លោក អ៊ុន ចាន់ដា សមាជិកគណៈកម្មាធិការកណ្ដាល ប្រធានគណៈកម្មាធិការគណបក្សខេត្តកំពង់ចាម និងលោក ខ្លូត ផន អនុប្រធានគណៈប្រចាំការគណបក្សខេត្ត នៅព្រឹកថ្ងៃអាទិត្យនេះ បានអញ្ជើញប្រកាសទទួលសមាជិកថ្មីមកពីគណបក្សនយោបាយផ្សេងៗនៅស្រុកស្ទឹងត្រង់ ប្រមាណជាង៣០០នាក់ ក្រោមវត្កមានលោកបណ្ឌិត លី សាម៉េត តំណាងដ៏ខ្ពង់ខ្ពស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា នៅទីស្នាក់ការគណបក្សខេត្តកំពង់ចាម។

លោក អ៊ុន ចាន់ដា បានសម្ដែងនូវការស្វាគមន៍យ៉ាងកក់ក្ដៅចំពោះសមាជិកទាំងអស់ដែលបានចាកចេញពីគណបក្សភ្លើងទៀន ដោយមិនមានការបង្ខិតបង្ខំ ហើយបានស្ម័គ្រចិត្តចូលមករួមរស់ជាមួយគណបក្សប្រជាជនកម្ពុជា។ ចំណែក លោកបណ្ឌិត លី សាម៉េត វិញបានថ្លែងថា  គណបក្សប្រជាជនកម្ពុជាដែលមាន សម្ដេចតេជោ ហ៊ុន សែន ជាប្រធានបានដឹកនាំប្រទេសជាតិមានសុខសន្តិភាព មានការអភិវឌ្ឍ រីកចម្រើន ធ្វើ ឲ្យជីវភាពប្រជាពលរដ្ឋកាន់តែល្អប្រសើរពីមួយថ្ងៃទៅមួយថ្ងៃ ប្រទេសជាតិមានសុខសន្តិភាព។

លោកបន្តថា គណបក្សប្រជាជនកម្ពុជា គឺជាគណបក្សដែលមានភាពចាស់ទុំក្នុងការដឹកនាំប្រទេសទទួល បាននូវសុខសន្តិភាព រក្សាបានស្ថិរភាពនយោបាយ ដើម្បីជាតិ និងប្រជាជនកម្ពុជា។ មិនតែប៉ុណ្ណោះ គណបក្សប្រជាជនកម្ពុជាមានគោលដៅបម្រើប្រយោជន៍ប្រជាពលរដ្ឋ ការអភិវឌ្ឍលើគ្រប់វិស័យ ការពារទឹកដី ធ្វើ ឲ្យកម្ពុជា ស្មើមុខមាត់នៅលើឆាកអន្តរជាតិ និងបានដោះស្រាយបញ្ហាជាច្រើន ដើម្បីបុព្វហេតុជាតិ និង មាតុភូមិរបស់ខ្លួន៕

ដោយ៖ ឡេក  ចាន់ពេជ្រ