រាជរដ្ឋាភិបាលកម្ពុជា និងរដ្ឋាភិបាលចិន បានប្រកាសកៀកស្មាគ្នា ធ្វើសកម្មភាពរួមគ្នាប្រឆាំងនឹងងការឆបោកតាមប្រព័ន្ធទូរគមនាគមន៍ ការលេងល្បែងស៊ីសងឆ្លងដែនខុសច្បាប់ និងអំពើជួញដូ​រ​ម​នុស្ស និងកា​រ​កសាងសមត្ថភាពមន្រ្តីអនុវត្តច្បាប់។ មិនតែប៉ុណ្ណោះ ភាគីទាំង២ ក៏បានឯកភាពគ្នាលើកកម្ពស់ការពង្រឹងការិយាល័យសម្របស​ម្រួ​ល និងកិច្ចស​ហប្រតិបត្តិការអនុវត្តច្បាប់កម្ពុជា-ចិនផងដែរ។

សេចក្ដីថ្លែងការណ៍រួមស្ដីពីការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិនដែលចេញផ្សាយដោយក្រសួងការបរទេសនៅថ្ងៃទី១១ ខែកុម្ភៈ ឆ្នាំ២០២៣ បានលើកឡើងថា៖«ភាគីទាំងពីរបានឯកភាពបន្តកិច្ចសហប្រតិបត្តិការផ្លាស់ប្ដូរ និងចែករំលែកព័ត៌មានរវាងមន្ត្រីអនុវត្តច្បាប់ ដោយផ្ដោតការយកចិត្តទុកដាក់លើការប្រយុទ្ធប្រឆាំងនឹងឧក្រិដ្ឋកម្មឆ្លងដែន ការប្រ​យុ​ទ្ធ​ប្រឆាំងអំពើភេរវកម្ម ការទប់ស្កាត់ «បដិវត្តន៍ពណ៌» ការប្រយុទ្ធប្រឆាំងឧក្រិដ្ឋកម្មពាក់ព័ន្ធនឹងគ្រឿងញៀ​​ន ការឆបោកតាមប្រព័ន្ធទូរគមនាគមន៍ ការលេងល្បែងស៊ីសងឆ្លងដែនខុសច្បាប់ និងអំពើជួញដូ​រ​ម​នុស្ស និងកា​រ​កសាងសមត្ថភាពមន្រ្តីអនុវត្តច្បាប់»។

ក្រៅពីនេះ រាជរដ្ឋាភិបាលកម្ពុជា បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ចិនក្នុងការបង្កើនប្រសិទ្ធភាព និងកែសម្រួលគោលនយោបាយទប់ស្កាត់ និងគ្រប់គ្រងជំងឺកូវីដ-១៩ ផ្អែកតាមការវិវឌ្ឍនៃស្ថានកា​រណ៍ ដែលប​ង្កើ​ត​នូវលក្ខខណ្ឌប្រសើរសម្រាប់ការផ្លាស់ប្តូរប្រជាជន និងប្រជាជន ប្រ​ក​​បដោយសុវត្ថិភាព សុខុមាលភាព និងរបៀបរៀបរយ រវាងប្រទេសចិន និងបណ្តាប្រទេសផ្សេងៗ ដើម្បីផ្តល់ផលប្រយោជន៍កាន់តែច្រើ​នដល់សេដ្ឋកិច្ចសកល។

ចំណែក រដ្ឋាភិបាលចិនវិញ បានប្រកាសថា កម្ពុជាជាប្រទេសមួយក្នុងចំ​ណោ​មប្រទេសដំបូង ដែលនឹងទទួលភ្ញៀវទេសចរចិន ព្រមទាំងផ្ដល់អាទិភាពក្នុងការស្ដារ និងបង្កើនចំនួនជើងហោះហើរត្រង់។ រីឯ ភាគីកម្ពុជា បានបញ្ជាក់សាជាថ្មីនូវការស្វាគមន៍យ៉ាងកក់ក្តៅដល់ទេសចរចិន និ​ងការប្ដេជ្ញាផ្តល់សេវាកម្ម និងសន្តិសុខ ប្រកបដោយគុណភាព។ ភាគីទំាងពីរកម្ពុជា-ចិនក៏បា​ន​ឯកភាពជំរុញកិច្ចសហប្រតិបត្តិការរវាងសហគ្រាសវប្បធម៌ និងទេសចរណ៍នានា នៃប្រទេសទំាំងពីរ ដើម្បីរួមគ្នាបង្កើតផ្លូវទេសចរណ៍ បង្កើតផលិតផលវប្បធម៌ និងទេសចរណ៍ និងលើកកម្ពស់កិច្ចសហប្រតិបត្តិការ ក្នុងការបណ្តុះបណ្តាលបុគ្គលិកវប្បធម៌ និងទេសចរណ៍៕