អភិបាលរាជធានីភ្នំពេញ ណែនាំមន្ត្រីឲ្យបន្តថែរក្សាសន្តិសុខសណ្ដាប់ធ្នាប់ ដើម្បីឆ្ពោះទៅរកការបោះឆ្នោតឃុំ-សង្កាត់  

អភិបាលរាជធានីភ្នំពេញ បានណែនាំដល់មន្ត្រីក្រោមឱវាទរបស់ខ្លួន ត្រូវបន្តខិតខំបំពេញការងារតាមជំនាញរៀងៗ ខ្លួន កាន់តែល្អបន្ថែមទៀត ជាពិសេសលើបញ្ហាក្មេងទំនើង គ្រឿងញៀន និងសន្តិសុខសណ្តាប់ធ្នាប់ជាដើម ដើម្បីធានាបានសុវត្ថិភាពជូនប្រជាពលរដ្ឋ និងឆ្ពោះទៅរកការបោះឆ្នោតក្រុមប្រឹក្សាឃុំ-សង្កាត់អាណត្តិទី ៥ ឲ្យប្រព្រឹត្តទៅដោយរលូន យុត្តិធម៌ មានតម្លាភាព និងគ្មានអំពើហិង្សា។ ការណែនាំនេះ បានធ្វើឡើងក្នុងកិច្ចប្រជុំសាមញ្ញលើកទី ៣៦ របស់ក្រុមប្រឹក្សារាជធានីភ្នំពេញ អាណត្តិទី ៣ នាថ្ងៃទី ១១ ខែឧសភានេះ។

នៅក្នុងឱកាសនោះលោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានកោតសរសើរដល់គណៈបញ្ជាការឯកភាព រាជធានីភ្នំពេញគ្រប់លំដាប់ថ្នាក់ ដែលបានខិតខំរួមគ្នា ការពារសន្តិសុខសុវត្ថិភាពជូនប្រជាពលរដ្ឋ នាឱកាសបុណ្យចូលឆ្នាំថ្មី ប្រពៃណីជាតិនាពេលកន្លងទៅនេះ បានយ៉ាងល្អប្រសើរ ខណៈដែ​លប្រជាពលរដ្ឋ មកលេងកម្សាន្តយ៉ាងច្រើនកុះករ ប្រកបដោយភាពសប្បាយរីករាយ ជាពិសេសព្រឹត្តិការសង្ក្រាន្ត នៅរមណីយដ្ឋានប្រវត្តិសាស្រ្តវត្តភ្នំ។

លោក ម៉ប់ សារិន បានថ្លែងថា ក្រោមការដឹកនាំរបស់លោក ឃួង ស្រេង អភិបាលរាជធានីភ្នំពេញ ក្នុងការរៀបចំឲ្យមានព្រឹត្តិការសង្ក្រាន្ត នៅរមណីយដ្ឋានប្រវត្តិសាស្រ្តវត្តភ្នំ គឺមានប្រជាពលរដ្ឋមកលេងកម្សាន្តយ៉ាងច្រើនកុះករ ប្រកបដោយភាពសប្បាយរីករាយរហូតដល់ជាង ២២ម៉ឺននាក់ និងពុំមានបាតុភាពអ្វីកើតឡើងគួរឲ្យកត់សម្គាល់ឡើយ។

បន្ថែមពីនេះទៀត រដ្ឋបាលរាជធានីភ្នំពេញ ក៏បានចាត់ចែងក្នុងការចាក់វ៉ាក់សំាងការពារជំងឺកូវីដ-១៩ ចាប់ពីដូសមូលដ្ឋាន រហូតដល់ដូសជំរុញជូនដល់ប្រជាពលរដ្ឋ នៅតាមទីវត្តអារាមផងដែរ ដើម្បីបង្កលក្ខណៈងាយស្រួល ដល់ប្រជាពលរដ្ឋឲ្យមានភាពសុំា ក្នុងការការពារជំងឺកូវីដ-១៩ និងបានធ្វើឲ្យប្រទេសកម្ពុជា កាន់តែមានភាពធូរស្រាលពីជំងឺនេះ។

ចំណែកលោក ឃួង ស្រេង អភិបាល នៃគណៈអភិបាលរាជធានីភ្នំពេញ នៅក្នុងឱកាសនោះដែរ ក៏បានណែនាំដល់មន្ទីរជំនាញ ចំណុះឲ្យរដ្ឋបាលរាជធានីភ្នំពេញទំាងអស់ ត្រូវបន្តខិតខំបំពេញការងារទៅតាមជំនាញរៀងៗខ្លួន ឲ្យកាន់តែល្អបន្ថែមទៀត ជាពិសេសលើបញ្ហាដូចជា៖ ក្មេងទំនើង គ្រឿងញៀន សន្តិសុខសណ្តាប់ធ្នាប់នៅតាមមូលដ្ឋាន ដើម្បីធានាបានសុវត្ថិភាពជូនប្រជាពលរដ្ឋ និងឆ្ពោះទៅការបោះឆ្នោតក្រុមប្រឹក្សាឃុំ-សង្កាត់អាណត្តិទី ៥ ឲ្យប្រព្រឹត្តទៅដោយរលូន យុត្តិធម៌ មានតម្លាភាព និងគ្មានអំពើហិង្សា។

លោកអភិបាលរាជធានីភ្នំពេញ បានបញ្ជាក់ថា បច្ចុប្បន្ននេះរាជរដ្ឋាភិបាល បានធ្វើវិមជ្ឈការទៅថ្នាក់ក្រោមជាតិ។ ដូច្នេះគ្រប់មន្ទីរជំនាញទំាងអស់ ត្រូវធ្វើកិច្ចការជាមួយថ្នាក់ក្រោមជាតិ ហើយអភិបាលរង ទំាងអស់ ត្រូវយកចិត្តទុកធ្វើកិច្ចការទៅតាមជំនាញសមត្ថកិច្ចរបស់ខ្លួន ដើម្បីធានាប្រសិទ្ធភាពក្នុងការ ដោះស្រាយបញ្ហា និងការផ្តល់សេវាជូនប្រជាពលរដ្ឋនៅមូលដ្ឋាន បានកាន់តែល្អប្រសើរ។

សូមបញ្ជាក់ថា បច្ចុប្បន្នរដ្ឋបាលរាជធានីភ្នំពេញ មានការយកចិត្តទុកដាក់យ៉ាងខ្លំាង លើបញ្ហាសន្តិសុខ សណ្តាប់ធ្នាប់សង្គម និងសុវត្ថិភាពរបស់ប្រជាពលរដ្ឋ ព្រោះវាជាតម្រូវការរួមរបស់ប្រជាពលរដ្ឋ ខណៈដែលប្រទេសជាតិមានសុខសន្តិភាព និងការអភិវឌ្ឍលើគ្រប់វិស័យ៕

អត្ថបទ៖ ស្រីរ័ត្ន