្តស្ទឹងត្រែងកាលពី ២ ថ្ងៃមុន មានការហក់ឡើងខ្លាំង រហូតជិត៣ម៉ែត្រ និងជាង ៣ ម៉ែត្រ ធ្វើឲ្យមានការព្រួយបារម្ភតែរហូតមកដល់ថ្ងៃទី ២៨ កញ្ញានេះ ដោយស្ថានភាពទឹកទន្លេទាំង៣ ខ្លះបានស្រកចុះជិតមួយម៉ែត្រ។     

លោកបន្តថា កាលពីបីថ្ងៃមុនទឹកឡើងខ្លាំងនោះ ដោយសារមានកូនព្យុះតូចមួយ នៅប្រទេសវៀតណាម តែរហូតមកដល់ថ្ងៃនេះ កូនព្យុះនោះ បានរលាយអស់ហើយ និងមិនមានភ្លៀងធ្លាក់នោះ ធ្វើឱ្យទឹកស្រកចុះជាបណ្ដើរបណ្ដើរវិញ៕

អត្ថបទៈ ងិនលីម