បណ្ឌិត ហ៊ុន ម៉ាណែត ​​ប្រាប់សមាជិកទាំងអស់​មានមោទនភាព​​ និងជំរុញផ្សព្វផ្សាយសមិទ្ធផល

លោក​បណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍ នៃគណៈកម្មាធិការ​កណ្តាល និងជាប្រ​ធានយុវជនគណបក្សប្រជាជនកម្ពុជាថ្នាក់កណ្តាល ​​ប្រាប់ឱ្យសមាជិក សមាជិកាបក្សទាំងអស់​មានមោទនភាព​​ និងជំរុញផ្សព្វផ្សាយសមិទ្ធផលរបស់បក្ស​។ ការ​ថ្លែងបែបនេះ នៅក្នុងពិធីប្រកាសទទួលស្គាល់យុវជន ជាសមាជិកគណបក្សប្រជាជនកម្ពុជា ស្រុកជើងព្រៃ ​ខេត្តកំពង់ចាម នាព្រឹកថ្ងៃទី០២ ខែមេសា ឆ្នាំ២០២២នេះ។

មានប្រសាសន៍នៅក្នុងពិធីនោះ លោកបណ្ឌិត ហ៊ុន ម៉ាណែត ​បាន​ស្វាគមន៍ និងអបអរសាទរចំពោះការចូលរួមរបស់យុវជន យុវនារី ជាសមាជិកថ្មី​នៅក្នុង​មហាគ្រួសារនៃគណបក្សប្រជាជនកម្ពុជា។ នៅក្នុងសង្គមប្រជាធិបតេយ្យ​កម្ពុជា យើងមានគណបក្សនយោបាយ​ច្រើន ដោ​យក្នុង​នេះមហា​គ្រួសារគណបក្សប្រជាជនកម្ពុជា គឺជា​គ្រួសារធំជាងគេ ដែលមាន​សមាជិកជាយុវជនជាង ​៣ លាននាក់នៅទូទាំងប្រទេស។ សំខាន់ជាងនេះ គឺជាគ្រួសារ ដែល​មាន​គុណបំណាច់ និងស្នាដៃយ៉ាងធំធេងនៅក្នុងការបម្រើ និងការពារជាតិ និងប្រជាជន ដោយស្មោះត្រង់ និង​ដោយគ្មានការបែងចែករើសអើង។​

លោកបណ្ឌិត ហ៊ុន ម៉ាណែត ​​សូមសមាជិក សមាជិកាបក្សទាំងអស់​មានមោទនភាព​ចំពោះ​មហាគ្រួសារ​មួយនេះ ដែលមាន​សម្តេចអគ្គមហាសេនាបតីតេជោ ហ៊ុន សែន ជាប្រមុខ និងសូមបន្តចូលរួមជួយសង្គម ជួយសហគមន៍ ជួយគ្រួសារ ទោះជាក្នុងលក្ខណៈបុគ្គលក្តី ឬជាក្រុមក្តី ជាពិសេស សមាជិក សមាជិកាបក្ស​ទាំង​អស់ ក៏ត្រូវ​ដើរតួនាទីផងដែរ នៅក្នុងការជំរុញផ្សព្វផ្សាយសមិទ្ធផលរបស់បក្ស និងការពារកិត្តិយស និងសច្ចភាពរបស់បក្ស។ ក្នុងរយៈពេលជាង​៤០ ឆ្នាំ កន្លងមកនេះ នៅក្រោមការខិតខំប្រឹងប្រែង និងបូជាលះបង់របស់មន្ត្រីបក្សជាច្រើន​ជំនាន់ គឺគណបក្សប្រជាជនកម្ពុជាទទួលបានជោគជ័យ និងសមិទ្ធផលយ៉ាងធំធេងលើការដឹកនាំនាវាកម្ពុជាមកដល់ចំណុចនេះ។ តទៅមុខទៀត គណបក្សមួយនេះ នឹងកាន់តែរឹមាំ និងមានសមាជិកកាន់តែច្រើនបន្ថែមទៀត ដែលទាំងនេះ គឺជាកម្លាំងចិត្តដ៏មានថាមពលសម្រាប់ការបន្តបំពេញតួនាទី និងភារកិច្ចរបស់យើង។

លោកបណ្ឌិត ហ៊ុន ម៉ាណែត ​បាន​កោតសរសើរ និងវាយតម្លៃខ្ពស់ចំពោះអង្គការចាត់តាំងបក្សគ្រប់ជាន់ថ្នាក់នៅក្នុងមូលដ្ឋានស្រុកជើងព្រៃ ដែលបានខិតខំប្រឹងប្រែងរួមគ្នាបម្រើប្រជាពលរដ្ឋប្រកបដោយការយកចិត្តទុកដាក់ និងការទទួលខុសត្រូវ ស្របតាមគោលការណ៍របស់គណបក្សថ្នាក់លើ។ គណបក្សប្រជាជនកម្ពុជា គឺជាគណបក្សកាន់អំណាច ដែលសំដៅដល់ការទទួលនូវអម្រែកភារកិច្ចបម្រើប្រជាពលរដ្ឋ។

លោកបណ្ឌិត ហ៊ុន ម៉ាណែត ​បានប្រាប់ឱ្យ​គណបក្ស​មូលដ្ឋាន​ ត្រូវ​បន្តសហការជាមួយក្រុមការងារ​គណបក្សគ្រប់យន្តការក្នុងនាមជាកម្លាំងសរុបរបស់បក្ស ខិតខំបម្រើប្រជាពលរដ្ឋឱ្យកាន់តែល្អជាប់ជាប្រចាំ និងអស់លទ្ធភាព ដោយកំណត់អាយុជីវិត និងជីវភាពរបស់ប្រជាជនជាកត្តាអាទិភាពចម្បង​ បន្តចូលរួមអភិវឌ្ឍប្រទេសជាតិឱ្យកាន់តែរីកចម្រើន​ បន្តលើកតម្កើងសិទ្ធិសេរីភាពប្រជាជន​​ និងបន្តថែរក្សាសុខសន្តិភាព និងស្ថិរភាព ដើម្បីនិន្តរភាពជាតិ៕

អត្ថបទ៖ កោះកែវ