ព័ត៌មានជាតិ
វិស័យសំណង់រីកចម្រើន កម្មករទទួលបានកម្រៃខ្ពស់ ឈប់ចំណាកស្រុកប្រឈមហានិភ័យ
ការងារជាកម្មករសំណង់ ទោះបីជាធ្វើការនៅក្រោមកម្តៅថ្ងៃ ជាមួយនឹងខោអាវមិនស្អាតបាតដូចការងារដទៃ តែចំណូលប្រចាំថ្ងៃពីការងារនេះ អាចឱ្យពួកគេរស់នៅក្នុងជីវភាពសមរម្យ ដោយមិនចាំបាច់ចំណាកស្រុកទៅធ្វើការនៅក្រៅប្រទេស ឆ្ងាយពីគ្រួសារ។
លោក ឆាយ កំពត អាយុ ៥០ឆ្នាំ ជាមេជាងសំណង់មកពីខេត្តកំពត បានប្រាប់កម្ពុជាថ្មីថា លោកបានធ្វើការជាជាងសំណង់នេះ អស់រយៈពេលជាង ១០ឆ្នាំមកហើយ។ លោកបានលើកឡើងថា សព្វថ្ងៃនេះ ការងារសាងសង់នៅស្រុកខ្មែរ គឺមានការរីកចម្រើន ដូចជា អគារខុនដូ បុរី ផ្ទះល្វែង រមណីយដ្ឋាននានា ដូច្នេះមានតម្រូវការកម្លាំងពលកម្មច្រើន។
មេជាងសំណង់រូបនេះបន្តដូច្នេះថា «កាលពីជាង ១០ឆ្នាំមុន ខ្ញុំធ្វើការមួយថ្ងៃបានប្រហែល ៣ ម៉ឺនរៀលប៉ុណ្ណោះ។ តែសព្វថ្ងៃ ខ្ញុំទទួលបានខ្ទង់ ៧ម៉ឺនរៀល ដែលចំណូលនេះ អាចធ្វើឱ្យជីវភាពគ្រួសាររបស់ខ្ញុំរស់នៅបានសមរម្យ»។ លោកបានលើកបន្ថែមទៀតថា ការងារនៅស្រុក ទទួលបានប្រាក់ចំណូលមិនខុសគ្នាពីការចំណាកស្រុកធ្វើការនៅក្រៅប្រទេសប៉ុន្មានឡើយ ហើយធ្វើការក្នុងស្រុកបានជួបជុំគ្រួសារទៀត។
ដូចគ្នានេះដែរ លោក ពន្លឺ ជាអ្នកខេត្តពោធិ៍សាត់ ដែលបច្ចុប្បន្ន លោករស់នៅម្តុំទួលពង្រជាមួយគ្រួសារ ហើយធ្វើការជាជាងពុម្ពសំណង់ រយៈពេលជាង ១០ ឆ្នាំមកហើយដែរ។ លោក ពន្លឺ លើកឡើងថា ក្នុងមួយថ្ងៃ ទទួលកម្រៃបានជាង ១០ ម៉ឺនរៀលពីការងារនេះ។ លោកបានបន្ថែមថា បច្ចុប្បន្នការងារសាងសង់នៅស្រុកខ្មែរមានច្រើនមិនខ្វះនោះទេ ដោយគម្រោងនានា ត្រូវការកម្លាំងពលកម្មជាច្រើន ជាពិសេសអ្នកដែលមានជំនាញស្រាប់។ លោកពន្លឺ បានគូសបញ្ជាក់ទៀតថា ចំណូលពីការងារសំណង់នេះ បានជួយផ្គត់ផ្គង់គ្រួសារលោកបានប្រសើរ និងអាចឱ្យកូនបានចូលសាលារៀន ដូចក្មេងដទៃទៀត។
បច្ចុប្បន្នវិស័យសំណង់នៅកម្ពុជា មានការរីកចម្រើនគួរកត់សម្គាល់ ដែលត្រូវការកម្លាំងពលកម្មច្រើន ដើម្បីអភិវឌ្ឍលើវិស័យនេះ។ លោក គីម សុភា ទើបតែចូលធ្វើការក្នុងវិស័យសំណង់បាន ៣ឆ្នាំ ប៉ុណ្ណោះ។ ប៉ុន្តែចំណូលប្រចាំថ្ងៃរបស់លោក អាចរកបានជាមធ្យម ៨ម៉ឺនរៀលក្នុងមួយថ្ងៃ។ ចំណូលនេះ ស្មើនឹងអ្នកធ្វើការនៅក្នុងម៉ាស៊ីនត្រជាក់ និងច្រើនជាងអ្នកធ្វើការរោងចក្រផង។ លោក បានសង្កត់ធ្ងន់ថា ការងារនៅក្នុងស្រុក គឺមានសុវត្ថិភាព មិនប្រឈមនិងហានិភ័យចាញ់បោកគេ ជាពិសេសបានរស់នៅជួបជុំគ្រួសារផង។
សូមបញ្ជាក់ថា នាពេលបច្ចុប្បន្នវិស័យសំណង់ ការសាងសង់ ខុនដូ បុរី ផ្ទះល្វែង កំពុងមានសន្ទុះ រីកចម្រើនខ្លាំង និងត្រូវការកម្លាំងពលកម្មច្រើន ដើម្បីបំពេញការងារ។ ជាក់ស្តែងនៅរាជធានីភ្នំពេញ មានអគារខ្ពស់ៗរាប់ពាន់កំពុងផុសត្រដែត ក្នុងនោះអគារកម្ពស់ ២០ជាន់ទៅ ២៩ ជាន់មានជាង ១០០អគារ អគារ ៣០ជាន់ទៅ ៣៩ជាន់ មាន ៦៥អគារ មានបុរីជាង ៣០០ និងសណ្ឋាគារប្រណិតៗ មានជាង ១០០សណ្ឋាគារផងដែរ។ នេះបើតាមការបញ្ជាក់របស់លោក ថោង ខុន រដ្ឋមន្រ្តីក្រសួងទេសចរណ៍៕ នាង រតនៈ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១០ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ