កម្លាំងយុវជនប្រមាណ៦៦៣នាក់ មកពីស្ថាប័នផ្សេងៗ រួមគ្នាសម្អាតបរិស្ថានតាមផ្លូវ៣៨ខ្សែក្នុងក្រុងសៀមរាប

នៅថ្ងៃទី២១ ខែសីហា ឆ្នាំ២០២២នេះ បានរួមគ្នាសម្អាតបរិស្ថានតាមដងផ្លូវគម្រោង៣៨ខ្សែ នៅក្នុងក្រុងសៀមរាប ដើម្បីលើកកម្ពស់​សោភ័ណ្ឌភាព​ក្រុងទេសចរណ៍ និងទាក់ទាញអ្នកទេសចរដែលរៀបចំដោយសភាពសហព័ន្ធយុវជនកម្ពុជាខេត្ដសៀមរាប ។

ឯកឧត្តម គុជ លីណា សមាជិកក្រុមប្រឹក្សាខេត្ដសៀមរាប មានប្រសាសន៍ថា ដងផ្លូវដែលត្រូវសម្អាតនេះ មានចំនួន៧គោលដៅ ដែលស្ថិត​នៅក្នុង​គម្រោង៣៨ខ្សែផង និងតាមដងផ្លូវសំខាន់ៗជាច្រើនទៀត នៅក្នុងក្រុងសៀមរាប រួមមានផ្លូវតាមដងស្ទឹងសៀមរាប ឆ្ពោះទៅ​ផ្សារចាស់​ តាមបណ្ដោយផ្លូវហ្សាឌឺហ្គោលដល់សួនរុក្ខជាតិអង្គរ និងទៅតាមបណ្ដោយផ្លូវជាតិលេខ៦ចេញពីព្រះអង្គចេកព្រះអង្គចម​តំបន់​ជុំវិញ​​​​ផ្សារចាស់ផ្លូវផប់ស្ទ្រីត ផ្លូវស៊ីវុត្ថាផ្លូវចេញពីព្រះរាជដំណាក់ ដល់ចំណុចផ្លូវ៦០ម៉ែត្រ និងតាមដងផ្លូវមួយចំនួនទៀត ដែលសរុបកម្លាំង​គ្រប់គោលដៅ៦៦៣នាក់ ដែលក្នុងនោះមកពីអង្គភាពយុវជនសហភាពសហព័ន្ធយុវជនកម្ពុជាខេត្ត, យុវជនបក្ស ,យុវជន១៥៧ ,យុវជនតាមសាកលវិទ្យាល័យផងដែរ ។

ឯកឧត្តមបានបន្ដថា ការសម្អាតបរិស្ថានតាមដងផ្លូវនេះត្រូវបានធ្វើឲ្យមានគុណភាពសោភ័ណ្ឌភាពស្រស់ស្អាតនៃក្រុងសៀមរាប ហើយមិន​មែនធ្វើយកតែឲ្យតែល្អមើលពីសកម្មភាពក្រុមការងារនោះទេ ។ ក្នុងយុទ្ធនាការសម្អាតអនាម័យ និងបរិស្ថាននាពេលនេះ​ពិតជាមានសារៈ​សំខាន់​ណាស់ដែលធ្វើឲ្យក្រុងសៀមរាបរបស់យើង ក្លាយជាទីក្រុងគ្របដណ្តប់ដោយបរិស្ថានស្អាត មានបរិយាកាសល្អ រុក្ខជាតិខៀវខ្ចី ផ្កា​ចម្រុះពណ៌ និងបង្កើនការយល់ដឹងអំពីអនាម័យបរិស្ថានដល់សាធារណជន​ក្នុងគោលបំណងបង្កើនបរិស្ថានស្អាត​ក្នុងការរស់នៅរបស់ប្រជា​ពល​រដ្ឋប្រកបដោយអនាម័យល្អដែលនាំមកនូវសុខភាពល្អ។

ឯកឧត្តមបានបន្ថែមទៀតថា ដើម្បីចូលរួមចំណែកក្នុងយុទ្ធនាការសម្អាតអនាម័យបរិស្ថានឲ្យកាន់តែមានប្រសិទ្ធភាព និងប្រសិទ្ធផល​ក្នុងការ​គ្រប់​គ្រងសម្រាម និងអនាម័យទីប្រជុំជនយើងត្រូវធ្វើការផ្សព្វផ្សាយទៅគ្រប់ភាគីស្ថាប័នពាក់ព័ន្ធដៃគូរអភិវឌ្ឍ និងវិស័យឯកជនទាំងអស់ ដើម្បីចូលរួមអនុវត្តឲ្យបានផុសផុលសំដៅឆ្ពោះទៅកាន់ទីក្រុងដែលមានអនាម័យបរិស្ថានស្អាត និងភូមិដ្ឋានគ្មានសម្រាម ។ ជាមួយគ្នានេះ ការផ្លាស់ប្តូរឥរិយាបទ និងអាកប្បកិរិយាមនុស្ស ក្នុងការប្រើប្រាស់ផលិតផលធ្វើពីប្លាស្ទិក គឺជារឿងចាំបាច់បំផុត​ព្រោះការបំពុលដោយប្លា​ស្ទិកនឹងធ្វើឲ្យប៉ះពាល់ដល់អាយុជីវិតមនុស្ស សត្វ ជាពិសេសសំណល់ប្លាស្ទិកទាំងនេះកំពុងគម្រាម​គំហែងយ៉ាងធ្ងន់ធ្ងរដល់ភពផែនដី​របស់​យើង។ ដូចនេះការរៀបចំយុទ្ធនាការនាពេលនេះ គឺជាកម្លាំងចលករមួយដ៏សំខាន់​ដើម្បីជម្រុញចលនាកម្លាំងគ្រប់ស្រទាប់វណ្ណៈ​ឲ្យចូលរួម​ធ្វើអនាម័យ ក៏ដូចជាបំផុសចលនាចូលរួមសម្អាតអនាម័យបរិស្ថានតាមទីលំនៅដ្ឋានរៀងៗខ្លួន និង​ទីសាធារណៈដោយទុកដាក់សម្រាម​ក្នុង​ធុង​សម្រាមឲ្យបានត្រឹមត្រូវប្រកបដោយផាសុខភាព ។ ដូចនេះយើងរួមគ្នារួមចំណែកការពារបរិស្ថាន និងរួមគ្នាចោលសម្រាមឲ្យបានត្រឹមត្រូវ ដោយរៀបចំទុកដាក់សម្រាមនិងចោលសម្រាមឲ្យត្រឹមត្រូវទៅតាមការណែនាំរបស់អាជ្ញាធរមានសមត្ថកិច្ចដែលរៀបចំជូន។

សូមបញ្ជាក់ថា យុទ្ធនាការសៀមរាបផ្ទះខ្ញុំ គឺជាការសម្អាតក្រុងសៀមរាប ដែលធ្វើឡើងជាបន្ទាប់ ដើម្បីលើកកម្ពស់សោភ័ណ្ឌ​ភាព ទេសភាពវប្បធម៌ក្រុងអង្គរ ដើម្បីទាក់ទាញអ្នកទេសចរចូលមកទស្សនាក្រុងមួយនេះកាន់តែច្រើនបន្ទាប់​ពីវិបត្ដិកូវីដ១៩ បានធូរ​ស្រាលឡើងវិញ៕

អត្ថបទ៖ គឿនវេត