រដ្ឋាភិបាលស្វីស​បាន​កំពុង​គាំទ្រ​កម្ពុជា ក្នុង​ដំណើរការ​អន្តរកាល និងកិច្ចខិតខំប្រឹងប្រែង​ក្នុងការអភិវឌ្ឍសេដ្ឋកិច្ច

ភ្នំពេញ ៖ លោកជំទាវ Helene Budliger Artieda រដ្ឋលេខាធិការ​នៃ​រដ្ឋ​លេខាធិការដ្ឋាន​សម្រាប់​កិច្ចការ​សេដ្ឋកិច្ច នៃសហព័ន្ធស្វីស បាន​លើក​ឡើង​អំពីកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ នារសៀលថ្ងៃទី១៩ ខែមករា ឆ្នាំ២០២៣ ​ក្នុង​អំឡុង​ពេល​នៃ​ការ​អញ្ជើញ​ចូលរួមកិច្ចប្រជុំប្រចាំឆ្នាំ២០២៣ របស់វេទិកាសេដ្ឋកិច្ចពិភពលោក ។

ក្នុងជំនួបទ្វេភាគី​នេះ លោក​ ប៉ាន សូរស័ក្ដិ រដ្ឋមន្ត្រី​ក្រសួងពាណិជ្ជកម្ម បាន​លើក​ឡើង​ពី​ទំនាក់​ទំនង​ការ​ទូត​រវាងប្រទេសទាំងពីរ​ ដែលត្រូវបានបង្កើតឡើងតាំងពីឆ្នាំ១៩៦៣ ដែល​នាំ​ឱ្យមានទំនាក់ទំនងល្អរហូតមកដល់បច្ចុប្បន្ន។

ឯកឧត្តមរដ្ឋមន្ត្រី បាន​បន្តថា ការ​ផ្លាស់​ប្តូរ​ពាណិជ្ជកម្ម​រវាងប្រទេសទំាងពីរ គឺ​មាន​ការ​កើន​ឡើង​ជា​លំដាប់​ពី​មួយឆ្នាំទៅមួយឆ្នាំ ដោយ​នៅ​ក្នុងឆ្នាំ២០២០ ទំហំ​ពាណិជ្ជកម្ម​សរុប​រវាងកម្ពុជា និង​ប្រទេសស្វីស​ មានចំនួនសរុបប្រមាណ ៣៧៩ លានដុល្លាអាមេរិក រីឯនៅក្នុងឆ្នាំ២០២១ ទំហំពាណិជ្ជកម្មសរុប មានចំនួនសរុបប្រមាណជាង ៩៧៤ លានដុល្លាអាមេរិក។

ទាក់ទងនឹងការងារនេះផងដែរ ឯកឧត្តមរដ្ឋមន្ត្រីក៏បានពិភាក្សាជាមួយលោកជំទាវ Helene Budliger Artieda លើការពិនិត្យលទ្ធភាពក្នុងការបង្កើតកិច្ចព្រមព្រៀងពាណិជ្ជកម្មសេរីរវាងកម្ពុជា និងប្រទេសស្វីស ដើម្បី​ពង្រឹង​កិច្ច​សហប្រតិបត្តិការរវាងរដ្ឋាភិបាល និង​ប្រទេសទាំងពីរ​ឱ្យ​កាន់​តែ​ទូលំទូលាយ និង​ស៊ីជម្រៅ។

ឆ្លៀត​ក្នុង​ឱកាស​នោះ ឯកឧត្តមរដ្ឋមន្ត្រី បាន​ថ្លែងអំណរគុណដល់រដ្ឋាភិបាលស្វីសចំពោះជំនួយ និងកម្មវិធីអភិវឌ្ឍនានាក្នុងវិស័យជាច្រើន ដូចជាអភិបាលកិច្ចល្អ និង​ការ​ចូលរួម​របស់ប្រជាពលរដ្ឋ​ចំពោះ​វិស័យ​កសិកម្ម និងសន្តិសុខស្បៀង រហូតដល់ការបណ្តុះបណ្តាលជំនាញវិជ្ជាជីវៈ និងការងារ។

ជាការឆ្លើយតប លោកជំទាវ Helene Budliger Artieda បានបង្ហាញការស្វាគមន៍លើគំនិតផ្តួចផ្តើមនេះ និងបានបញ្ជក់ថា រដ្ឋាភិបាលស្វីសបាននិងកំពុងគាំទ្រកម្ពុជាក្នុងដំណើរការអន្តរកាល និងកិច្ចខិតខំប្រឹងប្រែងនានាក្នុងការអភិវឌ្ឍសេដ្ឋកិច្ចក្នុងប្រទេសកម្ពុជាផងដែរ។ លោកជំទាវបានកោតសរសើរពីការជោគជ័យរបស់កម្ពុជាក្នុងការទប់ស្កាត់ការរីករាលដាលជំងឺកូវីដ១៩ និងបានអបអរសាទរចំពោះកម្ពុជា ដែបបានធ្វើជាប្រធានអាស៊ានក្នុងឆ្នាំ២០២២ និងការធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានប្រកបដោយជោគជ័យ។​

ជាចុងក្រោយ ភាគីទាំងពីរ បានប្តេជ្ញាចិត្តបង្កើនទំនាក់ទំនងទ្វេភាគីដែលមានស្រាប់ឱ្យកាន់តែរឹងមាំ និងពង្រីកកិច្ចសហប្រតិបត្តិការលើវិស័យអាទិភាពបន្ថែមទៀត ព្រមទាំងកិច្ចសហប្រតិបត្តិការលើឆាកអន្តរជាតិផងដែរ៕