ស៊ើបអង្កេត​ឧត្តម​សេនីយ៍​យោធា​ម្នាក់​​ ជាប់​ពាក់ព័ន្ធ​ការ​​ទន្ទ្រាន​ដីព្រៃលិចទឹក​ ៦០០ ហិកតា​

សមត្ថកិច្ចជំនាញបានចុះស៊ើបអង្កេត លោកឧត្តមសេនីយ៍ទោ ភ្លន់ តារា អតីតមេបញ្ជាការតំបន់ប្រតិបត្តិការសឹករងខេត្តបន្ទាយមានជ័យ ពាក់ព័ន្ធក្នុងករណីទន្ទ្រានយកដីព្រៃលិចទឹកចំនួន ៦០០ហិកតា ក្នុង តំបន់៣ ស្ថិតនៅ ភូមិសាស្ត្រ ឃុំភ្នំលៀប និងឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ។

មន្ត្រីអាជ្ញាធរ និងសមត្ថកិច្ច រួមទាំងតុលាការខេត្តបន្ទាយមានជ័យ បានយកសំណុំរឿងល្មើសដែលលោក ភ្លន់ តារា ច្ចុប្បន្នជាមេបញ្ជាការរងយោធភូមិភាគទី៥ មកពិនិត្យ អង្កេតស្រាវជ្រាវយ៉ាង​យកចិត្ត​ទុកដាក់ហើយ ក្នុងនោះ រឿងធំ២ដែលបានប្រព្រឹត្តឡើងកន្លងមក​យកមកអនុវត្តច្បាប់​ប្រឆាំងនឹងលោក បានរុករានដុតទន្ទ្រាន ឈូសឆាយ ហ៊ុព័ទ្ធយកជាកម្មសិទ្ធិខុសច្បាប់ ហើយធ្វើ​ស្រែប្រាំង ស្រែវស្សាជួលឲ្យគេធ្វើខ្លះ ធ្វើខ្លួនខ្លះ ប្រមាណ៦០០ហិកតា នៅ ដីព្រៃលិចតំបន់៣។

យោងឯកសារបែកធ្លាយមួយបានឲ្យដឹងថា កាលពីថ្ងៃទី២ ខែ តុលា ឆ្នាំ ២០១២ លោកឧត្តមសេនីយ៍ ភ្លន់ តារា បានធ្វើសំណើរលាយលក្ខណ៍អក្សរទៅ កាន់លោក អ៊ុង អឿន អភិបាលខេត្តបន្ទាយ​មានជ័យ ឆ្នាំ២០០៨-២០១៣ ស្នើសុំអនុញ្ញាតប្រើប្រាស់និងកម្មសិទ្ធិលោកលើដីស្រែ ចំនួន១៥០​ហិកតា ស្ថិតនៅ ភូមិត្រពាំងស្វាយ ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ដើម្បីឲ្យកង​ទ័ពប្រជាជនវៀតណាម ខេត្តដុងថាប់ប្រទេសវៀតណាម មកជួយផ្នែកបច្ចេកទេស កសិកម្ម​បង្កបង្កើន​ផល និងចិញ្ចឹមសត្វ ដល់យោធាកម្ពុជា ដីស្រែខាងលើនេះ គឺជារបស់វរៈសេនាតូចលេខ១ ចំណុះតំបន់ប្រតិបត្តិការសឹករងខេត្តបន្ទាយមានជ័យ បានប្រើប្រាស់ធ្វើស្រែ និងចិញ្ចឹមសត្វពាហនៈផ្សេងៗ ចាប់តាំងពីឆ្នាំ២០០១ រហូតដល់បច្ចុប្បន្ន ២០១២ តែដីនេះពុំមានជាប់ពាក់ព័ន្ធ ជាមួយប្រជាពលរដ្ឋនោះឡើយ។

តាមរយៈឯកសារកិច្ចសន្យាទិញលក់ដីក្រោយស្នើសុំបានដី ១៥០ហិកតាខាងលើនេះ ពីរដ្ឋបាលខេត្តរួចហើយ លោក.ភ្លន់ តារា មិនបានយកដីទាំងនោះ ទៅ ឲ្យកងទ័ពបង្កបង្កើនផលនិងចិញ្ចឹមសត្វអីនោះទេ ផ្ទុយទៅ វិញ បានយកដីទាំងនោះទៅលក់ឲ្យឈ្មួញអ្នកទិញចំនួន៨នាក់ ចាប់ពីអំឡុងឆ្នាំ២០១២ រហូតដល់ដើមឆ្នាំ២០១៦ ហើយទើបប្រមូលលុយបានអស់ នៅក្នុងឆ្នាំ២០១៨នេះទេ។

លោក ភ្លន់ តារាធ្លាប់ប្រាប់នូវរឿងដី ១៥០ហិកតានេះ ថាដីនោះត្រូវបានថ្នាក់លើឯកភាពឲ្យដោះដូរលក់ ហើយបានកាត់ចេញដីរបបរបស់កងកម្លាំងហើយដែរគឺជាដីកម្មសិទ្ធិផ្ទាល់ខ្លួនរបស់លោក ដែលបានពីសហគមន៍ព្រៃឈើកូនខ្លែង ស្រុកភ្នំស្រុកប្រគល់ឲ្យលោក៕

អត្ថបទ៖ វ៉ាន់ ណាង