អភិបាលស្រុកបាទី ទទួលស្គាល់ថា ពិតជាមានការស្នើសុំកាត់ឆ្វៀល «ដីព្រៃភ្នំតាម៉ៅ» មែន

ករណីមានការស្នើសុំកាត់ឆ្វៀល «ដីព្រៃភ្នំតាម៉ៅ» ប្រមាណ ៣០០ហិកតា ពេលនេះ អភិបាលស្រុកបាទី បានទទួលស្គាល់ថា ពិតជាមានករណីស្នើសុំនេះមែន។ ប៉ុន្តែលោកពុំមែនជា អ្នកធ្វើលើកិច្ចការនេះទេ ខណៈលោកប្រធានមន្ទីរសុរិយាដីខេត្តតាកែវ មិនអាចស្នើសុំការបំភ្លឺបាននោះទេ។

លោក ភួន ឈីម អភិបាលស្រុកបាទី បានប្រាប់ភ្នាក់ងារកម្ពុជាថ្មី នៅថ្ងៃទី ១៩ ខែមេសានេះថា ពិតជាមានការស្នើសុំ ស.ជ.ណ កាត់ឆ្វៀលដីនោះមែន។ ប៉ុន្តែនីតិវិធីរបស់លោក គឺបានត្រឹមតែស្នើសុំដីនោះទុកជាសម្បត្តិរដ្ឋប៉ុណ្ណោះ ហើយរឿងរដ្ឋយកទៅធ្វើអ្វីបន្តទៀត គឺលោកមិនដឹងទេ ហើយចំពោះបុគ្គលណាមកស្នើសុំនោះ ក៏លោកមិនបានដឹងនោះដែរ។

ដោយឡែកលោក នួន សុធា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី មិនអាចស្នើសុំការពន្យល់ ជុំវិញបញ្ហានេះឡើយ ដោយថា លោកកំពុងជាប់ប្រជុំ។

សូមជម្រាបថា ព្រៃភ្នំតាម៉ៅ មានទំហំសរុបប្រមាណ ១២០០ហិកតា ដែលត្រូវបានចាត់ទុកថា ជាតំបន់ផ្ទៃដីការពារព្រៃ ឈើ និងត្រូវបានគ្រប់គ្រងដោយក្រសួងកសិកម្មរុក្ខា ប្រមាញ់ និងនេសាទ។ នៅក្នុង ចំណោមផ្ទៃដី ១២០០ហិកតានេះ នាយកដ្ឋានរុក្ខាប្រមាញ់ បានរៀបចំដាំដើមឈើ និងរៀបចំជាសួនសត្វ នៅលើផ្ទៃ ៧០ហិកតា៕

អត្ថបទ៖ វីរៈ