លោកបណ្ឌិត ហ៊ុន ម៉ាណែត ៖ ការប្រឈមនឹងការលំបាក និងហានិភ័យក្នុងការប្រយុទ្ធប្រឆាំងជំងឺកូវីដ​-១៩ គឺជាការលះបង់

លោកបណ្ឌិត ហ៊ុន ម៉ាណែត បានអះអាងថា ការទទួលបានជោគជ័យ ពីការប្រយុទ្ធប្រឆាំងជំងឺកូវីដ-១៩ គឺបានមកពីការចូលរួមរបស់អ្នកពាក់ព័ន្ធ ហើយការប្រឈមនឹងការលំបាក និងហានិភ័យនេះ គឺជាការលះបង់ និងជាការអត់ធ្មត់តស៊ូរបស់កងកម្លាំង ក្នុងការរៀបចំមជ្ឈមណ្ឌល និងការព្យាបាលជំងឺនេះនាពេលកន្លងមក។

ការលើកឡើងរបស់លោកបណ្ឌិត ហ៊ុន ម៉ាណែត ប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្ដេច តេជោ (TYDA) បានធ្វើឡើងនៅក្នុងពិធីសំណេះសំណាល និងពិសាអាហារសាមគ្គីជាមួយនឹងកងកម្លាំង ដែលបានចូលរួមយុទ្ធនាការប្រឆាំង-១៩ នៅដឺព្រេមៀសេនធ័រសែនសុខ។

លោកបញ្ជាក់យ៉ាងនេះថា «ពេលវេលា និងស្មារតី ដែលយើងទទួលបានជោគជ័យ ក្នុងការប្រយុទ្ធប្រឆាំងជំងឺកូវីដ-១៩ គឺបានមកពីការចូលរួមពីកម្លាំងសរុបរួមមាន៖ ក្រុមគ្រូពេទ្យ អាជ្ញាធរ កងកម្លាំង ផ្នែកសេវា និងផ្នែកពាក់ព័ន្ធដទៃទៀត ដែលបានលះបង់ពេលវេលាកម្លាំងកាយ កម្លាំងចិត្ត ដើម្បីអនុវត្តភារកិច្ច រៀបចំមជ្ឈមណ្ឌលព្យាបាល និងព្យាបាលជំងឺកូវីដ -១៩»។

លោកថា ការប្រឈមនឹងការលំបាក និងហានិភ័យក្នុងការប្រយុទ្ធប្រឆាំងជំងឺកូវីដ-១៩ គឺជាការលះបង់ និងជាការអត់ធ្មត់តស៊ូរបស់កងកម្លាំង ក្នុងការរៀបចំមជ្ឈមណ្ឌលព្យាបាល និងព្យាបាលជំងឺកូវីដ-១៩ នាពេលកន្លងមក៕

អត្ថបទ៖ កោះកែវ