ឯកឧត្តម ហ៊ុន ម៉ានី ៖ ក្នុងនាមម្ចាស់ផ្ទះ អ្នកគាំទ្រកម្ពុជា មិនគួរធ្វើទង្វើមិនគប្បីដល់ក្រុមកីឡាករបរទេសឡើយ  

ឯកឧត្តម ហ៊ុន ម៉ានី បានលើកឡើងថា ក្នុងនាមកម្ពុជា ជាម្ចាស់ផ្ទះនៃព្រឹត្តិការណ៍កីឡាស៊ីហ្គេមលើកទី ៣២ ឆ្នាំ ២០២៣​នេះ អ្នកគាំទ្រកម្ពុជា មិនគួរធ្វើទង្វើមិនគប្បីណាមួយដល់ក្រុមកីឡាករ ក៏ដូចជាប្រតិភូកីឡាបរទេសឡើយ។ ឯកឧត្តម បានអំពាវនាវដល់អ្នកគាំទ្រកម្ពុជា គប្បីធ្វើបដិសណ្ឋារកិច្ច និងទទួលស្វាគមន៍ប្រតិភូកីឡាទាំងអស់ឲ្យបានល្អប្រសើរ។

ការលើកឡើងបែបនេះរបស់ឯកឧត្តម ហ៊ុន ម៉ានី បានធ្វើឡើងបន្ទាប់ពីអ្នកគាំទ្ររបស់កម្ពុជាមួយចំនួន បានស្រែកហ៊ោបែបឌឺដងទៅកាន់ក្រុមកីឡាករបាល់ទះថៃ ក្រោយប្រកួតចាញ់ក្រុមកីឡាករកម្ពុជា កាលពីល្ងាចថ្ងៃទី ៧ ខែឧសភា។

តាមរយៈការបង្ហោះលើបណ្ដាញសង្គមហ្វេសប៊ុក នៅថ្ងៃនេះ ឯកឧត្តម ហ៊ុន ម៉ានី បានសរសេររៀបរាប់ដូច្នេះថា «ទង្វើដែលមិនគួរឲ្យកើតមាន! ឈ្នះ ឬចាញ់ក្នុងស្មារតីកីឡាជារឿងធម្មតា តែក្នុងនាមយើងជាម្ចាស់ផ្ទះ គប្បីធ្វើបដិសណ្ឋារកិច្ច និងយកចិត្តទុកដាក់ទទួលមិត្តភក្តិបរទេសដែលអញ្ញើញមកកម្ពុជាមិនថាជាកីឡាករ គ្រូបង្វឹក ឬអ្នកគាំទ្រណានោះទេ ធ្វើយ៉ាងណាផ្តល់នូវភាពការស្វាគមន៍ប្រកបដោយភាពកក់ក្តៅ ភាតរភាព និងទទួលបានអនុស្សាវរីយ៍ល្អៗខណៈពេលដែលកម្ពុជាធ្វើជាម្ចាស់ផ្ទះ»។

ឯកឧត្តម ហ៊ុន ម៉ានី បានបន្តថា រឿងរ៉ាវដែលនាំឲ្យមានការប៉ះពាល់ដល់សតិអារម្មណ៍ ឬការមិនពេញចិត្តណាមួយមកលើកម្ពុជារបស់យើងបែបនេះ ជាអ្វីដែលយើងគួរតែជៀសវាងឲ្យបានជាដាច់ខាត មិនថាការចូលរួមធ្វើដោយផ្ទាល់ ឬការបញ្ចេញមតិយោបល់លើបណ្តាញសង្គមនោះទេ។

ឯកឧត្តម សង្ឃឹម និងជឿជាក់ថា រឿងហេតុបែបនេះនឹងមិនមានកើតឡើងជាបន្តទៀតនោះទេនៅអំឡុងពេលដែលកម្ពុជាកំពុងធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេម ចាប់ពីថ្ងៃទី៥ ដល់ថ្ងៃទី១៧ ខែឧសភា និងអាស៊ានប៉ារ៉ាហ្គេម នៅថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣។ ត្រង់ន័យនេះ ឯកឧត្តមបានសង្កត់ធ្ងន់ថា កម្ពុជាបានខិតខំប្រឹងប្រែងច្រើនណាស់ទាំងប្រមុខរាជរដ្ឋាភិបាល ទាំងគណៈកម្មការរៀបចំ ទាំងសហព័ន្ធកីឡានានា ក៏ដូចជាកីឡាករ កីឡាការិនី និងអ្នកចូលរួមទាំងអស់។ ដូច្នេះប្រជាពលរដ្ឋកម្ពុជាម្នាក់ត្រូវខ្នះខ្នែងប្រឹងប្រែងចូលរួមដោយសប្បាយរីករាយ ក៏ដូចជាកសាងបានអនុស្សាវរីយ៍ឲ្យបានច្រើនសម្រាប់ខ្លួនផង និងមិត្តភក្តិបរទេសរបស់យើងផង៕