ព័ត៌មានជាតិ

ព្រៃឈើរងការឈូសឆាយនៅភ្នំតាម៉ៅ បានដាំឡើងវិញសម្រេចបាន ១០០ ភាគរយ

បានផុស

៤ years មុន

នៅ

ថ្ងៃសៅរ៍ ១៧ កញ្ញា ២០២២

ដោយ

រដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ដើមឈើនៅតំបន់សួនឧទ្យានភ្នំតាម៉ៅដែលបានរងការឈូសឆាយបានដាំឡើងវិញសម្រេច ១០០ ភាគរយ។

ការដាំកូនឈើឡើងវិញរួមទាំងការជីកស្រះ និងអាងស្តុកទឹកនិងមានរបងព័ទ្ធជុំវិញ អនុវត្តស្ទើរបានទាំងស្រុង ដែលគ្រោងនឹងរៀបចំជាសួនភូតគាមស្រស់បំព្រងសម្រាប់បម្រើទេសចរណ៍នានាសម្រាកកម្សាន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ រដ្ឋបាលព្រៃឈើក៏បានច្រានចោលការចុះផ្សាយតាមបណ្ដាញព័ត៌មានលើការលក់ដូរឈើប្រណីតដែលបានមកពីធ្វើការឈូសឆាយនៅតំបន់ភ្នំតាម៉ៅ។

រដ្ឋបាលព្រៃឈើបានឲ្យដឹងថា ស្ថានភាពទីតាំងដីឧទ្យានសួនសត្វ ព្រៃការពារ និងសួនភូតគាម «ភ្នំតាម៉ៅ» មានដើមឈើដាំ ដើមឈើដុះដោយធម្មជាតិ និងដើមឈើដុះដោយខ្នែងដូចជាប្រេងខ្យល់ អាកាស្យា ត្បែង ផ្ចិក សុក្រំជាដើម ដែលមានទំហំតូចៗស្ថិតនៅរាយបាយពុំមានឈើប្រណីត និងប្រភេទឈើដែលមានតម្លៃពាណិជ្ជកម្មឡើយ។

ដោយឡែក ដើមឈើនៅតំបន់ដែលបានឈូសឆាយរួច មានដើមឈើស្នែងស្ទើរតែទាំងស្រុង ហើយឈើដែលកាប់រួចទាំងនេះមិនបានយកទៅលក់ដូរនោះទេ ប៉ុន្តែមានប្រជាពលរដ្ឋដែលរស់នៅជុំវិញស្នើសុំយកទៅប្រើប្រាស់ជាអុស រីឯសំណល់សេសសល់បានសម្អាត និងបានកប់ទុកនៅទីតាំងផ្ទាល់ ដើម្បីសម្អាតទីធ្លាងាយស្រួល ក្នុងការដាំដុះឈើឡើងវិញ។

រដ្ឋបាលព្រៃឈើអង្កេតឃើញថា នៅមានជនអគតិមួយចំនួននៅតែបន្តកេងប្រវ័ញ្ញ និងឆ្លៀតឱកាសយករឿងភ្នំតាម៉ៅ ដើម្បីចំណេញនយោបាយរបស់ពួកគេ។ រដ្ឋបាលព្រៃឈើក៏បានអញ្ជើញសាធារណជន ទៅពិនិត្យមើល និងសាកសួរប្រជាពលរដ្ឋ ដែលរស់នៅជុំវិញ និងក្រុមការងារដែលកំពុងរៀបចំសួនភូតគាម នៅទីតាំងផ្ទាល់៕