អភិបាលរាជធានី​៖ ឆ្នាំ ២០២១​ អាជ្ញាធរ​ចុះជួយ​សង្គ្រោះ​ពលរដ្ឋ​ពីជំងឺកូវីដ១៩​ និង​គ្រោះទឹកជំនន់​

លោក ឃួង ស្រេង អភិបាល នៃគណៈអភិបាលរាជធានីភ្នំពេញបានថ្លែងថា នៅក្នុងឆ្នាំ ២០២១​ កន្លងមក​សកម្មភាពរបស់អាជ្ញាធរបានកាត់បន្ថយការចុះជួបប្រជាពលរដ្ឋនៅតាមមូលដ្ឋាន ដោយជំនួស​មក​វិញនូវសកម្មភាពសង្គ្រោះប្រជាពលរដ្ឋពីជំងឺកូវីដ-១៩ និងប្រជាពលរដ្ឋរងគ្រោះ​ដោយសារ​ជំនន់ទឹកភ្លៀង ព្រមទាំងការផ្ដល់ជំនួយមនុស្សធម៌ចាំបាច់។

នៅក្នុងពិធីបើកសន្និបាត បូកសរុបលទ្ធផលការងារប្រចាំឆ្នាំ ២០២១ និងលើកទិសដៅការងារឆ្នាំ ២០២២ របស់រដ្ឋបាលរាជធានីភ្នំពេញ នៅព្រឹកថ្ងៃទី ២ ខែមីនា ឆ្នាំ ២០២២ លោក ឃួង ស្រេង បានលើកឡើងថា ក្រុមការងារថ្នាក់ជាតិចុះមូលដ្ឋានខណ្ឌទាំង ១៤ បានខិតខំរៀបចំកិច្ចប្រជុំតាមប្រព័ន្ធទំនាក់ទំនងសង្គម ដើម្បីដោះស្រាយបញ្ហាប្រឈមជូនប្រជាពលរដ្ឋ ដោយរក្សាបាននូវប្រសិទ្ធភាព និងនិរន្តរភាពការងារមូលដ្ឋាន។

លោកអភិបាលរាជធានីភ្នំពេញអះអាងថា គណៈអភិបាលរាជធានីភ្នំពេញ បានបើកកិច្ចប្រជុំទៀងទាត់ដើម្បីពិនិត្យ ពិភាក្សា និងដាក់ចេញវិធានការចាំបាច់ ពាក់ព័ន្ធទៅនឹងកិច្ចការពារសន្តិសុខ-សណ្ដាប់ធ្នាប់ ការអភិវឌ្ឍ បញ្ហាអនាម័យ-បរិស្ថាន ការគ្រប់គ្រងវិបត្តិបង្កឡើងដោយជំងឺកូវីដ-១៩ និងជំរុញការអនុវត្តយុទ្ធនាការជាតិចាក់ វាំក់សាំង ជូនប្រជាពលរដ្ឋ៕

អត្ថបទ៖ ស្រីរ័ត្ន